Uown Lawt5
Faraw tut-e Mosi hai Arawn iüah kowkowi mih
1Nami kung kowi dow Mosi hai Arawn iüah mih Faraw tut-e kowkowiah now tek pe mih, “Israeluüa kowh CHAKRAMANG Thurai tek mih, ‘Süngrüp süngkangma kowi kowkowiah now ang vüi nauang chang phuchua pawi kownkow ang maru-uüa kowi pe kowiah diah,’ padow natek en kownkow tek angching khai,” pape khai.2Nachenganchepaw Faraw tek pe mih, “Mia chow nami CHAKRAMANG? Tawngplawng kowchow aia ana chün hanow Israeluüa kowi ang nape kowiah kown? Nami CHAKRAMANG kowi paw ang tuk dowi, now Israeluüa kowi paw ang nape kowiah kown nadowi,” pakhai.3Nami khin khe Mosi hai Arawn iüah tek pe mih, “Hebraiuüa kowh Thurai mih anging tut-e uang tatüng khai. Naiawng rakowi süngrüp süngkangma kowi sum ni mang rawng kowkowiah hanow anging kowh CHAKRAMANG Thurai vüi tawncher hown nachang phuchua kownkow sakrauma hown pe kowi anging diah. Naiawng nadowi hanow makowng hawi hai tasenra hown aia mih narip anging kown chekhai,” pabüah khai.4Now Aigupta mang tek pe mih, “Mosi hai Arawn, tawngplawng kowchow maru-uüa kowi enchi tuk piakta pe lup chang sak khai? Tarü, kowchang lup büah.5Mü madiah, pren kowi enni kowh maru iun lainowmma uang hu khai bowt. Maru kawmuüa taingta lup chang mih dow enchi rakowi chekhai,” pape khai.6Nami ni khe Faraw mih naruüa luk kowi nachang nowng kownkow aia towah mih Aigupta aluchowuüa hai Israeluüa hownia kowh kruitown miuüa kowi peah ana khai.7Faraw tek pe mih, “Nathawpla ipbawn kownkow maru-uüa kowi enni napeah chahau kown nadowi bowt. Amatni vüi chahau dow amatni matia pacham krawi tawnla towbowt.8Nachenganchepaw alai kowh amatni rik thawp khowt chi kawmat paw amatni kowi enni nape thawpah ipbawn kown takla; lowkchow paw iut dowi iawng enni nape thawpah kown. Thurai vüi kowi tawncher hown cham chang phuchua kown pahai amatni tek mih dow silik lup chang kowh chekhai.9Dai lai prakowi pe ching dowi kownkow lup chang hown pe pusaah diah. Amatni kowi nami lak-e lang krat mih lup pe changah büah küng diah,” pape khai.10Nami khin khe naruüa kowi nachangah nowng kown mih Aigupta aluchowuüa hai Israeluüa hownia kowh kruitown miuüa dow prang kowi lawt hanow maru kawmuüa kowi tek pe mih, “Faraw tek aia nape enni chahau kown nadowi bowt pe.11Enni cham ka rah hownia chahau mih enni nacham tawn bowt kown. Tawkchedow enni kowh lup mih ditchow paw naiut enni kown nadowi,” pape khai.12Naiawng rakowi Israeluüa dow chahau takcha nacham tawn chathang kownkow Aigupta pren paprenma kowi cham krawi tauet khai bowt.13Nami aluchowuüa dow maru kawmuüa kowi krowkah se tek pe mih, “Pe enni chahau khe kowh ni towng enni ia thawp ipbawn khowt chi kawmat paw enni nathawp kown takla,” pape khai.14Now akat khe dow Faraw kowh aluchowuüa mih amatni towah mih Israeluüa hownia kowh kruitown miuüa kowi bawpah tepah se tek pe mih, “Enni rik thawp khe kowh ni towng enni ia thawp khowt chi tawngplawng kowchow enni thawp ipbawn dowi? Ani paw enni thawp dowi, now mani paw enni thawp dowi,” pakhai.15Naiawng rakowi Israeluüa hownia kowh kruitown miuüa dow Faraw tut-e kowkowiah now tabawk krawm se atünma tek pe mih, “En kowh naruüa hown tawngplawng kowchow naiawng en tuk chang khai?16Chahau dow pe anging dowi kowi en kowh aluchowuüa pe thawp anging ipbawn khai. En kowh naruüa kowi bawpah tepah mih sam mü madiah; tawkche atawi dow en maru-uüa kowh chowtaih,” pakhai.17Faraw klangah mih, “Enni dow silikma, tawng lup paw chang kown enni nau dowi. Naiawng rakowi enni tek mih, ‘CHAKRAMANG vüi nakowchang tawncher phuchua kownkow pe kowi anging diah,’ pakhai.18Tarü, kowchang lup büah. Nape enni chahau kown nadowi. Tawkchedow enni nathawp kown mih laiklow uowi mowr chi enni nathawp ipbawn reng kown takla,” pape khai.19Nami khin khe Israeluüa hownia kowh kruitown miuüa dow kla phih mih chowbowt lowmow pami tatuk büah khai. Tawngplawng kowchow panow amatni dow rik thawp ipbawn khe kowh khowt chi kawmat paw ipbawn thawp takla khai.20Amatni dow Faraw pur hownia uang lawt hanow Mosi hai Arawn iüah hown uang takrum khai. Mosi hai Arawn iüah dow amatni kowi hawt chawngah mih chekhai.21Nakhowk khe Mosi hai Arawn iüah kowi Israeluüa hownia kowh kruitown miuüa tek pe mih, “CHAKRAMANG pacham pe enchi ripra lah. Enchi rakowi Faraw hai aia kowh maru iukuüa kawmat sui anging khai bowt. Naiawng hai nasai anging kownkow kowbüah rut kowi saidawng enchi ap pe khai,” pakhai.22Kowplan hanow CHAKRAMANG kowi Mosi tek pe mih, “Aw CHAKRAMANG, tawngplawng kowchow mami chenchap kowi en tuk towkah ngare khai? Tawngplawng kowchow ang kowi en uang tuk chin ang khai?23En ming hown Faraw tut-e ki tek lai hownia mami maru-uüa luk kowi phih uang kla khai. Tawng kowi chow en maru-uüa kowi en lawngah mih?” pakhai.The Seed Company