Ezekiel2
1Now klang ang mih maru tek ang mih, “Aw maru chapa, awr rü diah; en hown ang taklang kown,” pakhai.2Nami maru klang ang reng tak khe Thurai Lümla mih ang tut-e uang kup hanow uang krüng ang khai, now klang ang mih maru tek lai reng tak mih dow ang ta khai.3Nami maru tek mih, “Aw maru chapa, kingküa hai sen ang mih chenchap Israeluüa tut-e ang uang chin en mih chekhai. Amatni hai amatni pipu-uüa dow ani mowr kingküa hai sen ang reng tak chekhai.4Ang kowchin en mih arah kowi kowh maru-uüa dow amiasiama chekhai, now ang kowi paw nü ang klowk ang büah dowi chekhai. Nami maru-uüa tut-e en nakowtek kown mih, ‘Mami chowtaih CHAKRAMANG Thurai laiklow,’ napape kown.5Amatni dow nami laiklow hawt sünta büah dowi tham chepaw naia. Tawngplawng kowchow panow amatni dow kingküa hai sen mih chenchap chekhai. Nachenganchepaw amatni pungmadawng kowi risi uowi lowk ia pami dow natuk büah kown.6Aw maru chapa, amatni hai amatni kowh laiklow kowi hangkow kram diah. Amatni kawi krawk mih laiklow dow chuh mung kowi kowh cham uowi mih iawng hai krawng dak rowp takra kowi kowh cham uowi mih iawng chepaw hangkow kram diah. Amatni kowi khi hai amatni laiklow ta rakowi hangkow kram diah; amatni dow kingküa hai sen mih chenchap chekhai.7Amatni dow kingküa hai sen mih chenchap chekhai rakowi ang laiklow hawt sünta büah dowi tham chepaw naia. Nachenganchepaw sünta lah, sünta dowi lah amatni tut-e ang laiklow en nakowtek kown.8Aw maru chapa, ang tek en mih sünta diah. Paimi kingküa hai sen mih chenchap iawng dow hang tawi own diah. En kowh nawr haah diah, now ang pe en mih cha diah,” pakhai.9Nami khin khe ang tang mü hanow ang prakowi rut uaitaiaw lowk mih ang khi khai. Nami rut kowi dow charam tua uowi lowk chekhai.10Now nami rut mih nami charam tua phat ang khai. Nami charam pre dam trui kowi dow arui uowi chekhai; naiawngün dow kar meng, uowila uiting uangtak mih laiklow hai taprüa taiiara laiklow chekhai.
The Seed Company