Ezekiel20
1Nar kowi takhang mih ranit ning hown tanga la khe kowh lacher hamüt ni khe Israeluüa kowh lawngtang aluchowuüa pre sum ia dow ang tut-e uang hanow ang ria kowi uang chowm büah khai. Amatni dow CHAKRAMANG naukrang tuk kown nau rakowi uang büah mih chekhai.2Nami khin khe CHAKRAMANG laiklow dow ang tut-e uang ting khai.3CHAKRAMANG tek ang mih, “Aw maru chapa, Israeluüa kowh lawngtang aluchowuüa kowi maiawng tek pe dit: CHAKRAMANG Thurai tek mih, ‘Ang naukrang tuk kown nau rakowi enni uang mih bow? Ang kowh asak lüklau se ang tek khowk, ang naukrang ang natek enni kown nadowi,’ pape dit.4“Aw maru chapa, amatni kowi chet pe tara kown mih en kamrüt bow? En che kamrüt now amatni pipu-uüa kowh suiiai kaniaima mih chowm krang uowi krang chia pe diah.5Amatni kowi maiawng tek pe dit: CHAKRAMANG Thurai tek mih, ‘Israel kowi ang lang kloah mih ni hownia Jakawb chuprek chaprekuüa tut-e ang takhamta khai bowt. Ang chowtaih amatni kowh CHAKRAMANG Thurai pami ang takhamta khai bowt. Now Aigupta pren kowi amatni tut-e ang kowtatüng pe khai.6Nami khin khe Aigupta pren hownia amatni kowi ang nalawtla hanow amatni vüi ang khowm bowkta pe khowk mih pren kowi ang nakowpawla kown mih paw ang takhamla khai. Nami pren dow kuai tui, iawn tui hai tawng chap paw akhawr uowi dowi mih pren chekhai; nami pren dow akeng pren maten lak-e paw lang iung mih pren chekhai.7Amatni kowh CHAKRAMANG Thurai dow ang chowtaih. Naiawng rakowi amatni tut-e kowh iung mih asürlawkma mih arup aren hai suiiai kaniaima mih arup aren maten namata büah bowk kownkow ang tek pe khowk chowdiah. Nami klen kowi Aigupta pren kowi kowh arup aren hown natawi tasür talawk büah dowi kown mih paw ang tek pe khowk chowdiah.8“‘Tawkchedow kingküa hai sen ang büah khai, ang kowh laiklow chün kown nau büah dowi chekhai. Amatni tut-e kowh iung mih asürlawkma mih arup aren hai suiiai kaniaima mih arup aren mata büah dowi chekhai, now Aigupta pren kowi kowh arup aren ün paw nuata büah dowi chekhai. Naiawng rakowi ang kowh kunmaraura hai mapaw ang sak-ih dowi mih maten hown Aigupta pren kowi amatni kowi napiakta kownkow ang kamrüt khowk chowdiah.9Nachenganchepaw amatni kowi ang piakah dowi chekhai. Tawngplawng kowchow panow ang kowh ming iung natownah reng kown ang nau khai, now amatni uowiah mih prenchakuüa tut-e ang kowh ming natasür talawk kown mih ang nau dowi chekhai. Tawngplawng kowchow panow maru maten pur kowi Aigupta pren hownia amatni kowi nalawtla kown mih ang takhamta khai bowt chekhai.10“‘Naiawng rakowi Aigupta pren hownia uang lawtla now süngrüp süngkangma kowi ang uang pawla khai.11Amatni kowi dow ang kowh rirow ang peah khai, now ang kowh ari aiang ang tek pe khai. Nami rirow hai ari aiang chün khai mih dow nami hown nasing kown.12Now ang hai amatni takra kowi amatra iawng hai Tanai Ni ang tow pe khai. Ang CHAKRAMANG ngengche, ang matia vüi chimsaima ang natowah kownkow amatni kowi ang lang kloah mih chekhai. Nami natukla büah reng kownkow nami Tanai Ni ang