Uown Lawt13
Thurai vüi naap chapa ta kown mih
1CHAKRAMANG tek pe Mosi mih,2“Israeluüa pungmadawng kowi kowh uang rik dia mih kachakuüa chah hai tawncher kowi kowh uang rik pen mih ala maten dow ang vüi kowi ap-ah diah. Uang rik dia mih kachakuüa chah hai tawncher kowi kowh ala maten dow ang kowh chekhai,” pakhai.3Nami khin khe Mosi tek pe maru-uüa mih, “Mami ni dow Aigupta nar hownia aia kür hown CHAKRAMANG lawtla enni mih ni chekhai rakowi tukah büah reng diah. Mami ni dow the pe tua mih tawng chap paw enni nacha kown nadowi.4Ani dow enni lawt mih chowbowt. Ani dow Abib la kowi kowh ni uown chekhai.5CHAKRAMANG dow Kananuüa, Hituüa, Amawruüa, Hivuüa hai Jebusuüa uowiah mih pren kowi nakowpawla enni kown. Aia dow naiawngün pren nape enni kownkow enni pipu-uüa tut-e khamta sawi khowk chekhai. Nakowi dow iawn tui, kuai tui hai tawng chap paw akhawr uowi dowi. Nami pren kowi enni kowuowi mih khin khe mami pawi dow ning towng kowh mami la kowi enni nasun reng kown takla.6“Mami pawi enni sun mih khin khe ranit ni mowr the pe tuah dowi mih kawm enni nacha kown. Now ranit ni kowh ni khe dow CHAKRAMANG vüi enni nachang pawi kown.7Mami ranit ni mowr dow the pe tuah dowi mih kawm enni nacha kown. Nami ranit ni kowi dow paprenma kowi tuah hai the pe tuah mih tawng chap paw naia uowi kown nadowi.8Nami pawi khe enni kowh chauüa kowi enni natek pe kown mih, ‘Mami dow Aigupta pren hownia uang lawt mih khin khe ang vüi kowi CHAKRAMANG changah mih srui tukla reng kownkow ang chang mih chekhai,’ napape kown.9CHAKRAMANG kowh rirow natukla reng kownkow ruiah now bawng kowi hai kau kowi maru sükah reng chekhai. Nami iawng dow CHAKRAMANG kowh rirow natukla reng kownkow nami pawi enni nasunah reng kown. Tawngplawng kowchow panow aiamat kür hown Aigupta pren hownia CHAKRAMANG lawtla enni mih chekhai.10Naiawng rakowi nami pawi dow rirow kowi uowi iawng ning towng kowh khin kowi enni nasunah reng kown.11“CHAKRAMANG dow enni hai enni pipu-uüa tut-e khamta sawi khowk iawng Kananuüa pren kowi nakowpawla enni kown. Aia dow nami pren nape powng enni kown.12Nami pren kowi enni kowuowi mih khin khe enni kowh chapa ta hai tawncher kowi kowh uang rik pen mih ala maten dow CHAKRAMANG vüi kowi enni naap-ah kown takla.13Nachenganchepaw kawrngaramchük rik pen mih ala takcha kowi ruapur chah hown enni naklanah kown. Klan dowi kowh chalow now nami kawrngaramchük chah kowh ngawng mih enni naklowkta pe kown. Naiawng hai enni kowh chapa ta maten kowi paw enni naklanah ngengche kown takla.14“Enni kowh chauüa dow pur prakowi nami auan nalünta enni kown. Nami khin khe enni natek pe kown mih, ‘Aigupta pren kowi anging uowi nar mih hownia CHAKRAMANG dow aia kür hown uang lawtla anging khai.15Aigupta pren kowi kowh mang dow lainowmma saktuak khawt. Aia dow mapaw nau lawt anging dowi. Nami khin khe CHAKRAMANG mih Aigupta maru-uüa kowh chapa ta hai tawncher kowi kowh rik pen mih ala maten kowi kowngta pe khai. Naiawng rakowi ang kowh tawncher uang rik pen mih ala maten hown CHAKRAMANG kowi ang phuchuaah khai, now ang kowh chapa ta kowi dow ang klanah khai.16CHAKRAMANG kowh rirow natukla reng kownkow ruiah now bawng kowi hai kau kowi maru sükah reng chekhai. Nami iawng dow CHAKRAMANG kowh rirow natukla reng kownkow nami pawi enni nasunah reng kown. Tawngplawng kowchow panow aiamat kür hown Aigupta pren hownia CHAKRAMANG lawtla enni mih chekhai,’ pape diah,” pakhai.17Israeluüa kowi Faraw lawtah mih khin khe Thurai dow amatni kowi Filistinuüa pren iawng tiama lang teng chepaw nami tiama iawng pawla dowi chekhai. Tawngplawng kowchow panow Filistin pren iawng che mang now nami prenchakuüa hown tasen takla mih khin khe saktuak taplan kown chekhai. Nahanow Aigupta pren kowi nakowplan tarawng padow Thurai ka tuak khai.18Naiawng rakowi CHAKRAMANG mih süngrüp süngkangma iawng panow sata Rik prakowi pawla khai. Israeluüa dow cham dowk tasen mih siphai hawmh iawng Aigupta pren hownia lawt khai bowt.19Mosi mih Josef kowh hut maten pawla bowk khai. Tawngplawng kowchow panow Josef mih aia kowng dowi rawn nami lawnguan kowi Israeluüa kowi pe khamla sawi khai. Josef tekla mih, “Thurai dow naming nakhet enni ngengche kown taih. Mami pren hownia enni lawt mih khin khe ang kowh hut maten pawla büa diah,” pakhai.20Nami kung kowi amatni dow Sukawt marow hownia lawt now süngrüp süngkangma ria re-e kowh Etham pami arah kowi kowkhup tangbung büah khai.21CHAKRAMANG mih amatni kowi natüng pe tiama kownkow ni-e dow uangnim iowng chunglung mih kowi uowiah now amatni pur kowi rik mang khai, now iak-e dow nanowila kownkow maih lün iowng chunglung mih iawng amatni pur kowi rik mang khai. Naiawng rakowi amatni dow ni-e hai iak-e ia mang khai.22Ni-e hai iak-e dow uangnim iowng chunglung mih hai maih lün iowng chunglung mih amatni pur kowi hing uowi hüah chekhai.The Seed Company