Uown Lawt38
Tikah mih uanap chang müa phuchuara hai biatum
1Bezalel dow ri singh hown thawp tikah mih uanap chang müa phuchuara lowk khai. Nami phuchuara dow anui uowi tali nui chekhai. Areng klang hai adowng phia dow tanga muk chi aia thawpah khai, now akro dow sum muk aia thawpah khai.2Phuchuara aluk prakowi dow anui towng anang iawng achemchow hui pe lowk chi khai. Naiawngün anang tali klüng mih dow phuchuara hown panga sang sawnah khai.3Now phuchuara hailawm naiawngün bowkbowk dow kri hown klaiah khai. Aia dow phuchuara kowi kowh plawi kuak müa puh, phuchuara kowi kowh mawngchawng khur müa uaibak, tawncher vi towk müa biatum, chaknga khowng müa chuk hai mairing pawk müa puh ün thawpah khai. Naiawngün bowkbowk dow kri hown aia thawpah mih chekhai.4Now lawkrachow paw kri hown aia thawpla lowk khai. Nami lawkrachow dow phuchuara uen dakchow kowi towah khai. Nahanow nami lawkrachow dow phuchuara dawnglang mowr awr uowi khai.5Aia dow akawtlawng sowr müa nami lawkrachow nui towng kowi chawp pe akli lowk chi khai. Naiawngün akli dow kri hown aia thawpah khai.6Now aia dow ri singh hown thawp akawtlawng pre buk, now nami akawtlawng pre buk mih dow kri hown aia klaiah khai.7Nami akawtlawng pre buk mih dow akli kowi mapra dam lowk, paipra dam lowk sowrah khai. Nami akawtlawng hown phuchuara dow cham kawtla reng chekhai. Nami phuchuara dow phen hown thawpah khai, now nami lak kowi dow akuangma towah khai.8Now biatum hai biatum chowm müa dow kri hown aia thawpah khai. Naiawngün kri dow taklowp taklangra te plawt kowi uang chang lup mih masiuüa hawmh uang pawla mih kri nimrua hownia kowh chekhai.Taklowp taklangra te re-e kowh viadawng
9Nami kung kowi Bezalel mih taklowp taklangra te tavir lut krawi pingah hanow thawp viadawng khai. Nami viadawng mrawkphak prakowi dow akawm muk mowr pingah khai. Nami aping vüi dow adipükchow mih la hown kowh uaniang tawngah khai.10Naiawngün uaniang iang müa dow tow pe kri chüng pirmi chüng khai. Nami achüng vüi dow akhawk rup rah kri hown thawp pe pirmi klüng khai. Now uaniang iang müa dow lawngha iang hai tai hown kowh thawpah mih auowk rah achüng kowi chawpah khai.11Tawngphak prakowi paw nami iawng rowprowp aia changah khai.12Satkup prakowi kowh 50 muk mowr mih aping müa paw thawp pe uaniang sangrum khai. Naiawngün uaniang iang müa paw thawp pe achüng hamüt klüng khai, now nami achüng vüi paw akhawk rup rah kri hown thawp pe hamüt klüng khai. Now uaniang iang müa lawngha iang hai tai hown kowh thawpah mih lawngha iang krua müa akli dow achüng kowi chawpah khai.13Satlawt prakowi paw 50 muk mowr uaniang hown pingah khai.14Nami prakowi dow tow pe aplawt khai. Aplawt hawmlawm pra hai lakuai prakowi dow laitanga muk chi uaniang hown pingah khai. Nami uaniang iang müa paw thawp pe achüng sum buk chi, now nami achüng vüi paw akhawk rup rah kri hown thawp pe sum buk chi khai.16Viadawng tavir lut mih kowi kowh aping müa uaniang maten dow adipükchow mih la hown kowh thawpah mih chekhai.17Viadawng tapat lut mih achüng maten dow tai