Uown Lawt24
1Nami kung kowi CHAKRAMANG tek pe Mosi mih, “Arawn, Nadab, Abihu hai Israeluüa lawngtang aluchow mih ranitkawm ia hailawm hungh kowi ang tut-e uang awr pün büa diah. Enni uang awr pün mih khin khe alakma hownia tabawk krawm se enni nachup ang kown.2Nachenganchepaw ang tut-e dow en lowk iachow taih nauang kown, now kowbüah dow hauang pacham tawi lah. Kowbüah klen kowi akeng mih Israeluüa paw en hown hungh kowi hauang pacham tawi pün lah,” pakhai.3Now nami laiklow maten hai ari aiang maten dow hungh hownia uang dowm hanow maru kawmuüa kowi Mosi uang tek pe khai. Nakhowk khe maru kawmuüa dow Mosi kowi kowh CHAKRAMANG tek pe iawng nauta hanow akrowksang tek mih, “CHAKRAMANG tek mih srui anging nachang kown towbowt,” pakhai.4Mosi dow CHAKRAMANG tek pe mih laiklow srui ruiah khai. Now auai rau murpa Mosi awr rü hanow hungh tut kowi kowthawp phuchuara lowk khai. Now aia dow nakowi mih Israeluüa kowh laipre chen tuakla se hua laipre buk chowkah khai.5Nami kung kowi dow CHAKRAMANG vüi nachang phuchua kownkow Israel klanguüa hawmh kowi Mosi kowchinah pre sum ia khai. Nami Israel klanguüa hawmh dow changla phuchua mih tawncher nga hai sau mih phuchuara kowi kowh maih kowi nawmah now tikah mih uanap pawi changla büah khai. Now Thurai hai maru hown taking tasangra nauowila kownkow taking tasangra uanap vüi chiala paw ahuma phuchuala büah khai.6Nakhowk khe changla phuchua mih tawncher vi Mosi pawah dawnglang hanow biatum kowi towah khai, now dawnglang mih vi dow phuchuara kowi aia krawi thetah khai.7Nami kung kowi dow Sangbowk Laitawm Bowih pawah now maru kawmuüa kowi aia phat pe khai. Nahanow Mosi kowi nami maru kawmuüa klangah mih, “CHAKRAMANG tek iawng anging nachang kown towbowt, aia tek mih srui anging nachün kown towbowt,” pakhai.8Nami laiklow ta hanow Mosi mih biatum kowi kowh vi pawah now maru kawmuüa luk kowi krawi thetah khai. Now aia tek pe mih, “Mami dow sangbowk laitawm vi chekhai. Sangbowk Laitawm Bowih kowi arui uowi iawng mami vi hown CHAKRAMANG mih enni hown tatow sangbowk laitawm khowk chekhai,” pakhai.9Nami kung kowi Mosi, Arawn, Nadab, Abihu hai Israel lawngtang aluchowuüa ranitkawm ia dow hungh kowi kowpün khai.10Nami hungh kowi kowpün khe amatni dow Israeluüa kowh Thurai kowi kowkhi büah khai. Aia khawkpha dak kowi kowh aphai dow asung khakma mih hua hown kowh thawpah mih iawng chekhai. Nami dow kuangchan achimma khe kowh iawng aruama chekhai.11Israel lawngtang aluchowuüa dow khi Thurai khowk chepaw Thurai dow amatni kowi kowngta dowi chekhai. Amatni dow Thurai kowi khi büah khai, now cha büah kham büah khai.12Nami kung kowi CHAKRAMANG tek pe Mosi mih, “En mih hungh luk kowi uang awr pün now ang tut-e uang diah, now makowi uang uowi nawng diah. Maru kawmuüa kowi natüngsangah kown mih ana hai ari aiang huapher luk kowi ang ruita hüah khowk; nami huapher ang nape en kown,” pakhai.13Nami laiklow tata hanow Mosi mih aia kowh akhowng mih Josua kowi hawla now tarü khai, now aia dow Thurai hungh kowi kowpün khai.14Lawngtang aluchowuüa kowi Mosi ta tekla pe mih, “Angching uang plan dowi mowr mami re-e hawt uowi büa diah. Arawn hai Hur iüah tawi uowila enni reng chekhai. Enni che takhowk taran khai hanow kowiüah tut-e kowkowi büa diah,” pakhai.15Nami kung kowi dow Mosi mih hungh kowi awr pün khai bowt, now hungh dow uangnim hown taruk ni mowr hing tamum hüah khai. Now ranit ni khe dow nami uangnim dawng hownia Mosi kowi CHAKRAMANG iu hawah khai. CHAKRAMANG kowh kraingra dow Sinai hungh luk kowi uowi hüah chekhai.17CHAKRAMANG kowh kraingra dow maih lün bia laplap mih iawng hungh chut hownia Israeluüa tut-e uang tatüng khai.18Mosi dow nami uangnim dawng kowi kowkup hanow hungh luk kowi kowpün khai. Aia dow nami hungh luk kowi likawm ni likawm uar mowr kowuowi khai.
The Seed Company