Ezekiel1
1Süngkawm ning nga tali la tanga ni khe cham takhang miuüa hown Kebar aw pang kowi ang tawi uowi khai. Nami khin khe mukuang dow uang tauow khai, now Thurai hownia kowh mukmang dow ang khi khai.2Nami ang khi mih dow mang Jehoiakin cham takhang mih tanga ning khe chekhai.3Ang dow uamow Buzi kowh chapa uamow Ezekiel chekhai. Babulawn pren kowi kowh Kebar aw pang kowi CHAKRAMANG laiklow dow ang tut-e uang ting khai, now CHAKRAMANG kür dow ang luk kowi uang uowi khai.4Ang tang mü hanow tawngphak hownia kowh liku uangchak uang mih dow ang khi khai. Uangnim akraingma mih kowi maih dow pla nowi iawng nowi khai, now ariaret kowi dow anowima tavir lut chekhai. Nami maih nowi dawnglang kowi dow lawngha nowi iawng tawk pluplup chekhai.5Nakowi dow kaurawng uaramchak iawng tawng chünchü uang tatüng tali klüng khai. Amatni powm dow lusa maru iawng chekhai.6Tawkchedow amatni bowkbowk kowh dow lumowr uowi tali klüng chi chekhai, now alap paw uowi tali klüng chi chekhai.7Amatni kowh klowng dow atengma chekhai, now amatni kowh khawkpha dow chia chah kowh keh iawng chekhai. Naiawngün dow sawkah sauah mih kri iawng dow tawk pluplup chekhai.8Amatni kowh alap tali klüng mih dak kowi dow lusa maru kowh rut iawng arut uowi tali klüng chi chekhai. Amatni kowh dow lumowr hai alap paw uowi bowk chekhai.9Amatni kowh alap pre buk chi mih dow akeng mih pre ia kowh lap kowi takak khai. Amatni bowkbowk dow atengma mang büah khai. Amatni mang mih khin khe ahawmsang taiua mang khai, now miapaw akeng prakowi ngeu büah dowi chekhai.10Amatni kowh powm dow maiawng: amatni bowkbowk kowi pur prakowi lusa maru lumowr iawng lumowr uowi lowk chi chekhai, now hawmlawm prakowi dow krangsi lumowr iawng chekhai, lakuai prakowi dow chiala lumowr iawng chekhai, now kung prakowi dow uamu lumowr iawng mih lumowr paw uowi lowk chi chekhai.11Amatni kowh lap pre buk chi mih dow aluk prakowi iangah hanow akeng mih pre ia kowh lap kowi takak khai. Now amatni kowh akeng mih lap pre buk chi mih dow phumla amatni kowh buk büah khai.12Amatni kowh lümla tawng pra chow nau napra kowi cham kowi büah khai. Amatni mang mih khin khe ahawmsang taiua mang khai, now miapaw akeng prakowi ngeu büah dowi chekhai.13Naiawngün kaurawng uaramchak hawmh dow mairing hai maitawng powm iawng chekhai. Amatni pungmadawng kowi dow maih mih pla nowi iawng uang lai powt lai chekhai.14Nami kaurawng uaramchak hawmh dow pla nowi khe kowh iawng dow uang lai powt lai chekhai.15Nami kaurawng uaramchak hawmh prakowi dow ang tang mü hanow tali klüng mih kaurawng uaramchak ria towng krawng kowi lawngkua khawk uowi lowk chi mih dow ang khi khai.16Nami lawngkua khawk maten dow apowmsang chekhai. Nami lawngkua khawk powm dow asung khakma mih hua iawng tawk pluplup chekhai. Nami lawngkua khawk tali klüng mih kowi dow akhawk lak kowi akhawk kutplan uowi lowk chi tak chekhai.17Nami lawngkua khawk lün mih khin khe dow nami kaurawng uaramchak hawmh mih amatni nau prakowi atengma lün büah khai. Amatni lün mih khin khe akeng prakowi taplang büah dowi chekhai.18Nami lawngkua khawk dow lainowmma iuk khai, now kramra paw lainowmma uowi chekhai. Nami lawngkua khawk tali klüng mih kowi dow mik tapat lut uowi khai.19Nami kaurawng uaramchak hawmh mang mih khin khe amatni ria kowi kowh lawngkua khawk maten paw tawi taui khai. Kaurawng uaramchak hawmh che krawng hownia aluk prakowi awr tatowng hanow lawngkua khawk paw tawi tatowng khai.20Kaurawng uaramchak hawmh kowh lümla mih aia nau prakowi cham kowi mih khin khe nami lawngkua khawk paw tawi khai. Tawngplawng kowchow panow nami kaurawng uaramchak hawmh kowh lümla dow nami lawngkua khawk lak kowi uowi mih chekhai.21Kaurawng uaramchak hawmh che mang now lawngkua khawk paw tawi mang khai. Kaurawng uaramchak hawmh che tanai now nami lawngkua khawk paw tawi tanai khai. Now kaurawng uaramchak hawmh che krawng hownia awr tatowng hanow awr tatowng hown akrowksang nami lawngkua khawk paw tawi tatowng khai. Tawngplawng kowchow panow nami kaurawng uaramchak hawmh kowh lümla dow nami lawngkua khawk lak kowi uowi mih chekhai.22Nami kaurawng uaramchak hawmh luk kowi dow matawng chünchü tabe mih uowi lowk. Nami dow nimrua iawng tawk pliplip chekhai, now lainowmma kramra paw uowi chekhai.23Nami dak kowi dow amatni kowh lap mih phatah büah khai, now lowk ia kowh lap dow alowk mih kowh lap kowi takak khai. Akeng mih lap pre buk chi mih hown dow phumla buk büah khai.24Kaurawng uaramchak hawmh mang now amatni kowh lap tün ang ta khai. Nami lap tün dow tui lawt khe kowh tui hawr tün iawng, lang kri lang kraing mih kowh kraw tün iawng, now siphaiuüa kowh hek klow iawng chekhai. Amatni iowng mih khin khe dow amatni kowh lap mih kawpta büah khai.25Kawpta lap now amatni iowng mih khin khe dow amatni luk kowi kowh uowi rah hownia maru lowk ia klow ang ta khai.26Nakowi dow asung khakma mih hua hown kowh thawpah mih mang chowm rah ang khi lowk. Nami alowngma kowi kowh uowi mih mang chowm rah luk kowi dow lusa maru powm iawng uowi lowk ia chekhai.27Now nami dow kelang hownia aluk prakowi tawk pluplup mih kri iawng dow ang khi khai. Nami dow maih kangowh mih iawng chekhai. Now kelang hownia adak pra dow maih powm iawng chekhai; aia riaret kowi dow anowi tavir lut chekhai.28Uang ni khe kowh uangnim kowi tummapia iawng dow aia riaret kowi nami anowi dow uang tatüng khai. Nami dow CHAKRAMANG kraingra powm iawng chekhai. Nami ang khi hanow krawng kowi ang tabawk krawm khai, now maru lowk ia klang ang mih powm iawng ang ta khai.
The Seed Company