Uown Lawt36
1Mosi plan tek mih, “Tawng iawng chow taklowp taklangra te nathawpah kown mih natukla kownkow CHAKRAMANG mih Bezalel, Oholiab hai uanh thawp sarauüa kowi peah prengia hai tukra khai. Tawngplawng kowchow panow naiawngün lup dow CHAKRAMANG ana pek iawng amatni pacham ia chang lah pakowh chekhai,” pakhai.2Now naiawngün lup maten nachang kownkow Mosi mih Bezalel hai Oholiab iüah kowi hawah khai bowt. Nami klen kowi CHAKRAMANG peah tukra mih uanh thawp sarauüa uang tawi chang lup kown sakkrai miuüa kowi paw aia hawla khai.3Now nachangla taklowp taklangra te kownkow Israeluüa uang pawla mih uanh maten nami sarauüa kowi Mosi ap pe khai. Nami kung kowi paw maru kawmuüa mih amatni sak nau iawng rau towng Mosi tut-e uang pawla uanh reng tak chekhai.4Naiawng uang pawla mih khi hanow uanh thawp sarauüa mih amatni kowh lup towla now Mosi tut-e kowkowi khai.5Mosi kowi amatni kowtek pe mih, “CHAKRAMANG ana pek iawng nachangla lup kownkow lakke mih lak-e maru-uüa uang pawla uanh mih marat klen kowi chüt khai bowt,” pakhai.6Nakhowk khe tangbung khup rah kowi uowi miuüa kowi Mosi krawi phuang pe satang mih, “Masiuüa chepaw, kachakuüa chepaw taklowp taklangra te vüi hauang pacham pawla uanh tham bowt lah,” pakhai. Nami satang tata hanow maru-uüa mih tawng uanh paw kowpawla dowi bowt chekhai.7Tawngplawng kowchow panow maru-uüa uang pawla mih uanh dow amatni lakkeah mih lak-e chüt khai bowt.8Nami kung kowi dow uanh thawp sarauüa pungmadawng kowi kowh lang kiak miuüa mih thawp taklowp taklangra te khai bowt. Nami taklowp taklangra te dow adipükchow mih la, aruama süah mih ruapur pawi, arikma süah mih ruapur pawi hai aringma süah mih ruapur pawi hown kowh thawpah mih uan powng hamüt rua hown thawpah büah khai. Naiawngün uan powng kowi dow bawng sawt sarauüa kowi cherupuüa pung pe sawtah khai.9Naiawngün uan powng dow anowksang kawngah büah khai. Nami uan powng dow arua kowi aklang pirmi lairaiat muk, now aphia dow tali muk chi chekhai.10Naiawngün uan powng dow tanga rua chi sownah now changah atheng chi büah khai. Naiawng hai aphiama changah pre theng büah khai.11Nami uan pre theng trui kowi dow adowng pra kowh aret kowi aruama mih lasin hown chawp pe amin 50 klüng chi khai.12Naiawng hai aphiama mih uan pre theng mih kowi dow adowng pra kowh aret kowi chawp pe amin 100 klüng khai. Nami uan pre theng mih kowi kowh chawpah mih amin dow pre pra hownia tungah khai.13Nami kung kowi dow kuh hown thawp pe auowk müa 50 klüng khai. Naiawngün auowk müa dow uan pre theng tatung mih kowi kowh amin kowi uowkah khai. Nahanow nami uan pre theng mih hown dow taklowp taklangra te chowng lowk khai.14Taklowp taklangra te luk khu müa dow rua pawi hown kawng uan powng lailowk rua khai.15Naiawngün uan powng dow anowksang kawngah khai. Nami uan powng dow arua kowi aklang 30 muk chi, now aphia dow tali muk chi chekhai.16Nami uan powng lailowk rua mih hownia pawah tanga rua hanow aphiama sownah atheng khai, now ta lat taruk rua mih hown paw aphiama sownah atheng khai.17Nami uan powng pre theng trui kowi dow adowng pra kowh aret kowi chawp pe amin 50 klüng chi khai.18Nami kung kowi dow kri hown thawp pe auowk müa 50 klüng khai. Naiawngün