Uown Lawt12
1Aigupta pren kowi uowi reng tak khe Mosi hai Arawn iüah kowi CHAKRAMANG tek pe mih,2“Mami la dow enni vüi la uown naown kown, mami la dow enni kowh ning klowk müa la uown chekhai.3Israeluüa kowi kuaah lawmah now kowtek pe iüah dit. Mami la lacher hamüt ni khe kim towng kowi kowh kim iah mih chowlowkkow kimchakuüa vüi rua chah chepaw, ruapur chah chepaw nakram apum chi kown takla.4Pakimchak vüi tawncher papum lakke dowi mih kantiachow che uowi khai hanow aria kowi kowh uowi mih kimchakuüa hown naia tahum kown. Pre dawng maru iun mün khowt chow nowng cha kown mih changah ingsap now naiawng khowt chow mih tawncher nakram kown takla.5Nami dow rua chepaw, ruapur chepaw paningchow mih ala chah naown kown takla, now aser auowk uowi dowi kown takla.6Nami tawncher dow mami la lacher laitali ni mowr natowah kown. Now laitali ni mih ni sat kup khe dow Israel chen pachenma chowlowkkow kimchakuüa vüi nangen tawncher kown.7“Now enni nacha pe chaknga kown mih kim towng kowi dow kimplawt mawm pre pra hown aluk pra mawm kowi enni naplik pe tawncher vi kown takla.8Nami iak khe naiawngün chaknga dow nakrengah hanow the pe tuah dowi mih kawm hai akhakma mih pram kan hown enni nachaah kown.9Naiawngün chaknga dow asing enni naiung cha kown nadowi, now abut paw enni naiung cha kown nadowi. Naiawngün dow alu, akhawk hai kawlakchak hailawm maih kowi krengah hanow enni nachaah kown.10Naiawngün dow uarthowi pat tawngpaw enni natowah kown nadowi; ta lat khai ne tak now maih kowi enni natikta kown takla.11Nami enni cha mih khin khe enni kowh tawnguat kelang kowi enni nasükah kown, phanaikhawk paw enni nakruala kown, now raitua paw enni nadowkla kown takla. Now sakkrowng sakkrangma hown enni nachaah kown takla. Tawngplawng kowchow panow nami dow CHAKRAMANG vüi kowi kowh Takat Pawi chekhai.12Nami iak dow Aigupta pren lak kowi ang nauang len kown. Now maru-uüa kowh chapa ta maten hai tawncher kowi kowh rik pen mih ala maten ang nasaita kown. Aigupta pren kowi kowh akeng thurai maten kowi ang naripah kown. Ang dow CHAKRAMANG chekhai.13Nachenganchepaw kimplawt mawm kowi kowh vi plikia uowi mih dow enni Israeluüa uowi rah pami amatra naown kown. Nami vi ang khi hanow ang nakatla enni kown. Naiawng hai Aigupta pren luk kowi ang towkah ngare mih hownia enni dow naplai kown.14Nami ni dow enni natuakah reng kown mih ni chekhai. Nami dow CHAKRAMANG vüi chowngchowng saksakma ari iawng enni nasunah reng kown takla.15“Ranit ni mowr the pe tuah dowi mih kawm enni nacha kown. Nami ranit ni takra kowi the pe tuah mih kawm cha mih srui kowi dow Israel chenchap hownia enni nabatta kown takla. Naiawng rakowi enni kim kowi kowh tuah uowi mih maten auown ni khe enni nahenta kown.16Auown ni hai achur ni kowi dow takua talawm büa diah, nami takua talawm khin dow chimsaima sunah büa diah. Nami pre ni dow kowmatia chakkham lup klen kowi akeng mih lup tawngpaw enni nachang kown nadowi.17Nami The pe tuah dowi mih kawm Pawi dow chowngchowng saksakma ari iawng enni