Ezekiel22
1Nami kung kowi CHAKRAMANG laiklow dow ang tut-e uang ting khai. Aia tek ang mih,2“Aw maru chapa, nachet tara kownkow kamrütia hown en uowi bow? Kamrütia hown che en uowi now sai maru reng mih Jerusalem marow kowi chet pe tara diah. Aia kowh suiiai kaniaima mih lup maten phuang pe dit.3Aia kowi dow maiawng kowtek pe diah: CHAKRAMANG tek mih, ‘Mami chowbowt chang ngak mih marow. Mami chowbowt aiamat maru-uüa kowi sai now pamatia luk kowi uang pawla phih reng mih marow. Thawp arup aren now pamatia kowi sürah lawkah mih marow mami chowbowt. Naiawng rakowi aia kowh ripra khin mih uang tarü khowk.4Sai maru hanow en chang aprek khai, now thawp arup aren hanow en tasür talawk khai. En matia kowh tara chetra ni dow en uang tawnla khai, en kowh chur khin dow uang ting khai bowt. Naiawng rakowi akeng chenchapuüa tut-e ang nachangla en prawng renra kown, now akeng prenchakuüa maten nachangla en rensi kau kown.5Aw mapaw thaulangra uowi dowi mih marow, atawnchow kowi kowh uowi miuüa hai alakma kowi kowh uowi miuüa naprawng naren en kown.6“‘Sam mü madiah, Israel pren kruitown miuüa maten dow nasai maru kownkow amatni kowh kür tawngah büah khai.7Maru-uüa dow u-pa kowi nü dowi klowk dowi chekhai, prenlang maru-uüa kowi paw chang nowng chang powng khai. Nami klen kowi saratchow hown mamaimowuüa kowi paw kuanah khai.8Ang kowh arah chimsaima mih kowi en nüah klowkah dowi, now ang kowh tanai ni ün paw chimsaima en towah dowi chekhai.9Enni pungmadawng kowi tawngbak mih maru dow maru iung kowi nasaita kownkow küa daila reng mih uowi ne chekhai. Marow kowi kowh maru-uüa dow hungh luk kowi kowh phuchuara kowi ün cham cha nat ngar reng chekhai, now lainowmma chang iawt chang iang khai.10Maru-uüa dow u-uai hown paw chang iang khai, now uisawng uowi mih masiuüa kowi paw kür hown krawi phua krawi iuaah khai.11En maru-uüa dow klowkchakuüa kowh masi hown paw chang iang khai, iaumowuüa hown paw chang iang khai, now tuamow tawng miuüa kowi paw kür hown phuaah iuaah khai.12Pamatia maru-uüa kowi nasaila kownkow en maru-uüa dow cha büm reng chekhai. En maru-uüa dow cham pe lowi chepaw arawn amatma paw achüt reng chekhai. Amatni dow pamatia klowkchakuüa kowi kür hown paw pe tangka reng chekhai. Aw Jerusalem, en tamata ang khai bowt. Ang CHAKRAMANG Thurai mami laiklow ang tek khowk.13“‘En maru-uüa dow krawi kuan maru khai, now sai pamatia maru khai. Naiawng rakowi ang kowh rut kunta hüah mih dow enni luk kowi ang nauang pe klaah kown.14Nauang pe en ripra kownkow ang uang mih khin khe dow en kowh sakkraingra nauowi kown bow? En kowh rut kowi kür nauowi kown tak bow? Ang CHAKRAMANG ngengche mami laiklow ang tek khowk, now ang tekta mih dow ang nachang ngengche kown.15En kowh maru-uüa kowi dow akeng chenchapuüa tut-e hai akeng pren kowi ang nacham uetah kown, now en lak kowi kowh asür alawi maten dow ang nahenta kown.16Naiawng rakowi chenchapuüa pur kowi en narukrai kown. Nami khin khe dow ang CHAKRAMANG, ang chang en mih chekhai pami en natuk bowt kown,’ pape diah,” pakhai.17Nami kung kowi CHAKRAMANG laiklow dow ang tut-e uang ting khai. Aia tek ang mih,18“Aw maru chapa, Israeluüa dow ang tut-e mapaw asung uang dowi chekhai. Amatni dow maih kowi eng tai khe