Uown Lawt19
1Israeluüa dow Refidim pami arah hownia lawt hanow süngrüp süngkangma kowi kowting khai. Nami süngrüp süngkangma kowi dow aming Sinai pami hungh uowi lowk. Amatni dow nami Sinai hungh ria kowi khup tangbung khai. Nami dow Aigupta pren hownia amatni uang lawt mih sum la khe chekhai.3Nakowi uowi mih khin khe Mosi dow Thurai hown taklang kownkow Sinai hungh luk kowi kowpün khai. Nakhowk khe Mosi kowi Thurai tek pe mih, “Jakawb kowh chuprek chaprek Israeluüa kowi maiawng kowtek pe diah:4Aigupta prenchakuüa kowi tawng iawng ngai chow ang changah mih enni khi khowk. Uamu cham iowla chah iawng dow ang matia tut-e aiungma ang uang pawla enni khai.5Naiawng rakowi enni che ang laiklow sünta hai ang kowh sangbowk laitawm chün hanow ang matia kowh maru enni nachowng kown. Lusa kowi kowh maru maten dow ang kowh chekhai. Nachenganchepaw enni dow ang kowh asung lang uowi mih dawngthawnguan naown kown.6Enni dow ang vüi kowi kowh chimsaima mih chenchap naown kown; enni dow uamow chenchap nachowng kown. En mih maiawngün laiklow Israeluüa kowi kowtek pe diah,” pakhai.7Naiawng rakowi Mosi dow uang dowm hanow Israel lawngtang aluchowuüa kowi kuaah khai, now CHAKRAMANG pe tekah mih laiklow maten kowbüah kowi tek pe khai.8Nami laiklow tata now maru maten akrowksang tek mih, “CHAKRAMANG tek mih srui anging chang kown towbowt,” pakhai. Now maru kawmuüa tekah mih laiklow dow CHAKRAMANG kowi Mosi kowplan phowk pe khai.9Nakhowk khe CHAKRAMANG tek pe Mosi mih, “En hown ang taklang mih khin khe maru kawmuüa natawitala kownkow hai achowngma naia owmla en kownkow uangnim tatma mih dawng kowi en tut-e ang nauang kown,” pape khai.10Nami klen kowi CHAKRAMANG tek pe Mosi mih, “Kowplan dowm hanow ani hown tharau mih maru kawmuüa kowi en kowchimsaiah diah. Maru kawmuüa mih amatni kowh dawnguan pacham chuta lah.11Now thowirau khe dow pacham kamrüt büah bowk lah. Thowirau khe dow maru maten khi iawng Sinai hungh luk kowi ang nauang dowm kown.12Maru-uüa vüi hungh tapat lut krawi thawp pe rihi diah. Now hungh luk kowi nauang pün dowi kownkow hangah diah; rihi lak kowi khowm padow nauang chawp dowi kownkow maru kawmuüa kowi hangah diah. Hungh kowi uang chawp mih maru kowi dow nakowngta ngengche kown takla.13Tawkchedow nami maru kowi rut hown bawpah dowi kowi hua hown nakuakah kown, nadowi now salangba sek hown naap-ah kown takla. Maru chepaw, tawncher chepaw hungh kowi uang chawp mih kowi dow nape singah kown nadowi bowt. Nachenganchepaw amaisang kra sangrum mowr baw tün kung kowi dow hungh luk kowi uang ia pün büah kown taih,” pape khai.14Nami kung kowi dow hungh hownia uang dowm hanow maru kawmuüa kowi Mosi pe tachim tasaiah khai, now maru kawmuüa dow chu dawnguan khai bowt.15Mosi tek pe mih, “Thowirau kowh vüi kamrüt büa diah. Thowirau mowr mih masi hown miapaw hang taphua taiua büa diah,” pape khai.16Now sum ni khe kowh rau-e dow muk tün khai bowt, pla paw nowi pliplip khai bowt, now hungh luk kowi uangnim paw atatma uang tamum khai. Nami klen kowi baw paw atünma uang tün khai bowt. Naiawngün ta hai khi büah hanow maru kawmuüa dow kram kowh chürla kluk khai.17Nakhowk khe Thurai pur kowi kowpawla kownkow Mosi mih maru kawmuüa kowi uang lawtla khai. Now maru kawmuüa dow hungh tut kowi kowiowng khai.18Now CHAKRAMANG dow maih hailawm Sinai hungh luk kowi uang dowm khai bowt. Naiawng rakowi Sinai hungh dow maikhük hown hing tamum klum khai. Nami maikhük dow üa towk maikhük iawng pün lawmlawm khai, now nami hungh dow pahungma hing chür nukluk khai.19Now baw tün dow atün atünma kutplan tün ngamlam khai. Nami khin khe Mosi dow Thurai hown taklang khai, now Thurai paw atünma Mosi kowi klangah khai.20CHAKRAMANG dow Sinai hungh chut kowi uang dowm hanow Mosi kowi hawah khai, now Mosi dow hungh chut kowi kowpün khai.21CHAKRAMANG tek pe Mosi mih, “Kowdowm hanow maru kawmuüa kowi kowtek pe diah. Nauang mü ang kownkow rihi lak kowi hauang pacham kup büah lah. Naiawng nadowi now ahuma nakowng büah kown chekhai.22Nami klen kowi chang lup kownkow ang tut-e uang reng mih uamowuüa khowm padow natachim tasai kown takla. Naiawng nadowi kowh chalow now amatni kowi paw ang naripah kown chekhai,” pape khai.23Now CHAKRAMANG kowi Mosi tek pe mih, “Maru kawmuüa mih Sinai hungh luk kowi uang ia pün dowi bowt. Tawngplawng kowchow panow chimsaima natowah kownkow hungh tapat lut nathawp pe rihi kown mih en tek anging khowk,” pakhai.24Nakhowk khe CHAKRAMANG tek pe Mosi mih, “Adak kowi kowdowm hanow Arawn kowi uang hawla diah. Tawkchedow uamowuüa hai maru kawmuüa dow ang tut-e nauang kownkow rihi lak kowi hauang pakup lah. Naiawng nadowi now ang naripah kown chekhai,” pape khai.25Naiawng rakowi Mosi dow uang dowm hanow naiawngün laiklow maten maru kawmuüa kowi uang tek pe khai.
The Seed Company