nasunah reng kown takla. Tawngplawng kowchow panow nami ni dow Israel krungchak maten kowi Aigupta pren hownia ang lawtla enni mih enni natukla reng kownkow chekhai.18La uown kowi kowh lacher laitali ni mih iak pra hownia pirmi lailowk ni iak pra mowr the pe tuah dowi mih kawm enni nacha kown.19Nami ranit ni kowi enni kowh kim kowi mih mapaw tuah naia uowi kown nadowi. Akeng chenchap lah, Israel chenchap lah; nami khin khe kowh the pe tuah mih chakkham cha mih maru kowi dow Israel chenchap hownia enni nabatta kown.20Lowra kowi enni cham uowi chepaw nami ranit ni lak kowi dow the pe tuah mih chakkham tawng chap paw enni nacha kown nadowi. Kawm paw the pe tuah dowi mih enni nacha kown takla,” pape khai.21Nami khin khe Israeluüa kowi kowh lawngtang aluchowuüa kowi Mosi hawah now tek pe mih, “Enni matia chowlowkkow kimchakuüa vüi enni nakram ruapur chah apum chi kown takla. Nami ruapur chah dow Takat Pawi kowi enni nangenah kown.22Now enni nacham paw pe lawngthow singh kre acheng hanow biatum kowi kowh vi kowi enni nachimah kown. Now nami vi dow kimplawt mawm pre pra hai aluk pra mawm kowi enni nakrawi plikah kown. Now uarthowi dowi mowr dow kim hownia miapaw enni naia lawt kown nadowi.23Aigupta prenchakuüa kowi CHAKRAMANG nasaiah kownkow pren lak kowi aia uang len mih khin khe enni kowh kimplawt kowi vi taplik mih khi hanow aia nakatla kown. Nakrawi sai maru kown mih kramamu kowi nasai enni kownkow enni kowh kim kowi CHAKRAMANG nape kupah kown nadowi.24“Maiawngün ana pek maten dow enni hai enni kowh chuprek chaprekuüa mih ari iawng chowngchowng saksakma enni nasunah reng kown.25Nape enni kownkow aia kham enni mih pren kowi enni kowuowi khe paw nami pawi dow enni nasunah reng kown.26‘Tawngplawng kowchow mami pawi a-i chang khai dow?’ padow pur prakowi enni kowh chu-uüa chauüa nalünta enni kown.27Nami khin khe enni natek pe kown mih, ‘Aigupta pren kowi a-i uowi mih khin khe aia dow Aigupta prenchakuüa kowi saita bowk khai. Nachenganchepaw a-i kowi dow pe plai a-i khai. Aia dow a-i kowh kim maten kowi katla a-i khai. Naiawng rakowi mami phuchuara hownia dow CHAKRAMANG vüi kowi a-i sun Takat Pawi reng chekhai,’ napape kown,” pakhai. Nami kung kowi dow Israeluüa mih krawng kowi tabawkah krawm now CHAKRAMANG kowi chupah khai.28Now Mosi hai Arawn iüah kowi CHAKRAMANG peah ana mih iawng Israeluüa mih kowplan hanow kowchang khai bowt.29Nami kung kowi dow lacher laitali ni kowi kowh uar dawng khe CHAKRAMANG mih Aigupta pren kowi kowh chapa ta maten kowi saita pe bowk khai. Faraw kowh chapa ta hownia kla thawng mih kowh chapa ta pat tawi kowng khai. Nami klen kowi tawncher kowi kowh rik pen mih ala maten paw tawi kowng bowk khai.30Nami uar dow Faraw hai aia kowh maru iukuüa hown Aigupta pren kowi kowh maru maten awr thowr khai; Aigupta pren paprenma kowi dow kar klow chai ngawnglawng khai. Tawngplawng kowchow panow maru kowng dowi mih kim dow lowk paw uowi dowi chekhai.31Nami iak khe Mosi hai Arawn iüah kowi uang hawla now Faraw tek pe