Uown Lawt25
Taklowp taklangra te vüi uanh pek lawnguan
1CHAKRAMANG tek pe Mosi mih,2“Ang vüi nauang pe uanh kownkow Israeluüa kowi kowtek pe diah. Amatni sak nau hown uang pe mih uanh maten en mih nahawt paw pe kown.3Amatni hownia kowh en nahawt pawah kown mih uanh dow kuh, tai, kri;4aruama süah mih ruapur pawi, arikma süah mih ruapur pawi, aringma süah mih ruapur pawi hai adipükchow mih la; rua pawi;5aringma süah mih ruapurla pik, chak pik aiungma mih; ri singh;6maibu towk müa kanrawn sau; tape arah khe kowh nümnap müa sau nathawpla kownkow nam iungma mih chap hai anam iungma mih maikhük towk müa than di;7uamow lang kri mih kowh ephawd kowrmow kowi hai owngphowr im luk kowi nachawpah kown mih asung khakma mih ‘oniks’ hua hai akeng mih asung khakma mih hua ün chekhai.8“Ang vüi uowi rah chimsaima mih taklowp taklangra te Israeluüa kowi pe thawpah lowk diah. Nahanow enni pungmadawng kowi ang natawi uowi kown towbowt.9Nami taklowp taklangra te hai nami te lak kowi kowh tawngah kengah kown mih uanh maten dow ang natüng en akuh kown mih powm iawng enni nathawp ang kown takla.Sangbowk laitawm tawkpla
10“Ri singh hown enni nathawp sangbowk laitawm tawkpla lowk kown. Nami dow areng klang pre muk hown dawnglang, now adowng phia hown akro dow amuk hown dawnglang chi enni nathawpah kown.11Alak hai prang kowi dow kuh achangma mih hown enni naklaiah kown, now auenh tapat lut mih kowi dow kuh hown enni nathawp pe bawng kown takla.12Kuh hown akualuachow thawp pe akli tali klüng hanow sangbowk laitawm tawkpla tali nui mih kowi nachawpah kown. Nami akli dow mapra dam pre buk, paipra dam pre buk chi nachawpah kown takla.13Now ri singh hown enni nahui pe akawtlawng pre buk kown. Nami akawtlawng kowi paw enni naklai pe kuh kown takla.14Nami akawtlawng pre buk mih dow nakawtla sangbowk laitawm tawkpla kownkow akli kowi enni nasowrah kown.15Nami akawtlawng pre buk mih dow sangbowk laitawm tawkpla kli kowi hing sowrta hüah kown takla; nami dow nahowkah kown nadowi bowt.16Now ang nape en sangbowk laitawm huapher kown. Nami huapher mih nami sangbowk laitawm tawkpla lak kowi en natowah kown.17“Now nami sangbowk laitawm tawkpla vüi kuh achangma mih hown enni nathawp pe aküm lowk kown. Nami aküm dow maru kawmuüa kowh angak khu müa naown kown. Nami aküm dow areng klang pre muk hown dawnglang, now adowng phia amuk hown dawnglang enni nathawpah kown.18Nami kung kowi sangbowk laitawm tawkpla küm adowng pra ret kowi kowh vüi paw kuh hown sawnah now ‘Cherup ’ rup enni nathawp pe pre buk kown takla.19Nami ‘Cherup’ rup pre buk mih dow sangbowk laitawm tawkpla küm mapra downg hownia lowk, paipra downg hownia lowk enni natowah kown. Nami ‘Cherup’ rup dow sangbowk laitawm tawkpla küm kowi kowh kuh nasawnah hanow enni nathawpah kown takla.20‘Cherup’ pre buk mih dow tatingtang klowk enni natowah kown, now amatchi kowh lumowr dow sangbowk laitawm tawkpla küm prakowi enni nadangah kown. ‘Cherup’ pre buk trui kowh lap dow sangbowk laitawm tawkpla küm luk kowi naiangah kown.21Nami aküm dow sangbowk laitawm tawkpla luk kowi enni natowah kown, now ang nape en kown mih sangbowk laitawm huapher dow nami tawkpla lak kowi en natowah kown.22Nami sangbowk laitawm tawkpla küm luk kowi kowh Cherup rup pre buk mih takra kowi dow en hown ang nauang takrum reng kown, now nami hownia Israeluüa vüi ang kowh ana pek maten ang nape en reng kown.Chimsaima mih kawm towk rah pawitang
