Uown Lawt39
Uamow lang kri mih kowh tawnguat
1Uanh thawp sarauüa dow taklowp taklangra te kowi chang lup khe kowh nakhupah kown mih tawnguat maten aruama mih la, arikma mih la hai aringma mih la hown kawngah büah khai. Mosi kowi kowh CHAKRAMANG peah ana mih powm iawng amatni dow Arawn vüi uamow lup chang müa chimsaima mih tawnguat thawp pe khai.2Ephawd kowrmow dow kuh, aruama süah mih ruapur pawi, arikma süah mih ruapur pawi hai adipükchow mih la hown uan sown sarauüa thawpah khai.3Amatni dow kuh sawnah now apachow changah khai. Now aruama süah mih ruapur pawi, arikma süah mih ruapur pawi hai adipükchow mih la hown akat sang naia tawngah kownkow nami kuh dow lasin iawng asinchow kepah büah khai. Naiawngün dow uan sown sarauüa kowh lup chekhai.4Ephawd kowrmow dow pur prakowi kowh uan nga hown kung prakowi kowh uan nga chawpah kownkow pangkawt re-e mapra lowk paipra lowk chi chawp pe aleng büah khai.5Nami ephawd kowrmow kowi kowh kekawm paw ephawd kowrmow powm iawng thawpah büah khai. Nami kekawm paw kuh hai aruama süah mih ruapur pawi, arikma süah mih ruapur pawi, aringma süah mih ruapur pawi, adipükchow mih la hown sarauüa kawngah khai. Amatni dow Mosi kowi kowh CHAKRAMANG peah ana mih powmpowm thawpah khai.6Nami kung kowi amatni dow kuh apherklepchow mih luk kowi “oniks” hua dan pe pre buk büah khai. Nami hua kowi dow thawp mur khe kowh iawng Israel kowh chapauüa ming rui pe büah khai, now ephawd kowrmow kowi kowh pangkawt kowi kowh leng hown chawpah büah khai. Nami hua pre buk dan pe mih dow Israeluüa kowi CHAKRAMANG napela ching kownkow chekhai. Amatni dow Mosi kowi kowh CHAKRAMANG peah ana mih powmpowm thawpah khai.8Nami kung kowi amatni dow thawp owngphowr im khai. Nami dow uanh thawp sarauüa kowh lup chekhai. Owngphowr im paw ephawd kowrmow iawng dow kuh, aruama süah mih ruapur pawi, arikma süah mih ruapur pawi, aringma süah mih ruapur pawi hai adipükchow mih la hown thawpah büah khai.9Nami owngphowr im dow aklang hai aphia pakar chi thawpah büah khai. Nami dow uan pathowrchow mih hown klepah now tali tingnuichow changah khai.10Nami owngphowr im luk kowi dow dan pe asung khakma mih hua tali tan khai. Rik khüa mih tan kowi dow “Sardius” hua, “Topaz” hua hai “Karbun” hua dan pe khai.11Pre tan mih kowi dow “Emeral” hua, “Safir” hua hai “Daimawn” hua dan pe khai.12Sum tan mih kowi dow “Ligure” hua, “Agate” hua hai “Amethis” hua dan pe khai.13Achur tan kowi dow “Beril” hua, “Oniks” hua hai “Jasper” hua dan pe khai. Naiawngün hua dow kuh apherklepchow mih luk kowi danah büah khai.14Israel kowh chapa laipre ia vüi dan pe hua büah laipre buk chekhai. Naiawngün hua towng kowi dow Israel kowh chapauüa ming rui pe lowk chi büah khai. Naiawngün dow thawp mur khe iawng thawpah büah khai.15Amatni dow nami owngphowr im vüi kuh achangma mih hown thawp pe kuh leng pre buk khai.16Now amatni dow kuh apherklepchow mih thawpah pre buk khai, now kuh hown kowh akli paw thawpla pe pre buk khai. Nami akli pre buk mih dow owngphowr im aluk pra kowh nui kowi mapra lowk paipra lowk chawpah büah khai.17Nami kuh leng pre buk mih dow nami akli pre buk mih kowi khuowkah büah khai.18Kuh leng akeng pra kowh towr dow ephawd kowrmow pangkawt kowi kowh leng luk kowi kuh apherklepchow mih kowi khuowkah büah khai.19Nami klen kowi paw kuh hown thawp pe akli pre buk hanow owngphowr im adak pra kowh nui kowi mapra lowk paipra lowk chawpah büah khai.20Nami klen kowi paw kuh hown kowh akli plan thawp pe pre buk khai, now nami akli pre buk mih dow ephawd kowrmow pangkawt kowi kowh leng hown tatawng klowk re-e kekawm lukchow kowi chawpah büah khai.21Nahanow owngphowr im adak pra kowh akli hown kekawm lukchow kowi kowh akli dow aruama mih leng hown khuowkah büah khai, now