Ezekiel23
1Nami kung kowi CHAKRAMANG laiklow dow ang tut-e uang ting khai. Aia tek ang mih,2“Aw maru chapa, masiuüa uowi pre ia. Nami masiuüa pre ia mih dow amachak chah chekhai.3Amatchi dow ning diachow hownia Aigupta pren kowi chang chawkkrawma lup khai, now Aigupta prenchakuüa dow amatchi hown taphua taiua khai. Naiawng hai amatchi kowh malauüara chimsaima mih dow piak pe khai.4Amatchi pre ia kowi lang ta mih ming dow Ohola chekhai, now lang sawi mih ming dow Oholiba chekhai. Ohola dow Samari kowi kowh uatah mih chekhai, now Oholiba dow Jerusalem kowi kowh uatah mih chekhai. Akung kowi amatchi dow uang chowng ang masi khai, now ka chu ka cha iüah khai.5“Ohola dow ang masi chowbowt chepaw chang iawt chang iang khai. Aia dow amanau Asuriauüa hown taphua taiua kown mih lainowmma irh khai. Aia irhah mih maru-uüa dow mintau pau rawng uan khupma mih siphaiuüa ün, siphai aluchowuüa ün, pren kruitown miuüa ün chekhai. Naiawngün maru-uüa maten dow kawrnga kowi kowh chowm miuüa hai klangiungma kangowh chekhai.7Aia dow Asuria pren kowi kowh maru iukuüa maten tut-e chawkkrawma iawng dow tape khai. Aia irhah mih maru-uüa kowh arup aren maten hown aia dow tawi tasür talawk khai.8Aigupta pren kowi kowh aia uownah mih chawkkrawma lup dow aia towta dowi tak chekhai. Aigupta pren kowi ning diachow reng tak khe maru taiua mawkla ün hanow aia kowh malauüara chimsaima mih dow piakta pe khai, now nakowi kowh manau-uüa maten dow chawkkrawma iawng aia kowi tawngah kengah khai.9“Naiawng rakowi aia irhah mih Asuriauüa, aia kowh manau-uüa rut kowi dow ang apta khai.10Aia kowi dow tengiow tengklaima Asuriauüa towah khai, now aia kowh chauüa kowi dow rupta pe hanow aia kowi dow saidawng hown saiah khai. Aia kowh ripra lawnguan dow kawmat pat akeng mih masiuüa hawmh changla talawp müa khai.11“Anaumow Oholiba dow naiawngün maten khi khai. Nachenganchepaw aia dow ataimow lak-e lang chang ngak khai; aia kowh leura hai aia kowh chawkkrawma lup dow ataimow lak-e lang hu khai.12Aia paw Asuriauüa hown taphua taiua kown mih lainowmma irh khai. Aia irhah mih maru-uüa dow mintau pau rawng uan khupma mih siphaiuüa, siphai aluchowuüa, pren kruitown miuüa ün chekhai. Naiawngün maru-uüa maten dow kawrnga kowi kowh chowm mih hai klanguüa klangiungma kangowh chekhai.13Aia paw aiamat kowi sürah lawkah mih ang khi khai; amatchi tainau pre ia trui kowh uowi krang dow katsang chekhai.14“Nachenganchepaw chawkkrawma lup chang prakowi Oholiba dow ataimow lak-e lang rawn khai. Aia dow kimbang kowi kowh thawpah mih Babulawn pren kachakuüa pung khi khai. Nami pung kowi kowh maru-uüa dow kowrmow ring khupma panow kelang kowi kekawm ükma hai lu kowi napawng mai taruang phownlown chekhai. Naiawngün dow Babulawn pren kowi kowh siphai aluchowuüa iawng kangowh chekhai16Naiawngün kowi khi hown akrowksang Oholiba dow naiawngünuüa hown taphua taiua kown mih lainowmma irh khai. Naiawng rakowi aia dow Babulawn pren kowi kowh naiawngün maru-uüa tut-e kowchin maru khai.17Nami satang ka hanow Babulawn maru-uüa dow aia tut-e uang khai, now aia hown dow uang taiua mawkla khai. Now aia hown dow chang iang hanow aia kowi dow sürah lawkah khai. Nami maru-uüa hown tasür talawk kung kowi aia dow nami maru-uüa kowi suiah khai bowt.18Aia kowh chawkkrawma lup chang dow atarlarma chekhai bowt, now aia kowh tengiow tengklaima mih dow maru maten kowi pe khi-ah khai. Nami