Uown Lawt21
Narla tawn lawnguan kowi kowh rirow
1Nami kung kowi CHAKRAMANG tek pe Mosi mih, “Mami ang kowh rirow maten Israeluüa kowi kowphuang pe diah.2“Hebrai chenchap maru kowi che changla nar kownkow enni ran khai hanow taruk ning mowr nami nar mih enni nimkrüa kowi nachang lup kown. Nachenganchepaw ranit ning mih ning khe dow paw pe sung plan dowi kowi enni nalawtta kown takla.3Enni kim kowi nami nar uang uowi khe che aia lowk iachow taih hanow lawt khe paw aia malowkchow taih nalawt kown; aia uang uowi khe che uang pawla masi khai hanow enni lawtta mih khin khe paw amasi hailawm enni nalawtah kown takla.4Nachenganchepaw enni kim kowi uowi mih khin khe che nami nar kowi enni kowh narma hown enni pe tachawngah khai hanow aia lawt mih khin khe amasi chauüa kowi enni nakrawi lawt pe kown nadowi; aia malowkchow taih nalawt kown.5“Tawkchedow nami nar che aia kowh kim iah hai amasi chauüa kowi sakraula khai, now amatni kowi towla now powtta kown nau dowi pami achima tek khai hanow6Thurai chup kim kowi nami nar kowi mih kim iah nakowpawla kown. Now kimplawt büng kowi chepaw, kimplawt mawm kowi chepaw nami nar kowi nanüa pe param hanow chukchem hown narui pe kown. Nami hownia now aia dow achowngma pat kim iah kowh nar nachowng kown towbowt.7“Lowra maru kowmatia chama kowi che maru nachangla nar kownkow cham sumta khai hanow nami masiuüa dow kachakuüa nar iawng ranit ning khe paw naia lawt kown nadowi.8Kim iah che nau khai hanow aia ranah mih narma kowi naia chawng kown. Nachenganchepaw tachawng kung kowi kim iah che nami narma luk kowi sak-ih dowi kowh chalow now a-pa tut-e napaw pe sung plan hanow nasata iawk kown takla. Akeng chenchap maru tut-e tarapdow nami narma kowi naia sum kown nadowi. Naiawng che chang khai hanow nami narma pa hown kowh laikham piak pe mih chekhai.9Kim iah che achapa vüi nami narma kowi nau pe khai hanow kowmatia chama iawng nami narma kowi naming nakhetah kown takla.10Now tachawng kung kowi nami narma hua cham plan paw masi iawk chepaw nami narma kowi chakkham hai khupdip tawngklai hown buk pra kowh kakbak napela kown takla.11Ahua che naiawngün sum chap mih nowng pe dowi hanow paw pe sung plan dowi kowi nami narma kowi nalawtta kown takla.Takhüm, tabawp hown tapaw asak mih kowh rirow
12“Lowra maru kowi bawpah kowh kowngta khai hanow abawp miia kowi paw nakowngta ngengche kown takla.13Nachenganchepaw nakowngta kown mih tuak uowi dowi kowi bawpah kowh kowngta maru khai hanow nami abawp miia kowi naia ripah kown nadowi. Aia dow ang kamrütah mih arah kowi naia powt kown. Tawngplawng kowchow panow naiawng kowng mih dow ang pe phawah mih chekhai.14Tawkchedow nakowngta kown mih kamrüt hown cham saita maru kowh powt mih kowi dow phuchuara kowi kowpowt chepaw nami hownia nauang küngla now enni nakowngta kown takla.15“Bawp u-pa mih maru kowi nakowngta ngengche kown takla.16“Lowra maru cham ku maru kowh cham sumta khai chepaw, aia tut-e towah chepaw nami kuk mih kowi ka khüm khai hanow aia kowi dow nakowngta ngengche kown takla.17“U-pa kowi pe piati mih maru kowi dow nakowngta ngengche kown takla.18“Maru pre ia taran kowh lowk ia mih kowi thawngah chepaw, huaklu hown kuakah chepaw kowng dowi hanow naiawng chang mih maru kowi dow nakowngla pat mih ripra naia peah kown nadowi. Ka arau mih maru mawk