Uown Lawt23
Tara nowm chet lawnguan
1“Anowm nadowi mih laiklow hang cham uet büah. Maru ngak prakowi tawi tangila hai hang tawi thuak dai lai saksi diah.2“Angak chang miuüa lang kawm khai pache en paw natawi chang kown mih nadowi. Tara chetra kowi paw maru ngak prakowi tangi mih maru lang kawm khai pache en natawi tangi kown mih nadowi.3Ngarai mih maru kowi chet pe tara khe ngaraima pache en natawi tangila kown nadowi.4“En ransu kowh chia chepaw, kawrngaramchük chepaw akeng prakowi cham powt mih che en khi hanow aia tut-e en nakowpawla pe ngengche kown takla.5Sui en mih maru kowh kawrngaramchük che kurdik di lai kowh cham taphet hüah mih en khi hanow en nakhowngah ngengche kown takla; en natowla hüah kown nadowi.6“Ngaraima mih maru kowi paw tara nowm nachet pe kown takla.7Maru kowi hang krawi pe ngak naklak. Angak uowi dowi mih maru hai achinawmma mih maru kowi nakowngla kown mih ripra hang krawi pe diah. Naiawng mih lup ngak chang mih maru kowi dow ang nape plaiah kown nadowi.8“Hang paw abüm asua büah. Paw büm paw sua khai bowt hanow mik uowi chepaw mik duma iawng chekhai. Bümsua lup dow achinawmma mih maru kowi paw angak prakowi pawla reng chekhai.9“Akeng prenchak maru-uüa luk kowi hang chang nowng büah. Prenlang maru-uüa kowh saktuak dow enni aiawng tuk towbowt. Tawngplawng kowchow panow Aigupta pren kowi enni paw prenlang maru-uüa iawng uowila akat khowk chekhai.Tanai Ni rirow
10“Taruk ning mowr dow enni nachang üa nachang laih kown, now naiawngün hownia kowh phaw mih enni napaw kown.11Nachenganchepaw ranit ning mih ning kowi dow üa hai laih paw enni nachang kown nadowi, now naiawngün hownia kowh awr ta phaw mih chap paw enni napaw kown nadowi. Naiawngün hownia kowh uang awr ta phaw mih srui dow enni pungmadawng kowi kowh ngarai miuüa chak müa naown kown, now nami klen kowi kowh ta lat mih dow kaurawng uaramchak hawmh chak müa naown kown. Enni kowh grep rawng hai kanrawn khang vüi paw naiawng enni nachang kown.12“Pasapta kowi taruk ni mowr enni nachang lup kown. Nachenganchepaw ranit ni mih ni khe dow tawng lup paw enni nachang kown nadowi. Nahanow enni kowh chia hai kawrngaramchük paw naka tanai kown towbowt. Now enni kowh narma narla hai akeng prenchak uang chang enni lup miuüa paw naka tanai kown towbowt.13“Ang pe enni mih ana maten enni nachün ngengche kown takla. Akeng thuraiuüa kowi enni nachup kown nadowi, now naiawngünuüa ming paw enni narük kown nadowi.Sum chap mih pawi chang rirow
14“Ang vüi kowi ning towng enni nachang pawi sum kat chi kown takla.15Lowk kowi kowh dow the pe tuah dowi mih kawm Pawi chekhai. Nami pawi sun mih khin khe dow ang ana pek iawng ranit ni mowr the pe tuah dowi mih kawm enni nacha kown takla. Nami pawi dow Abib la kowi kowh khowmta bowkta mih ni kowi enni nasunah reng kown. Tawngplawng kowchow panow Aigupta pren hownia enni uang lawt mih dow nami la kowi chekhai. Nami pawi enni sun mih khin khe dow amia iawng mih paw rut khawma hown ang pur kowi hang pacham uang lah.16Pre kowi kowh dow Chamüng Pawk Pawi chekhai. Nami pawi enni sun mih khin khe dow üa hai laih hownia kowh enni kaah mih uih müng CHAKRAMANG tut-e enni naap-ah kown. Now sum kowi kowh dow Bowthowk Pawi chekhai. Nami pawi dow enni ki tawnta luprak prowng khe enni nachangah kown takla.17Naiawng hai paning kowi sum kat chi enni pungmadawng kowi kowh kachakuüa maten ang CHAKRAMANG enni kowh Thurai pur kowi nauang takua kown takla.18“Enni phuchuala ang mih tawncher kowi kowh vi enni uang phuchua mih khin khe dow the pe tuah mih kawm enni naphuchuala kown nadowi. Now enni phuchuala ang mih tawncher sau dow auai rau mowr enni natowah kown nadowi.19Rua chah nga dow a-u iawn tui hown enni naengah kown nadowi.“Üa hai laih hownia kowh uih müng kowi lang iung mih dow ang CHAKRAMANG enni kowh Thurai chup kim kowi enni nauang pawla kown.