khin khe dow ataimow kowi kowh ang suiah mih iawng aia kowi paw ang suiah khai.19Aia malauüa tadowklowtchow khe kowh Aigupta pren kowi aia chang mih ün dow aia tuakah hanow aia kowh chawkkrawma lup chang aia pe huah ngamlam khai.20Aigupta maru-uüa iawng mih kowi lainowmma aia prüa khai. Tawngplawng kowchow panow Aigupta maru-uüa kowh kow uanh dow kawrngaramchük hai kawrnga kowh haupawk müa uanh iawng chekhai.21“Aw Oholiba, en malauüa tadowklowtchow khe Aigupta maru-uüa pren en iawnah hanow en kowh malauüa chimsaira dow piakta en khai. Nachenganchepaw naiawngün maru-uüa hown kawmat paw chang iang iawk kown mih en nau reng tak chekhai.22“Naiawng rakowi ang CHAKRAMANG Thurai, ang tek khowk. En suiah kowh en kingküaah khowk mih en kowh manau-uüa maten kowi nakingküa en kownkow ang nakua en kown, now amatni dow nakingküa en kownkow en tavir lut ang nauang pawla en kown.23Babulawnuüa hai Kaldaiuüa, Pekud, Shua, kua hai Asuriauüa maten kowi ang nauang pawla en kown. Amatni dow kawrnga kowi kowh chowm mih, siphai, siphai aluchow, pren kruitown mih, maru iuk hai klanguüa klangiungma kangowh chekhai. Amatni dow kawrnga kowi chowm se nauang kown.24Amatni dow tasen müa rutchün khawkleng, kawrnga kari, uanh pawk müa kari hai maru akawmma nakingküa en kownkow nauang tarü kown. Amatni dow asowmchow mih hai aiukma mih kawngma dowk hai lawngha lukruk krukma kangowh nauang rum en kown. Narip en kownkow amatni rut kowi dow ang naap en kown, now amatni dow amatni kowh tara chet krang hown narip en kown.25En luk kowi lainowmma ang kunmarau khai. Naiawng rakowi kunmarauma hown narip en kownkow amatni kowi dow ang natawngah kown. Amatni dow nahiahta en nakawng hai paramkui kown, now en maru-uüa kowi dow nakowngta en bowk kown. Amatni dow en kowh chapa chamauüa kowi nakhümah hanow napawla en kown, now ta lat miuüa kowi dow maih kowi asing nanawmah hanow nakowngta kown.26Amatni dow en kowh dawnguan naklüpta en kown, now en kowh klangiung klangiungma hai asung khakma mih tatawng müa uanh paw napawta en kown.27Aigupta pren kowi kowh en uownah mih chawkkrawma lup chang hai iang chang dow naiawng hown ang nachurta en kown. Nahanow naiawngün maru-uüa prakowi en nadang kown nadowi bowt, now Aigupta pren kowi paw en naka tuak kown nadowi bowt.28“En suiah mih maru-uüa, en suiah kowh en kingküaah khowk miuüa rut kowi ang naap en kown.29Amatni dow nasui en kown, now en kowh kawm rak dow narupta en bowk kown. Amatni dow tengiow tengklaima hai akhaw aklaima nata towta en hüah kown. Nami khin khe dow en kowh chawkkrawma lup chang natatüng bowt kown. Akeng chenchapuüa hown en chang iang khai, akeng chenchapuüa kowh arup aren hown en tasür talawk khai. En kowh iang chang hai chawkkrawma lup chang rakowi naiawngün dow en luk kowi nauang ting kown.31En taimow kowh uowi krang iawng en tawi uowi khai. Naiawng rakowi en taimow kowh ripra bia dow en kowi paw ang nape en kown.32“Ang CHAKRAMANG Thurai tek khowk:En taimow kowh ripra bia dow en nakham kown,nami bia dow aiuk hai abüpma chekhai.Nami kowi dow ahuma takowi khai rakowi nami hownia kham hanowmaru nasui en hai maru nachangla en rensi kau kown.33Kramra hai piakra bia hownia, en taimow Samari kowh bia hownia en kham hanowpua hai sak prüa rau atekma en nauowi kown.34Nami bia dow asaima pat en nakhamta kown,bia paw en nabiata prowng kown.En ki kham hanow nami bia dow en nateuta prawt kown,now nami bia di bia sek hown dow en kowh iawnün en nataah kown.