Uown Lawt37
1Bezalel dow ri singh hown thawp sangbowk laitawm tawkpla khai bowt. Nami dow areng klang pre muk hown dawnglang, now adowng phia hai akro amuk hown dawnglang aia thawpah khai.2Alak hai prang kowi dow kuh achangma mih hown aia sowah khai, now auenh tapat lut mih kowi dow kuh hown thawp pe bawng khai.3Kuh hown thawp pe akli tali klüng hanow akhawk tali klüng mih kowi chawpah khai. Nami akli dow mapra dam pre buk, now paipra dam pre buk chawpah khai.4Now ri singh hown hui pe akawtlawng pre buk khai. Nami akawtlawng kowi paw klai pe kuh khai.5Nami akawtlawng pre buk mih dow nakawtla sangbowk laitawm tawkpla kownkow akli kowi sowrah khai.6Nami kung kowi dow Bezalel mih kuh achangma mih hown thawp sangbowk laitawm tawkpla küm lowk khai. Nami dow angak khu müa sangbowk laitawm tawkpla küm chekhai. Nami aküm dow areng klang pre muk hown dawnglang, now adowng phia amuk hown dawnglang aia thawpah khai.7Nami sangbowk laitawm tawkpla küm adowng pra ret kowi kowh kuh dow sawnah now cherup rup thawpla pre buk khai.8Nami cherup rup pre buk mih dow sangbowk laitawm tawkpla küm mapra downg hownia lowk, paipra downg hownia lowk aia thawpah khai.9Cherup pre buk trui kowh lap dow sangbowk laitawm tawkpla küm luk kowi iangah khai. Cherup pre buk mih dow tatingtang klowk towah khai, now amatchi kowh lumowr dow sangbowk laitawm tawkpla küm prakowi dangah khai.10Now Bezalel dow ri singh hown thawp pawitang lowk khai. Nami pawitang dow areng klang pre muk, adowng phia amuk, now akro dow amuk hown dawnglang aia thawpah khai.11Nami pawitang dow achangma mih kuh hown aia klaiah khai, now auenh tapat lut mih kowi dow kuh hown aia thawp pe bawng khai.12Nami pawitang adak pra kowh aret dow tapat lut apawk ngia aia thawp pe aping khai. Nami aping kowi paw kuh hown aia thawp pe bawng khai.13Now pawitang nui towng kowi akhawk luk kowi akawtlawng sowr müa akli paw aia chawpla pe lowk chi khai. Nami akli dow kuh hown aia thawpah mih chekhai.14Naiawngün akli dow pawitang dak kowi kowh aping dakchow re-e chawpah khai. Nami akli dow sowr pe akawtlawng hanow nacham kawtla reng kownkow nami re-e chawpah mih chekhai.15Aia dow pawitang kawt müa akawtlawng pre buk mih ri singh huiah hanow kuh hown klaiah khai.16Now khamah mih uanap kowi tawngah kownkow pawitang luk kowi towah kown mih lawngpan ün, bia ün, biatum ün, tuikawng ün paw kuh achangma mih hown aia thawpla khai.17Now Bezalel dow achangma mih kuh hown thawp maibu towngh lowk khai. Nami maibu towngh kowi dow achowm müa hai achüng, bia hai pau khawm aia thawp pe khai. Naiawngün dow pakluchow mih kuh hown sawnah now aia thawpah khai.18Nami maibu towngh kowi kowh achüng kowi dow mapra sum buk, paipra sum buk chi bowkbowk kowi thawp pe amia prek taruk klüng khai.19Amia prek towng madam pau iawng mih bia dow pau hai akhawm hailawm aia thawp pe sum buk chi khai. Maibu towngh kowi kowh amia prek taruk klüng mih dow apowmsang aia thawpah khai.20Maibu towngh kowi kowh achüng kowi paw amia prek kowi kowh iawng dow aia thawp pe bia khai. Nachenganchepaw achüng kowi dow aia thawp pe tali klüng khai.21Maibu towngh chüng kowi kowh amia prek uowi taruk klüng mih kowi paw amiakrum towng amiakrum dakchow kowi apau hai akhawm thawpla pe khai.22Apau, akhawm, amia prek maten hai achüng dow kuh achangma mih pakluchow hown sawnah now thawpah mih chekhai.23Kuh achangma mih hown maibu ranit klüng, bawthi kep müa kaingkep hai maidim towk rah lawngpan ün paw thawpla ne khai.24Maibu towngh hailawm naiawngün uanh maten thawpla mih dow bowkbowk kowi kuh achangma mih 30 set ngia chekhai.25Now Bezalel dow ri singh hown thawp maikhük towk müa phuchuara lowk khai. Nami phuchuara dow tali tingnui aia thawpah khai. Areng klang hai adowng phia dow amuk chi, now akro dow pre muk aia thawpah khai. Phuchuara aluk prakowi kowh anui towng dow anang iawng achemchow aia sawnah lowk chi khai. Naiawngün anang tali klüng mih dow phuchuara hown panga sang aia sawnah khai.26Nami phuchuara dow anang hailawm aluk hown aping ün kuh achangma mih hown klaiah khai. Now tapat lut mih auenh kowi dow kuh hown thawp pe bawng khai.27Nami phuchuara dow nacham ia kawtla reng kownkow auenh dak kowi anui re-e akawtlawng sowr müa akli mapra dam pre buk paipra dam pre buk chi Bezalel chawp pe khai. Naiawngün akli dow kuh hown aia thawpah khai.28Nami akawtlawng pre buk mih dow ri singh hown thawpah now aia klai pe kuh khai.29Nami klen kowi paingbawng thawp sarauüa thawp paingbawng iawng maikhük towk müa uanh hai nümnap müa sau paw aia thawpla khai.
The Seed Company