Ezekiel19
1CHAKRAMANG mih Israel pren kruitown miuüa vüi maiawng kowpe tek ang kar meng khai:2“En u dow krangsi hawmh dawng kowi krangsima iawng chekhai,aia dow sak lang kraing mih krangsima iawng chekhai.Aia dow krangsila powruüa dawng kowi tawi uowi khai,now nakowi aia dow aia chauüa kowi thumah mawmah khai.3Aia kowh chah lowk mih dow uang awr iuk khai,now akürma mih krangsila iawng uang phaw khai.Aia dow chak mak ün tasang khai,maru nga paw uown cha khai bowt.4Akeng prenchakuüa dow aia lawnguan kowi ta khai bowt,now aia dow akeng prenchakuüa kuam kowi dowh khai bowt.Aia kowi dow maru phawk pe napha khai bowt,now Aigupta pren kowi dow maru pawla khai bowt.5“‘Nami nauang plan kown mih kowi a-u chawngah chowdiah.Nachenganchepaw sakowmra mih alenma chur khai.Naiawng rakowi alowk mih chah kowi kutplan thum khai,nami kowi paw akürma kutplan thawpah khai iawk.6Nami dow akeng mih krangsi hawmh hown cham tawi taiua khai,now krangsila akürma mih dow uang chowng khai iawk.Nami paw chak mak ün tasang khai iawk,now nami paw uown cha maru nga khai iawk.7Aia dow amatni kowh kangchawngra kim akhawtma mih krawi piakta khai,amatni kowh marow maten paw piakta nak khai.Aia kowh hek klow dow paprenma ta bowk chekhai;aia hek klow kowi dow maru maten kram bowk chekhai.8Nami khin khe aia riaret re-e kowh chenchapuüa dow aia tut-e uang khai,aia kowi nauang kingküaah kownkow akeng chenchapuüa dow uang mih chekhai.Akeng chenchapuüa dow aia vüi kowi thang pe powk khai,now aia dow nami powk thangia kowi kowtaia khai.9Aia kowi paw phawk pe napha now lawngha pawm kowi klungah khai,now Babulawn pren mang tut-e maru kowpawla khai.Aia kowi dow maru klungta hüah khai,Israel pren kowi kowh hungh kowi aia hek klow dow ta dowi bowt chekhai.10“‘En u dow tui ria kowi kowh chowkah mih grep ruih iawng chowdiah,ka tui reng rakowi aia kowh dow amia hai auih achakma chowdiah.11Aia kowh amia ün dow akhawtma chowdiah,naiawngün dow nachangla mang raitua kown mih tataing chowdiah.Nami singh dow alowng krang kuang kowi tawk mih iawng chekhai.Naiawng rakowi amia hai aram chakma mih aiachow maru khi pe khai.12Tawkchedow CHAKRAMANG kunmaraura hown aia kowi dow chawita khai,aia kowi dow krawng kowi kuakta hüah khai.Adenma mih satlawt li uang hutah hanow aia dow keu khai,aia kowh uih paw keu now prua bowk chekhai.Aia kowh amia akhawtma mih ün taklowk now keu khai,now nami amia keu kowi dow maih kamah khai.13Kawmat dow aia kowi süngrüp süngkangma kowi chowkah khai bowt;tui uowi dowi mih krawng, akeuma mih pren kowi chowkah khai bowt.14Aia kowh amia prek hownia dow maih krawi tauet khai,aia kowh auih ün dow kam khai bowt.Aia kowh dow akhawtma mih amia uowi dowi bowt chekhai,nachangla mang raitua kown tataing mih mia uowi dowi bowt chekhai,’ pape dit.“Mami dow kar meng chekhai. Naiawng rakowi taprüa tanguk khe kowh tawngah kengah kown mih meng chekhai,” pakhai.
The Seed Company