23“Now ri singh hown enni nathawp pawitang lowk kown takla. Nami pawitang dow areng klang pre muk, adowng phia amuk, now akro dow amuk hown dawnglang enni nathawpah kown.24Nami pawitang dow kuh achangma mih hown enni naklaiah kown, now auer tapat lut mih kowi kuh hown enni nathawp pe bawng kown.25Nami pawitang adak prakowi aret tapat lut apawk ngia enni nathawp pe aping kown. Nami aping kowi paw kuh hown enni nathawp pe bawng kown takla.26Now pawitang nui towng akhawk luk kowi akawtlawng sowr müa akli paw enni nachawp pe lowk chi kown. Nami akli dow kuh hown enni nathawpah kown takla.27Naiawngün akli dow pawitang dak kowi kowh aping dakchow re-e nachawpah kown. Nami akli kowi dow sowr pe akawtlawng hanow nacham kawtla reng kownkow nami re-e nachawpah kown takla.28Nami akawtlawng pre buk mih dow ri singh hown nahuiah hanow enni naklai pe kuh kown takla, now pawitang dow nami akawtlawng hown enni nakawtla reng kown.29Now pawitang luk kowi kowh towah kown mih lawngpan hai bia, now khamah mih uanap kowi kowh tawngah kown mih biatum hai tuikawng dow kuh achangma mih hown enni nathawpah kown takla.30Now pawitang luk kowi dow uang ap ang mih chimsaima mih kawm atungma nauowi reng kown takla.31“Now kuh achangma mih hown thawp maibu towngh büa lowk diah. Nami maibu towngh kowi dow achowm müa, achüng hai bia thawp pe büa diah, now klangiung müa pau hai pau khawm paw thawpla pe büa diah. Naiawngün dow pakluchow mih kuh hown sawnah now thawpah büa diah.32Maibu towngh kowi kowh achüng kowi dow mapra sum buk, paipra sum buk chi bowkbowk kowi taruk klüng thawp pe amia prek büa diah.33Amia prek towng madam pau iawng mih bia dow pau hai akhawm hailawm thawp pe sum buk chi diah. Maibu towngh kowi kowh amia prek taruk klüng mih dow apowmsang thawpah büa diah.34Maibu towngh kowi kowh achüng kowi paw amia prek kowi kowh iawng thawp pe bia büa diah. Nachenganchepaw achüng kowi dow thawp pe tali klüng diah.35Maibu towngh chüng kowi kowh amia prek uowi taruk klüng mih kowi paw amiakrum towng amiakrum dakchow kowi apau hai akhawm thawp pe büa diah.36Apau, akhawm, amia prek maten hai achüng dow kuh achangma mih pakluchow hown phengah now thawpah büa diah.37Nami kung kowi dow kuh achangma mih hown thawp pe maibu ranit klüng büa diah. Now naiawngün maibu dow achüng kowi kowh aluk nowm nowm mih bia kowi lowk, now amia prek taruk klüng mih kowi paw aluk nowm nowm mih bia kowi tow pe lowk chi büa diah. Naiawngün maibu dow towkah hanow maibu towngh purdowng prakowi nowi bowk iawng towah büa diah.38Now nami maibu kowi kowh bawthi kep müa kaingkep hai maidim towk rah lawngpan dow kuh achangma mih hown thawpah büa diah.39Maibu towngh hailawm naiawngün uanh thawp müa dow bowkbowk kowi kuh achangma mih 30 set ngia nalakke kown.40“Mami hungh luk kowi kowh ang tüng en mih akuh iawng nathawpah bowk kownkow pe pe ching kaneu diah,” pape khai.The Seed Company