owngphowr im dow ephawd kowrmow hownia tasüt dowi bowt chekhai. Amatni dow Mosi kowi kowh CHAKRAMANG peah ana mih powmpowm thawpah khai.22Ephawd kowrmow lak pra kowh khupah kown mih kowrmow athawngma mih dow aruama mih la hown kangowh thawpah büah khai.23Nami kowrmow aluk pra dow lu krua müa akuangma tow pe büah arah khai. Nami akuang uer dow natathek naklak dowi kownkow tapat lut asipma krawi sownah büah khai.24Now aruama mih la, arikma mih la hai aringma mih la hown dalim uih iawng thawp pe powtuh hanow nami kowrmow adak pra kowh uer kowi tapat lut krawi tan pe khai.25Now kuh achangma mih hown thawp pe ro büah hanow nami powtuh hown kriaah seklek se krawi tanah büah khai.26Uamow chang lup khe kowh nakhupah kown mih kowrmow kowi dow adak pra kowh auer tapat lut powtuh lowk ro lowk chi takria seklek tanah büah khai. Amatni dow Mosi kowi kowh CHAKRAMANG peah ana mih powmpowm thawpah khai.27Amatni dow Arawn hai achapauüa vüi aruama mih kowrmow krüa kowi nakhupah kown mih kowrmow bawngthawng athawngma mih adipükchow mih la hown kawng pe khai.28Now napawng hai lukruk paw adipükchow mih la hown kawng pe büah khai. Kraksa dawngh dow iawngpa mih la hown thawpah büah khai.29Kekawm dow adipükchow mih la, aruama mih la, arikma mih la hai aringma mih la hown kawngah büah hanow sawt pe bawng büah khai. Amatni dow Mosi kowi kowh CHAKRAMANG peah ana mih powmpowm thawpah khai.30Nami kung kowi dow chimsaima mih lukruk kowi kowh vüi kuh achangma mih hown apherklepchow sawnah büah lowk khai. Nami apherklepchow mih kuh kowi dow “CHAKRAMANG VÜI CHIMSAIMA” pami laiklow mur kowi kowh ruiah iawng ruiah büah khai.31Nami kuh apherklepchow mih dow napawng pur prakowi towah now aruama mih leng hown tapah büah khai. Amatni dow Mosi kowi kowh CHAKRAMANG peah ana mih powmpowm thawpah khai.32Now taklowp taklangra te kowi kowh uanh maten dow ki thawpta büah khai bowt. Amatni dow Mosi kowi kowh CHAKRAMANG peah ana mih powmpowm thawpah khai.33Amatni dow taklowp taklangra te vüi kowi kowh thawpah mih uanh maten Mosi tut-e kowpawla khai. Naiawngün dow taklowp taklangra te hai nakowi kowh natawngah kown mih auowk rah ün, aping müa phen ün, akep müa lawng ün, achüng ün, akhawk rup rah ün,34aringma süah mih ruapurla pik hai chak pik aiungma mih hown kowh akhup müa, Lang Chimsai mih Arah tung müa uaniang,35akawtlawng hailawm mih sangbowk laitawm tawkpla hai angak khu müa sangbowk laitawm tawkpla küm ün chekhai.36Nami klen kowi pawitang hai nakowi kowh tawngkengah kown mih uanh ün, CHAKRAMANG pur kowi kowh towah mih kawm,37maibu hailawm kuh achangma mih hown kowh thawpah mih maibu towng, maibu towng kowi kowh uanh ün, maibu towk müa sau,38kuh hown kowh thawpah mih phuchuara, nümnap müa sau, anam iungma mih maikhük towk müa than, taklowp taklangra te plawt kowi kowh iangah kown mih uaniang,39kri hown kowh thawpah mih phuchuara hai nakowi kowh towah kown mih lawkrachow, phuchuara kawtlawng, phuchuara kowi kowh puh bia aikam, biatum hai biatum chowm müa,40viadawng ping müa chüng ün, achüng vüi akhawk rup rah ün, viadawng ping müa uaniang, viadawng ping kowi kowh aplawt kowi iangah kown mih uaniang, viadawng uaniang tük müa chung hai aleng ün, taklowp taklangra te kowi kowh tawngah kown mih uanh srui uang pawla büah khai.41Now uamow Arawn vüi taklowp taklangra te kowi kowh lup chang müa chimsaima mih tawnguat sown pe büah khai, now achapauüa vüi paw uamow iawng nachangla lup kown mih tawnguat sown pe büah khai.42Amatni dow Mosi kowi kowh CHAKRAMANG peah ana mih powmpowm thawpah khai.43Now Mosi dow Israeluüa kowh lup khi hanow CHAKRAMANG peah ana khe kowh iawng chang büah bowk khowk pami hawt tuk khai. Naiawng rakowi aia dow Israeluüa kowi peah prasi khai.The Seed Company