Ezekiel21
1Nami kung kowi CHAKRAMANG laiklow dow ang tut-e uang ting khai. Aia tek ang mih,2“Aw maru chapa, kawmat dow Jerusalem prakowi dangah hanow ang kowh kim chimsaima mih kowi kingküa mih laiklow tek pe diah, now Israel pren kowi kingküa mih laiklow hai pur prakowi tawng chow nauang ting kown mih lai tek pe diah.3Aia kowi dow maiawng tek pe diah: CHAKRAMANG tek mih, ‘En kowh ransu ang na khai. Saidawng dow akawp hownia ang nahowkah hanow en lak kowi kowh maru iung hai maru ngak bowkbowk kowi ang nakowngta kown.4Ang kowh saidawng dow akawp hownia nahowkah hanow ang nasai enni kown, maru iung hai maru ngak bowkbowk kowi ang nakowngta enni kown; mrawkphak hownia tawngphak mowr enni nakowng kown.5Nami khin khe dow ang chowtaih CHAKRAMANG pami maru maten natuk kown. Ang matia ngengche saidawng dow akawp hownia ang howkah khai; lup chur dowi mowr nami saidawng dow akawp kowi ang naphangah iawk kown nadowi bowt,’ pape diah.6“Naiawng rakowi aw maru chapa, aklow tarua phawnglawng kar diah. Sak ter iawmlawm hai sak prüa rau uang takhui ruru se amatni pur kowi aklow tarua phawnglawng kar pe diah.7‘Tawngplawng kowchow aklow tarua phawnglawng en tuk kar khai?’ Padow nalünta en büah kown. Nami khin khe, ‘Satang ngak uang ting kown chowbowt. Naiawng rakowi aklow tarua phawnglawng ang kar mih chaw. Nami khin khe takrow lai rakowi maru maten namaw kown, sakkraingra maten paw natama kown. Nami klen kowi rut hai khawk paw nachür klukluk kown. CHAKRAMANG tek nami dow uang tarü thüm khowk pe; nami dow naphaw ngengche kown pe,’ pape diah,” pakhai.8Now CHAKRAMANG laiklow dow ang tut-e uang ting khai. Aia tek ang mih,9“Aw maru chapa, pur prakowi nauang ting kown mih lawnguan Jerusalem maru-uüa kowi maiawng tek pe diah, ‘Saidawng dow sükta kaneu now sawkta kaneu lowk khowk.10Nami saidawng dow nangenla maru kownkow sükah kaneu mih chekhai, now pla nowi iawng dow natawk pliplip kownkow sawkah mih chekhai. Hang piaw büah tham bowt. Ang laiklow miapaw enni chün dowi rakowi ripra dow uang ting kown chowbowt,’ pape dit.11“Saidawng dow natawngah kownkow sükah now sawkah kaneu mih chekhai. Nami saidawng dow sai maru mih rut kowi naap pe kownkow sükah now sawkah kaneu mih chekhai.12Aw maru chapa, ang maru-uüa hai Israel pren kowi kowh aluchow maten vüi saidawng dow natawngah kown. Naiawng rakowi kar hai nguk hown uowi diah. Ang maru-uüa hown Israel pren kowi kowh aluchowuüa maten paw saidawng rut kowi nakowng kown chekhai. Naiawng rakowi ti downgprang diah.13Ang maru-uüa kowi ang chaingah mih chekhai. Amatni che tarip kown nau dowi kowh chalow now naiawngün dow amatni luk kowi nauang ting ngengche kown chekhai.14“Naiawng rakowi aw maru chapa, pur prakowi nauang ting kown mih lawnguan krawi tek diah. Now nauang lüa ting kown mih lawnguan kowi kunmarau kowh phek rut diah. Saidawng dow aplan aplan maru-uüa luk kowi pauang cham kla lah. Nami saidawng dow nangenla maru kown mih chekhai. Nami dow maru akawmma kowi nangenla kown mih chekhai. Nami saidawng dow amatni kowi nauang umta lut kown.15Nangenla amatni kownkow tapplawt towng saidawng dow ang krawi tow pe khai. Nami saidawng dow khi büah hanow kram lai rakowi auaklakma naphaw ne kownkow ang krawi tow pe mih chekhai. Nami saidawng dow pla nowi iawng tawk pliplip chekhai; nami dow nangenla maru kownkow sükah mih chekhai.16Aw achukma mih saidawng, hawmlawm prakowi krawi tu diah, now lakuai prakowi paw krawi tu diah. En nau iawng lowra prakowi krawi tu diah.17Nami khin khe dow ang naphek rut