“Nami dow naphaw ngengche kown, ang CHAKRAMANG Thurai mami laiklow ang tek khowk.35“En tamata ang khai, now en kung prakowi en towta ang khai. Naiawng rakowi en kowh iang chang hai chawkkrawma lup chang sung dow en nakham kown takla. Ang CHAKRAMANG Thurai, mami laiklow ang tek khowk,” pakhai.36Nami kung kowi CHAKRAMANG tek ang mih, “Aw maru chapa, Ohola hai Oholiba kowi nachet pe tara kownkow kamrütia hown en uowi bow? Kamrütia hown che en uowi now amatchi kowh suiiai kaniaima mih lup lawnguan kowi tek pe diah.37Amatchi dow chang iang hai sai maru sak khai. Amatchi dow arup aren hown chang iang khai, now ang vüi kowi kowh kaah mih chauüa kowi paw saiah khai. Amatchi dow ang vüi kowi kowh kaah mih chauüa kowi maih kowi nawmah now changla arup aren phuchua müa khai.38Nami klen kowi ang kowh kim chimsaima mih paw sürlawkta nak khai, ang kowh Tanai Ni paw chimsaima towah iüah dowi chekhai.39Amatchi dow amatchi kowh chauüa kowi arup arenuüa vüi ngen pe khai, now nami ni kowi ang kowh kim chimsaima mih kowi paw uang kup hanow sürlawkah khai. Naiawng dow ang kowh kim chimsaima mih kowi changah iüah khai.40“Nami klen kowi Ohola hai Oholiba iüah dow pren lakma hownia nauang pawla maru kownkow cham chin maru khai. Naiawngün maru-uüa uang ting hanow amatchi dow lu tui lu lam khai, now sü mikkhu pawi ün hanow baing chang müa hown tatawng iüah khai.41Nami kung kowi dow mawk rah klangiungma mih kowi chowm iüah khai. Now naiawngün maru-uüa pur kowi tow pe pawitang khai, now nami pawitang luk kowi dow ang kowh maikhük towk müa hai sau tow pe iüah khai.42Amatchi tut-e dow maru kawm klow nowk chawplawp chekhai. Naiawngün nowk chawplawp mih maru-uüa dow süngrüp süngkangma kowi kowh arak kham lu-uüa chekhai. Naiawngün maru-uüa dow amatchi tainau rut kowi ü pe kuaiseh khai, now amatchi lu kowi dow mang lukruk klangiungma mih kruk pe khai.43Nami khin khe chang iang kowh kow uakma mih masiuüa lawnguan kowi ang tek pe mih, ‘Kawmat dow amatchi kowi chawkkrawma kowi iawng dow naiawngün maru-uüa pacham tawngah lah, now aia paw naiawngün maru-uüa hown pacham chang iang lah,’ pakhai.44Now chawkkrawma hown kowh maru taiua mawk iawng dow leulama mih Ohola hai Oholiba hown maru taiua mawk khai bowt.45Nachenganchepaw chang iang mih hai sai maru sak mih sung amatchi kowh kakbak ripra dow amatchi kowi maru iunguüa napeah kown. Tawngplawng kowchow panow amatchi dow chang iang hai sai maru sak khai.46“Naiawng rakowi ang CHAKRAMANG Thurai, mami laiklow ang tek khowk, amatchi kowi nakingküaah kownkow ang nauang pawla pe maru kawm kown. Amatchi kowi dow kramra uowima mih hai damrauüa rut kowi ang naap-ah kown.47Naiawngün maru-uüa dow hua hown nakuakah hanow amatchi kowi dow nakowngta kown, now saidawng hown amatchi kowi dow nadungta naknak kown. Naiawngün maru-uüa dow amatchi kowh chauüa kowi nakowngta pe kown, now amatchi kowh kim dow natowkta pe kown.48“Aw Ohola hai Oholiba, naiawngün khi hanow masiuüa maten pacham tarip lah, now enchi iawng hang pacham chang lup ngak lah. Naiawng hai pren kowi kowh lup ngak chang dow ang nachurta kown.49Enchi kowh lup ngak chang sung dow enchi chowtaih nakham kown, now arup aren chup mih angak sung dow enchi nakur kown. Nami khin khe dow ang chowtaih CHAKRAMANG Thurai pami enchi natuk bowt kown,” pakhai.
The Seed Company