kowh kaah asun dowk kowh kuakta mih lawngha, kri hai kheh taraw nak mih kih iawng chekhai.19Naiawng rakowi amatni kowi dow maiawng ang tek pe khai: ang CHAKRAMANG Thurai tek khowk, ‘Enni bowkbowk chowng lawngha kih khai bowt, naiawng kowh Jerusalem marow kowi ang nakua enni kown.20Tai, kri, lawngha hai kheh kowi maih kowi nawmah now chawrah kownkow maru hut pe maih khai. Nami powm iawng dow marow kowi arasang ang nakua enni hanow mapaw ang sak-ih dowi mih hai ang kunmaraura maih iawng lün pluplup mih hown ang narip enni kown.21Ang nakua enni hanow ang kowh kunmaraura maih iawng lün pluplup mih hown marow kowi dow ang nachawr enni kown.22Taping maih kowi tai chawr mih iawng dow enni paw marow kowi nachawr kown. Nami khin khe dow ang CHAKRAMANG ngengche ang kowh kunmaraura enni luk kowi uang pe tingah mih chekhai pami enni natuk bowt kown,’ ang pape khai,” pakhai.23Now CHAKRAMANG laiklow dow ang tut-e uang ting khai. Aia tek ang iawk mih,24“Aw maru chapa, Israel pren kowi maiawng tek pe diah: CHAKRAMANG tek mih, ‘En dow asür alawkma mih pren chekhai. Naiawng rakowi ang kunmarau mih ni khe en dow asür alawkma mih pren nachowng kown. Nami dow katpaw uang uang dowi mih pren nachowng kown,’ pape diah.25En kowh risiuüa dow nachang lup ngak kownkow thawp prengia khai; amatni dow hek rawmrawm mih krangsi iawng dow krawi lim maru sak khai. Amatni dow krawi sai maru hanow dawngthawnguan hai asung khak khakma mih uanh krawi rup khai. Amatni dow saita pe huauüa hanow masiuüa akawmma kowi pe chowngah mamaimow khai.26En kowh uamowuüa dow ang kowh ari aiang kowi kingküala mih lup chang büah khai, now ang kowh chimsaima mih uanh ün paw chimsaima towah büah dowi chekhai. Chimsaima mih chap hai chimsai dowi mih chap paw lang kraah dowi chekhai. Chimsai hai chimsai dowi mih lawnguan maru kowi paw tüngsang büah dowi chekhai. Ang kowh tanai ni ün nasun kown mih lawnguan kowi paw chang tuk dowi iow büah khai. Naiawngün rakowi amatni tut-e kowh ang kowh ming chimsaima mih dow piak khai bowt.27En kowh aluchowuüa dow sui iawng krawi sai maru khai, now nakhünta pe dawngthawnguan kownkow krawi sai maru khai.28Amatni kowh lup ngak nakhu nadaula pe kownkow amatni kowh risiuüa dow tek dai lai khai. CHAKRAMANG tek dowi chepaw, ‘CHAKRAMANG tek khowk,’ padow krawi tek büah khai.29Iawngpa mih maru-uüa paw tachang nowng tachang powng khai, amatni lala tachang damra khai. Amatni dow ngarawng ngarai miuüa hai akhawr hown uowi miuüa kowi kuanah khai. Nami klen kowi prenlang maru-uüa luk kowi paw chet pe tara nowm lak dow kutplan changah nowng büah khai.30“Naiawng rakowi tachi tanawmra tap nowng raw kown mih maru, ang kowh kunmaraura hown ang napiakta pe pren kown khe kowh nahang ang kown mih maru, tap takhue mih hownia naiowng hanow ang pur kowi natek lai kown mih maru ang krawi cham lowk ia chowdiah. Tawkchedow mia kowi paw ang ka dowi chekhai.31Naiawng rakowi ang kowh kunmaraura dow amatni luk kowi ang nape klaah kown, now amatni kowh chowm krang uowi krang sung dow ang napeah kown. Amatni kowh angak rakowi ang kowh kunmaraura maih iawng lün pluplup mih hown amatni kowi ang napiakta kown. Ang CHAKRAMANG Thurai mami laiklow ang tek khowk,” pakhai.
The Seed Company