kown, now ang kowh kunmaraura naprowng bowt kown. Ang CHAKRAMANG ngengche mami laiklow ang tek khowk,” pakhai.18Nami kung kowi CHAKRAMANG laiklow dow ang tut-e uang ting khai. Aia tek ang mih,19“Aw maru chapa, Babulawn mang kowh saidawng nauangla kown mih tiama pre buk kowi thawp pe matra diah. Nami tiama pre buk mih dow Babulawn pren paprenchow hownia kowh nauang lawt kown mih chekhai. Now marow prakowi nauangla kown mih tiaprek kowi dow towla pe amatra chüng diah.20Tiama lowk dow Amawnuüa kowh marow kri Raba pra kowh mangla mih naown kown, now alowk mih dow Judauüa kowh tap tapat lut mih marow kri Jerusalem pra kowh mangla mih naown kown.21Nami tiaprek re-e uang ting hanow tawng pra chow mang kown mih tuk dowi rakowi Babulawn mang dow natathüp kown. Tawng pra chow mang kown mih natukla kownkow nami re-e dow naap leba sek kown, aia kowh thuraiuüa tut-e napaw prengia kown, now namü asadua plawng kown.22Nami khin khe aia rut kowi kowh leba sek dow Jerusalem marow pra kowh mangla mih tiama natüng pe kown. Now nakowi dow nakhuela tap kown mih uanh natow pe kown, naklawla tap kown mih hai tap hownia nadowmla kown mih bawn paw nachun büah kown.23Jerusalem maru-uüa dow Babulawn mang nimkrüa kowi nauowi kownkow takham khowk chekhai. Naiawng rakowi naiawngün lawnguan naowm büah kown nadowi. Nachenganchepaw amatni kowh angak mih Babulawn mang natüng pe hanow nakhümla kown.24“Naiawng rakowi ang CHAKRAMANG Thurai tek khowk, atarlarma enni chang ngak hai enni kowh aprek dow enni tüngah khai. Enni kowh lup maten kowi enni kowh aprek dow tatüng khai bowt. Naiawng rakowi nakhümla enni hanow nar kowi natow enni kown.25“Aw angakma hai asür alawkma mih Israel mang, en kowh ni chur khin uang ting khowk, en kowh piakra khin uang na khai bowt.26Ang CHAKRAMANG Thurai tek khowk, en kowh napawng iiata diah, now en kowh mang lukruk paw towta diah. Kawmat kowh uowi iawng nauowi kown nadowi bowt; maru iuk kowi asowmchow, asowmchow mih kowi maru iuk nachangah bowt kown.27Jerusalem marow dow napiak kown, nami marow dow asaima ang napiakta kown. Nachenganchepaw mami marow kowi nachet pe tara kown kurdik uowi mih kowi mami marow dow ang napeah kown. Nami kurdik pawk mih maru uang ting dowi mowr mami marow dow napiak kown nadowi tak chekhai.28“Aw maru chapa, Israeluüa kowi peah rukrai mih Amawnuüa luk kowi pur prakowi nauang ting kown mih lawnguan maiawng kowtek pe dit: CHAKRAMANG tek mih, ‘Saidawng dow akawp hownia howkta khai bowt; nami saidawng dow nangenla maru kownkow sükah mih chekhai, now tu maru khe pla nowi iawng dow natawk pliplip kownkow sawkah mih chekhai.29Amawn pren kowi kowh maru ngakuüa low, enni kowh mukmang dow adai chowtaih, daila kowi enni cham owm khai. Naiawng rakowi saidawng dow enni ngawng kowi tangta enni hüah khowk; enni kowh chur khin dow uang ting kown chowbowt, enni kowh piakra khin dow uang towm khai bowt.30“‘Aw Amawnuüa, enni kowh saidawng mih akawp kowi phangta diah. Enni kowh phuaru rah, enni kowh pipu-uüa pren kowi ang nachet enni tara kown.31Ang kowh kunmaraura dow enni luk kowi ang nauang sunah kown, now mapaw ang sak-ih dowi mih dow maih iawng nakam enni kown. Maru sai kiakma miuüa, maru lang ngah miuüa rut kowi ang nacham ap enni kown.32Enni dow maih kowi kowh nawmah mih sawp iawng naown kown. Enni kowh vi dow enni matia pren kowi nahawk kown. Enni nachum bowk kown chekhai. Naiawng rakowi maru maten natamata enni kown. Ang CHAKRAMANG ngengche mami laiklow ang tek khowk,’ pape dit,” pakhai.
The Seed Company