hown kowh thawpah mih lawngha iang hown chawp pe bowk khai. Achüng luk kowi dow tai hown kowh thawpah mih auowk rah chawp pe khai. Now achüng kowi kowh akhawk vüi akhawk rup rah dow kri hown thawpah khai.18Aia dow nami viadawng plawt vüi paw thawp pe uaniang lowk. Nami uaniang kowi dow aruama süah mih ruapur pawi, arikma süah mih ruapur pawi, aringma süah mih ruapur pawi hai adipükchow mih la hown sawt pe bawng khai. Nami uaniang paw aphia dow tanga muk, now aklang dow pirmi muk chekhai.19Nami uaniang iang müa paw thawp pe achüng tali klüng, now nami achüng vüi paw akhawk rup rah kri hown thawp pe tali klüng khai. Now achüng kowi kowh chawp müa akli hai lawngha iang dow tai hown thawpah khai. Achüng lu kowi paw tai hown klaiah khai.20Taklowp taklangra te hai viadawng kowi kowh uaniang tük müa chung ün dow kri hown thawpah khai.Thawpla taklowp taklangra te mih uanh ingsap
21Mami dow thawp taklowp taklangra te khe kowh tawngah kengah mih uanh ingsap chekhai. Mosi ana pek iawng Leviuüa dow naiawngün uanh ingsap auown hownia ruiah khai. Naiawngün maru-uüa luk kowi kowh chang alow mih dow uamow Arawn kowh chapa Ithamar chekhai.22Mosi kowi kowh CHAKRAMANG peah ana iawng Juda krungchak Uri kowh chapa Bezalel dow thawpah bowk khai. Bezalel dow Hur kowh chu chekhai.23Bezalel kowi kowh tawi khowngah mih dow Dan krungchak Ahisamak kowh chapa Oholiab chekhai. Oholiab dow uanh thawp hai bawng thawp akiakma chekhai. Nami klen kowi paw aruama süah mih ruapur pawi, arikma süah mih ruapur pawi, aringma süah mih ruapur pawi hai adipükchow mih la hown bawng sawt paw atukma chekhai.24Taklowp taklangra te thawp müa kowi kowh uang pe mih kuh dow 30 set ngia chekhai. Naiawngün kuh dow arah chimsaima mih kowi kowh akhai müa hown khaiah mih chekhai.25Israeluüa rüa maru iun khe kowh amatni hownia kowh kaah mih tai dow 3,017 set hown 750 gram chekhai; lowk ia kowi pe mih dow tai 5 gram chi chekhai. Nami dow arah chimsaima mih kowi kowh akhai müa hown khaiah mih chekhai. Israeluüa pungmadawng kowi kowh rüaah mih maru iun mut dow 603,550 ia chekhai. Naiawngün maru-uüa dow pirmi ning chih mih hownia nami luk kowi kowh kangowh.27Naiawngün tai hownia 3,400 set mih dow taklowp taklangra te hai naiangla uaniang kown mih achüng vüi akhawk rup rah thawpla khai. Naiawngün akhawk rup rah kowi dow pakhawk kowi tai 34 set chi kowi khai; naiawng hai achüng vüi akhawk rup rah dow thawpah akawm khai.28Tai ta lat 20 set mih hown dow achüng kowi kowh chawp müa akli, achüng lu kowi kowh klai müa hai uaniang iang müa lawngha iang ün kowi tawngah khai.29Taklowp taklangra te thawp müa kowi kowh uang pe mih kri dow 2,400 set ngia chekhai.30Naiawngün kri hown dow taklowp taklangra te plawt kowi kowh achüng vüi akhawk rup rah ün, phuchuara hai lawkrachow, puh bia aikam ün,31viadawng ping tavir lut mih kowi kowh achüng vüi akhawk rup rah ün, aplawt kowi kowh achüng vüi akhawk rup rah ün, taklowp taklangra te hai viadawng ping tavir lut mih kowi kowh uaniang tük müa chung ün thawpla khai.The Seed Company