tow pe mih chekhai.13“‘Tawkchedow Israeluüa mih süngrüp süngkangma kowi kingküa ang büah khai. Amatni dow ang kowh rirow ün chün büah dowi chekhai, now ang kowh ari aiang chün hanow maru kala singra mih paw nuata büah khai. Amatni dow ang peah mih Tanai Ni ün paw chimsaima towah büah dowi chekhai. Naiawng rakowi ang kowh kunmaraura hown amatni kowi süngrüp süngkangma kowi ang napiakta kown chowdiah.14Nachenganchepaw amatni kowi ang piakah dowi chekhai. Tawngplawng kowchow panow ang uang lawtla khe kowh khi mih akeng chenchapuüa tut-e ang kowh ming tasür talawk kown mih ang nau dowi chekhai. Naiawng rakowi ang kowh ming iung natownla reng kownkow amatni kowi ang piakah dowi chekhai.15Nami klen kowi ang peah mih pren — kuai tui, iawn tui hai tawng chap paw akhawr uowi dowi mih pren — akeng pren maten lak-e kowh lang iung mih pren kowi napawla dowi kownkow süngrüp süngkangma kowi amatni tut-e ang takhamta khai bowt.16Amatni dow ang kowh ari aiang nuata büah khai, now ang kowh ari arow ün chün büah dowi chekhai. Nami klen kowi ang peah mih tanai ni ün paw achimsaima chünah büah dowi chekhai. Tawngplawng kowchow panow amatni kowh sak dow arup aren phuchuara prakowi lang sakkrai rowt chekhai.17Nachenganchepaw amatni luk kowi ang kowh saksing sanara dow uowi reng chekhai. Naiawng rakowi amatni kowi dow süngrüp süngkangma kowi amaisang ang piakah dowi chekhai.18“‘Amatni chauüa kowi dow amatni pipu-uüa iawng nachang dowi kownkow hai amatni pipu-uüa chowm krang uowi krang iawng nauowi büah dowi kownkow nakowi ang tek pe khai. Now amatni pipu-uüa kowh arup aren ün hown natasür talawk büah dowi kown mih paw ang tek pe khai.19Ang chowtaih amatni kowh CHAKRAMANG Thurai. Naiawng rakowi ang kowh rirow hai ang kowh ari aiang ün nachün büah kownkow ang tek pe khai.20Ang chowtaih amatni kowh CHAKRAMANG Thurai pami natukla büah reng kownkow amatra iawng hai Tanai Ni ün ang peah khai, nami Tanai Ni ün dow achim asaima natowah büah reng kownkow ang tek pe khai.21“‘Tawkchedow naiawngün chauüa paw kingküa ang büah khai. Ang kowh rirow hai ang kowh ari aiang ün chün hanow maru kala singra reng mih prakowi amatni paw pe ching büah dowi chekhai. Amatni paw ang peah mih Tanai Ni ün achim asaima towah büah dowi chekhai. Naiawng rakowi süngrüp süngkangma kowi uowi büah reng tak khe ang kowh kunmaraura hai sak-ih dowi mih maten hown amatni kowi ang napiakta kown chowdiah.22Nachenganchepaw amatni kowi ang piakah dowi chekhai. Tawngplawng kowchow panow amatni kowi ang uang lawtla khe kowh khi mih akeng chenchapuüa tut-e ang kowh ming tasür talawk kown mih ang nau dowi chekhai. Naiawng rakowi ang kowh ming iung natownla reng kownkow amatni luk kowi naiawng ang chang pe dowi chekhai.23Nami takcha kowi akeng pren hai akeng chenchapuüa pungmadawng kowi amatni kowi ang nacham uetah kownkow süngrüp süngkangma kowi uowi büah reng tak khe ang takhamta khai bowt.24Tawngplawng kowchow panow amatni dow ang kowh ari aiang chün büah dowi chekhai, now ang kowh