Ana pek hai laikham
20“Enni pur kowi narik mang kownkow kramamu kowi ang nauang chin enni lowk ia kown. Aia dow enni vüi ang kamrütta hüah mih uowi rah kowi napawla enni kown, now tiama rawng kowi naming nakhet enni kown.21Aia natek enni kown mih enni nasünta kown takla, now nachün pe kown takla. Aia tut-e ang tawi uowi khai rakowi aia kowi enni nakingküaah kown nadowi. Enni che kingküaah khai hanow aia mih nalawt enni kown nadowi tham.22Nachenganchepaw enni che aia laiklow sünta hai ang tek mih srui chang hanow enni kowh ransu-uüa mih ang kowh ransu nachowng kown, now kingküa enni miuüa kowi dow ang nakingküaah kown.23Ang kowh kramamu mih enni pur kowi narik mang hanow Amawruüa, Hituüa, Perizuüa, Kananuüa, Hivuüa hai Jebusuüa uowiah mih pren kowi nakowpawla enni kown. Naiawngün chenchapuüa kowi dow ang napiakta bowk kown.24Amatni kowh thuraiuüa pur kowi enni natawi tabawk kown nadowi, now chup paw enni natawi chup kown nadowi. Amatni kowh kawngmu rirow iawng enni natawi chang kown nadowi. Amatni kowh thurai rup maten enni napiakta pe nak kown, now amatni chupah mih hua maten paw enni nadita pe nak kown takla.25Ang CHAKRAMANG enni kowh Thurai, ang kowi chowtaih enni nachup naiia kown. Naiawng enni chang hanow enni kowh chakkham kowi hai tui luk kowi ang kowh prasira nauowi kown. Nami klen kowi enni kowh arau abau maten paw ang nahenta enni kown.26Enni pren kowi dow masiuüa paw lawt nau dowi bowt tham, now ting mih paw uowi dowi bowt tham. Chowngdawng sakklangma ang nape sing enni kown.27“Enni nau kowiah kown mih pren kowi kowh maru-uüa kowi ang narik peah kramra kown, now amatni kowi dow amawlawma ang nachangah kown. Enni kowh ransu-uüa maten kowi kung prakowi taplan hanow ang nape powtah kown.28Hivuüa, Kananuüa hai Hituüa kowi naprütla kownkow enni dowi rawn ang kowrik chin pe takrow takraira kown.29Nachenganchepaw paning sang amatni bowkbowk kowi ang naprütta kown nadowi. Tawngplawng kowchow panow naiawng che chang hanow pren mih akhaw aklaima nauowi kown chekhai. Nahanow kaurawng uaramchak hawmh nahu lai kown chekhai.30Enni kowh maru iun hu kowh paprenma krawi ia powng dowi mowr naiawngün chenchapuüa kowi ditchowchi ditchowchi ang naprütah kown.31“Enni kowh pren sünghi dow sata Rik hownia Filistinuüa pren kowi kowh sata mowr, now süngrüp süngkangma hownia Iufratis aw mowr ang nape enni kown. Nami pren kowi kowh hawt uowi miuüa kowi dow enni rut kowi ang naap enni kown, now amatni kowi enni naprütta kown.32Amatni hown paw, amatni kowh thuraiuüa hown paw, enni natatow sangbowk laitawm kown nadowi.33Amatni kowi dow enni pren kowi enni nape uowiah kown nadowi. Enni che pe uowila khai hanow amatni rakowi nakingküala ang kown mih angak enni nachang kown. Amatni kowh thuraiuüa kowi che enni tawi chup khai hanow leng kowi tasowk khe kowh iawng enni naown kown,” pape khai.The Seed Company