auowk müa dow aphiama mih uan pre theng mih kowi kowh amin kowi uowkah khai. Nahanow nami uan pre theng mih hown dow taklowp taklangra te khu müa chowng lowk chekhai.19Nami luk kowi paw plan khuah pre lüp khai. Alüp mih dow aringma süah mih ruapurla pik hown, now nami luk kowi dow chak pik aiungma mih hown chekhai.20Now taklowp taklangra te ping müa ri singh hown ngen phen sangrum khai.21Phen maten dow aklang hamüt muk hai aphia amuk hown dawnglang chi chekhai.22Now arup rah kowi rupah kownkow phen maten kowi arup müa akhawk uowi pre buk chi chekhai. Taklowp taklangra te ping müa phen maten dow anowksang ngenah khai.23Mrawkphak prakowi kowh aping müa vüi ngen pe phen pirmi phiah khai.24Naiawngün phen vüi dow akhawk rup rah tai hown thawpah khai. Phen maten vüi akhawk rup rah bowkbowk kowi thawp pe likawm klüng khai.25Nami iawng dow tawngphak prakowi kowh vüi paw ngen pe phen pirmi phiah khai, now naiawngün phen maten vüi paw thawp pe akhawk rup rah likawm rah khai.27Taklowp taklangra te kung pra kowh vüi paw ngen pe phen taruk phiah khai. Nami dow taklowp taklangra te satkup prakowi chekhai.28Taklowp taklangra te kung pra kowh anui pre nui mih vüi paw ngen pe phen pre phiah khai.29Nami phen pre phiah mih dow anui kowi kawpah khai: Adak prakowi dow areng pra kowh phen hai adowng pra kowh phen kowi kawpah khai. Nachenganchepaw aluk prakowi dow auowk müa hown uowkah khai.30Naiawng hai satkup prakowi dow aping müa phen uowi raiat phiah chekhai. Nami phen vüi paw phen dak kowi akhawk rup rah tai hown aphiah kowi pre buk chi bowkbowk kowi laitaruk klüng thawp pe khai.31Now taklowp taklangra te ping kep müa lawng dow ri singh hown thawp pe khai.32Nami akep müa lawng dow mrawkphak pra kowh vüi tanga klüng, tawngphak pra kowh vüi tanga klüng hai satkup pra kowh vüi tanga klüng thawp pe khai.33Naiawngün akep müa lawng dow aluk prakowi pre buk, adak prakowi pre buk kepah khai. Now alowk mih dow dawnglang kowi mami hownia paipra kowi plawn pat sowrah khai.34Naiawngün phen dow kuh hown klaiah khai. Akep müa lawng krua müa akli dow kuh hown thawpah khai, now phen kowi chawpah khai. Naiawngün akep müa lawng paw kuh hown klaiah khai.35Bawng sawt sarauüa dow aruama süah mih ruapur pawi, arikma süah mih ruapur pawi, aringma süah mih ruapur pawi hai adipükchow mih la hown thawp uaniang lowk khai. Nami uaniang kowi dow bawng sawt sarauüa sawt pe cherupuüa pung khai.36Nami uaniang iang müa dow ri singh hown thawp pe achüng tali chüng khai, now naiawngün achüng kowi dow klai pe kuh khai. Nami klen kowi naiawngün achüng kowi dow kuh hown kowh klaiah mih akrua rah paw chawp pe sangrum chi khai, now akhawk rup rah paw tai hown thawp pe tali klüng khai.37Now nami taklowp taklangra te plawt vüi paw sawt pe bawng mih uaniang iawng aruama süah mih ruapur pawi, arikma süah mih ruapur pawi, aringma süah mih ruapur pawi hai adipükchow mih la hown thawp pe uaniang khai.38Nami uaniang iang müa dow thawp pe achüng tanga chüng khai. Now nami achüng kowi dow chawp pe krua rah khai. Now achüng lu hai lawngha iang kowi dow kuh hown sowah khai. Nami achüng vüi paw akhawk rup rah kri hown thawp pe tanga klüng chi khai.
The Seed Company