Uown Lawt20
Thurai kowh hamüt klüng mih ana pek
1Nami kung kowi Thurai tek mih maiawng:2“Aw Israeluüa, ang CHAKRAMANG dow enni kowh Thurai chekhai. Aigupta pren kowi kowh nar lup chang hownia uang lawtla enni mih dow ang chekhai.3“Ang klen kowi dow akeng mih thurai kowi enni nachup naiia kown nadowi.4“Tawng iawng mih arup paw enni nathawp kown nadowi. Nami dow kuang kowi kowh uowi mih chap iawng pana lah, lusa kowi kowh uowi mih chap iawng pana lah, sata kowi kowh uowi mih chap iawng pana lah, enni nathawp kown nadowi.5Naiawngün arup kowi dow enni nachupiia kown nadowi, now amatni kowh lup enni nachang pe kown nadowi. Tawngplawng kowchow panow ang CHAKRAMANG chowtaih enni kowh Thurai. Ang dow khowrbown dawma; ang klen kowi akeng chap kowi enni cham chup mih mapaw ang nau dowi chekhai. Sui ang miuüa kowi dow amatni kowh angak ripra sum tali chowng mowr ang peah reng kown.6Nachenganchepaw sakrau ang miuüa hai ang ana pek chün miuüa kowi dow athawng aiawng chowng mowr ang kowh achur uowi dowi mih sakraura ang natüng pe kown.7“CHAKRAMANG enni kowh Thurai ming enni narük naklak kown nadowi; rük naklak mih kowi dow ang naripah kown.8“Tanai Ni dow tuakah hanow chimsaima khangah büa diah.9Taruk ni mowr mih enni kowh lup maten enni nachang kown.10Nachenganchepaw ranit ni mih ni dow CHAKRAMANG enni kowh Thurai vüi Tanai Ni chekhai. Nami ni dow enni matia lah, enni kowh chauüa lah, enni kowh narma narla lah, enni kowh tawncher lah, enni tut-e kowh tawi uowi mih akeng chenchapuüa lah, amia iawng mih paw nachang lup kown nadowi.11Tawngplawng kowchow panow taruk ni mowr dow mukuang, lusa, sata hai naiawngün lak kowi kowh uowi mih maten ang thawp khai. Nachenganchepaw ranit ni mih ni khe dow ang tanai khai. Naiawng rakowi nami Tanai Ni kowi dow ang peah prasi hanow ang matia vüi chimsaima ang towah khai.12“Enni kowh u-pa kowi ringkawah büa diah. Nahanow ang nape enni kown mih pren kowi chowngdawng sakklangma enni nasing kown.13“Hang sai maru sak.14“Hang chang iang.15“Hang ku.16“Klowkchakuüa luk kowi hang thuak dai lai saksi.17“Enni klowkchakuüa kowh kim üa chepaw, masi chepaw, narma narla chepaw, chia hai kawrngaramchük chepaw tawng iawng mih chap paw hang cham irh büah,” pakhai.18Nami khin khe pla nowi hai hungh hownia akhük chai ngawnglawng mih Israeluüa khi khai, now muk tün hai baw tün ün paw ta büah khai. Naiawng rakowi amatni dow kram kowh alakma hownia iowng se chür büah khai.19Amatni tek pe Mosi mih, “Anging hown en phai taklang diah, anging nachün en laiklow kown towbowt. Thurai matia che klang anging now anging nakowng kown chekhai,” pabüah khai.20Nakhowk khe Mosi tek pe maru-uüa mih, “Hang kram büa diah. Tawngplawng kowchow panow nauang chaing enni kownkow aia uang mih chekhai. Aia kowi enni kram now enni nachang angak dowi bowt kownkow chekhai,” pakhai.21Maru kawmuüa dow alakma kowi hawt ta iowng khai. Now Mosi dow nami uangnim atatma mih prakowi Thurai tut-e kowkowi khai.22Now CHAKRAMANG tek pe Mosi mih, “Maiawngün laiklow Israeluüa kowi kowtek pe diah: Mukuang pren hownia ang iu klang enni mih dow enni mik hown enni khi khowk.23Kuh hai tai hown kowh thawpah mih thurai maten kowi nachupah kownkow ang pur kowi enni natow kown nadowi.24Ang vüi bawn hown enni nathawp phuchuara lowk kown. Nami phuchuara luk kowi dow tikah mih uanap hai CHAKRAMANG hown taking tasangra nauowila kownkow taking tasangra uanap enni nachang kown. Nami uanap kowi dow chia, rua hai ruapur mih enni naap-ah reng kown. Enni nachup naiiala ang kownkow ang nakhowm bowk enni arah kown, now naiawngün arah maten kowi ang nauangah hanow ang nape enni prasi kown.25Hua hown che ang vüi kowi enni thawp phuchuara kown nau khai hanow hua mih enni nabawpah kown nadowi. Nami hua luk kowi che rutchün khawkleng hown enni kakta khai hanow enni napiakta kown chekhai.26Dawng hown enni pün mih khin khe enni kowh siri natüngla dowi kownkow ang kowh phuchuara mih dawng chak takla dowi iawng enni nathawpah kown,” pakhai.The Seed Company