rirow mih nuata büah khai. Now ang peah mih Tanai Ni ün paw achim asaima towah büah dowi chekhai. Nami klen kowi amatni pipu-uüa kowh arup aren ün kowi dow lang nau büah khai.25Naiawng rakowi iung dowi mih rirow maten hai kala singra dowi mih ari aiang nachün büah kownkow ang lawtta khai.26Ang nauah dowi mih uanap hown pacham tasür talawk lah pakowh ang müta hüah khai, now amatni kowh chapa ta maten kowi maih kowi nawmah hanow nachangla phuchua müa kown mih ang hangah dowi chekhai. Naiawng hai amatni kowi dow ang ripah khai, now ang chowtaih CHAKRAMANG pami pacham tuk büah bowt lah pakowh chekhai,’ pape diah.27“Naiawng rakowi aw maru chapa, Israeluüa kowi maiawng tek pe dit: CHAKRAMANG Thurai tek mih, ‘Enni kowh pipu-uüa ang kaah sakowm dowi mih iawng chang lup hai pe ang rukrai büah khai.28Ang khamah mih pren kowi ang pawla mih kung kowi paw amatni dow hungh alowngma mih, singh mia achakma hai asingma mih singh khi hanow chang tawncher phuchua büah khai. Naiawng mih phuchuara pawi dow lainowmma ang kunmaraura pe tapur ang khai. Nami klen kowi amatni dow nakowi anam iungma mih maikhük paw towk pe khai, now hüngah mih phuchuara pawi paw chang büah khai.29Naiawng rakowi tawngplawng kowchow hungh lowngma kowi amatni cham kowi mih dow ang lüntaah khai,’ pape diah,” pakhai. Naiawngün arah maten ming dow kawmat pat paw Bama pahai uowi reng tak chekhai. (Bama pami dow “Arah kroma mih phuchuara” pami chekhai).30Naiawng rakowi CHAKRAMANG tek ang mih, “Israeluüa kowi maiawng tek pe dit: CHAKRAMANG tek mih, ‘Enni paw enni pipu-uüa iawng dow enni matia kowi sürah lawkah reng kown chekhai bow? Enni paw enni pipu-uüa kowh asürlawkma mih arup aren hai suiiai kaniaima mih arup aren kowi tawi chupiia reng kown bow?31Ani mowr pat arup aren hown enni tasür talawk khai, ani mowr pat arup aren pur kowi enni kowh chapa chamauüa kowi maih kowi nawmah hanow enni phuchuaah khai. Naiawng rakowi aw Israeluüa, ang kowh naukrang ang natek enni kown pabow? Ang kowh asak lüklau se ang tek khowk, ang kowh naukrang mapaw ang natek enni kown nadowi.32“‘Singh hai hua kowi chup mih lusa kowi kowh akeng chenchapuüa iawng dow tawi uowi kown enni nau mih enni tek khai. Tawkchedow enni sak kowi kowh uowi mih iawng mapaw naphaw kown nadowi.33Ang CHAKRAMANG Thurai, ang kowh asak lüklau se ang tek khowk. Kür hown enni luk kowi ang nachowm mang kown, now ang kowh akürma mih rut ang napar enni khükhü ang narip enni kown; naiawng hai ang kowh kunmaraura dow ang natüng enni kown.34Ang kowh rut akürma mih hai ang kowh kunmaraura hown akeng chenchapuüa pungmadawng hownia ang nauang pawla enni kown. Enni cham uowiah mih pren maten hownia arasang ang nauang kuala enni kown.35Akeng chenchapuüa tavir lut mih süngrüp süngkangma kowi dow ang napawla enni kown, now nakowi dow lumowr tatawng te ang nachet enni tara kown.36Aigupta pren kowi kowh süngrüp süngkangma kowi enni pipu-uüa kowi kowh ang chet pe tara mih iawng dow enni kowi paw ang nachet enni tara kown.37“‘Ang