hüah chepaw akung kowi che raitua hown amang takla khai hanow naiawng chang mih maru kowi maiawng naripah kown: Ka arau mih maru kowh akhin iawm mih sung naiawng chang mih maru kowi nape iawah kown takla. Nami klen kowi arau iung dowi mowr dow ka arau mih kowi nami maru nacham rawah kown takla.20“Lowra maru aia kowh narma kowi chepaw, narla kowi chepaw müa hown bawpah kowh kowngta khai hanow nami maru kowi naripah kown takla.21Nachenganchepaw anar che singla ani pre ni tak hanow abawp miia kowi naripah kown nadowi. Tawngplawng kowchow panow anar kowng mih dow aia iawmta dawngthawnguan mih chekhai.22“Takhüm khe kum nau mih masiuüa kowi kak kowh mu lak kowi kowh chah piak khai. Tawkche akeng mih che tawngpaw tawi piak dowi hanow nami masiuüa kowh hua hown tara chet miuüa tek iawng nami masiuüa kowi kakta mih maru naiaw ngengche kown takla.23Tawkchedow nami klen kowi che piak khai hanow maiawng naripah kown takla: sak kowh sak klai,24mik kowh mik klai, iüng kowh iüng klai, rut kowh rut klai, khawk kowh khawk klai,25towk kowh towk klai, ma kowh ma klai, bawp kowh bawp klai hown naripah kown.26“Lowra maru aia kowh narma kowi chepaw, narla kowi chepaw amik kowi bawpah kowh piakta pe mik khai hanow nami sung dow aia kowh nar kowi paw pe sung plan dowi kowi nalawtta kown takla.27Now kim iah che aia kowh nar kowi bawpah kowh letta pe iüng khai hanow nami sung paw aia kowh nar kowi paw pe sung plan dowi kowi nalawtta kown takla.Tawncher lawnguan kowi kowh rirow
28“Chiala che krawi ting maru kowh kowngta maru khai hanow nami chiala kowi dow kowng pat hua hown nakuakah ngengche kown, now nami chia nga dow miapaw nacha kown nadowi. Tawkchedow nami chia iah mih naka ripra kown nadowi.29Nachenganchepaw nami chiala che krawi ting maru reng mih akiang uowi khai, now chia iah kowi paw tek pe kung kowi nami chia kowi khuowkah dowi kowh cham kowngta maru khai hanow naiawng mih kowi dow ripra nalangah kown. Naiawng mih kowi dow chiala hailawm chia iah kowi paw nakowngta kown takla.30Nachenganchepaw chia iah kowi che lü pe iawk khai kowh chalow now kük pe mowr nami chia iah naiaw kown takla, now nami tangka takcha aia kowh sak dow naplai kown.31Nami chiala che ngeuüa kowi cham tingta kowh kowngta khai hanow nakhowk khe paw naiawng nachangah kown takla.32Now nami chiala che maru kowh narma kowi chepaw, narla kowi chepaw cham tingta kowh kowngta khai hanow nami nar kowh kim iah kowi chia iah napeah tai tangka 30 iun kown takla. Now nami chia kowi dow hua hown kowng pat nakuakah ngengche kown takla.33“Lowra maru aia laih kowi thai kuam kowh thiala kaneu dowi kowi towla hüah now nami kuam kowi chia chepaw, kawrngaramchük chepaw uang dowh khe kowng khai hanow nami kuam thai miia mih tawncher iah tut-e naiaw kown takla. Tawkche nami tawncher uak dow kuam thai miia kowh nachowng kown towbowt.35“Maru pre ia kowh chiala tating kowh alowk mih kowh chiala kowi kowngta khai hanow ta sing mih chiala nasumah iüah kown, now sumah mih chiala sung hown kowng khai mih chiala nga dow amatchi pre ia riri nataretah kown.36Tawkchedow chiala krawi ting reng mih aiawng tuk towbowt chepaw chia iah che khuowkah dowi hanow nami chia iah kowi chia kowh chia klai napaw pe kown, now kowng khai mih chia dow aia kowh nachowng kown towbowt,” pakhai.The Seed Company