kowh ari aiang dow kür hown ang nape chün enni kown; ang kowh sangbowk laitawm hown dow ang natawm enni kown.38Enni pungmadawng kowi kowh kingküa ang miuüa kowi dow ang namata kown. Amatni cham uowi mih pren hownia ang uang lawtla chepaw amatni dow Israel pren kowi natawi ka kup büah kown nadowi. Nami khin khe dow ang chowtaih CHAKRAMANG pami enni natuk bowt kown.39“‘Ang CHAKRAMANG Thurai tek khowk. Aw Israeluüa, tarü büah, enni bowkbowk enni kowh arup arenuüa kowi kowchup kowiia büah bowt. Nachenganchepaw pani khe dow ang laiklow enni nachün ngengche kown. Nami khin khe dow enni kowh uanap hai arup aren hown ang kowh ming chimsaima mih dow enni napiakah kown nadowi bowt.40Nami khin khe dow Jerusalem marow kowi kowh ang kowh hungh chimsaima mih Zaiawn hungh luk kowi Israel chenchap maten nauang chupiia ang bowt kown. Nakowi dow ang napaw enni bowt kown, now chimsaima mih phuchuara hai uanap hown aiung aiungma mih awmrawm sung ang nakük enni bowt kown.41Ang cham uetta enni mih pren maten hownia ang uang lawtla enni hanow arasang ang natow enni kown. Nami khin khe dow nam iungma enni naphaw bowt kown, now ang napaw enni bowt kown. Nami khin khe dow khi enni hanow enni rakowi ang achim asaima pami akeng chenchapuüa natuk bowt kown.42Enni pipu-uüa tut-e kowh ang takhamah mih pren Israel pren kowi ang kowpawla enni mih khin khe dow ang chowtaih CHAKRAMANG pami enni natuk bowt kown.43“‘Nakowi dow alai kowh enni chowm krang uowi krang hai enni tasür talawkla mih lup ün enni naka tuak kown, now enni changta lup ngak mih maten rakowi enni matia kowi enni natasui bowt kown.44Aw Israeluüa, enni kowh chowm krang uowi krang angakma mih hai enni kowh lup ngak sung ang pe enni dowi bowt tham. Tawkchedow ang kowh ming iung natownla reng kownkow ang nachang enni aiung bowt kown. Nami khin khe dow ang chowtaih CHAKRAMANG pami enni natuk bowt kown,’ pape dit. Ang CHAKRAMANG Thurai, mami laiklow ang tek khowk,” pakhai.45Nami kung kowi CHAKRAMANG laiklow mih ang tut-e uang plan ting khai. Aia tek ang iawk mih,46“Aw maru chapa, en kowh lumowr mih mrawkphak prakowi dangah hanow napra kowi kowh pren kowi kingküa mih laiklow tek pe dit, now nakowi kowh kaurawng kowi kingküa mih laiklow hai pur prakowi tawng chow naown kown mih laiklow tek pe dit.47Mrawkphak pra kowh kaurawng kowi nasünta ang laiklow kownkow tek pe diah. Aia kowi dow maiawng tek pe diah: CHAKRAMANG Thurai tek mih, ‘En kowi maih hown ang natowk en kown chowbowt, now nami maih dow en kowh singh kau maten asing hai akowng bowkbowk nakamta en kown. Nami maih lün pluplup mih dow namit kown nadowi chekhai, now mrawkphak hownia tawngphak mowr pat maru maten nami maih hown dow nakam kown.48Nami maih dow ang CHAKRAMANG towkah mih chekhai pami maru maten nakhi bowk kown; nami maih dow namit kown nadowi,’ pape diah,” pakhai.49Nami khin khe ang klangah mih, “Aw CHAKRAMANG Thurai, ang cham tek sangchia mih chowtaih padow ang lawnguan kowi maru tek ang khai,” pakhai.
The Seed Company