mih, “Kawmat lawt büah! Israeluüa kowi pawla now ang maru-uüa hownia lawt iüah. Enni kowh CHAKRAMANG kowi kowchup kowiia büah.32Enchi tek iawng enni kowh chia hai ruapur hawmh paw pawla büah. Now ang kowi paw pela ang prasi iüah,” pakhai.33Aigupta maru-uüa dow amatni pren hownia Israeluüa kowi alenma nalawt kownkow krowkah khai. Amatni tek pe mih, “Enni che lawt dowi kowh chalow now anging nakowng bowk kown chekhai!” pabüah khai.34Naiawng rakowi Israeluüa mih kawmdi lawkia kowi thela tuah kown mih khin khowm ka büah dowi chekhai. Amatni dow kawmdi lawkia hailawm atawm biatum uan hown thupla now pangkawt kowi uaila khai.35Israeluüa dow Mosi tek iawng Aigupta maru-uüa tut-e kuh uanh, tai uanh hai tawnguat ün lüla büah khai.36Now Israeluüa kowi nasaksing sanaah kownkow CHAKRAMANG mih Aigupta maru-uüa kowi peah saktuak khai. Naiawng rakowi Israeluüa lü mih srui Aigupta maru-uüa peah khai. Naiawng hai amatni dow Aigupta maru-uüa kowh dawngthawnguan khuowila pe bun khai.37Israeluüa mih Aigupta pren kowi kowh Rameses marow hownia lawt hanow Sukawt pami arah prakowi tarü büah khai. Nami khin khe kowh mang miuüa dow kachakuüa nget maru iun 600,000 ia chekhai. Nami klen kowi amatni tut-e dow masiuüa hai ngeuüa paw tawi uowi chekhai.38Amatni hown dow akeng maru-uüa hai chia hai ruapur hawmh paw thum aiukma tawi mang pathum chekhai.39Aigupta pren hownia kowh amatni uang pawla mih kawmdi lawkia dow tiama rawng kowi thawpla kawm büah khai. Aigupta pren hownia uang lawt khe sakkrowng büah lai rakowi amatni dow tuah khowm padow kawmdi kowi ia thela büah dowi chekhai. Now tiama rawng kowi kowh nacha nakhamah kown mih paw amatni dow tawngpaw nowng thawpla dowi chekhai.40Aigupta pren kowi Israeluüa uowila mih dow 430 ning mowr chekhai.41Now 430 ning chur mih ni khe dow Aigupta pren hownia CHAKRAMANG kowh maru-uüa maten lawt khai bowt.42Nami iak dow Israeluüa kowi Aigupta pren hownia CHAKRAMANG uang lawtla now tawi chawngah khai. Naiawng rakowi ning towng kowh Takat Pawi iak dow nakrü uar pauar chi kownkow CHAKRAMANG vüi chowngchowng saksakma Israeluüa asun takla reng chekhai.43Nami kung kowi Mosi hai Arawn iüah kowi CHAKRAMANG tek pe mih, “Mami dow Takat Pawi rirow chekhai: Takat Pawi kowi kowh chakkham dow akeng chenchapuüa tawi ia cha kown nadowi.44Nachenganchepaw tangka hown kowh ranah mih nar dow hiah khampha uanpik khai hanow tawi ia cha kown.45Tawkchedow enni tut-e kowh uang tawi uowi mih hai tangka hown kowh uang tawi tangah mih akeng chenchapuüa dow tawi nowng cha kown nadowi.46Amia kim kowi chow ngen tawncher mih nami kim kowi tawncher nga dow nacha kown takla. Nami chaknga dow prang kowi naia lawtla kown nadowi. Now ahut paw lowkchow khowm naia klowkta kown nadowi.47“Nami pawi dow Israeluüa maten mih nasun kown takla.48Enni pungmadawng kowi kowh tawi uowi mih akeng chenchapuüa che CHAKRAMANG vüi nami Takat Pawi tawi sun kown nau kowh chalow now amatni kimchak kachakuüa maten narik hiata khampha uanpik kown takla. Nami kung kowi chiang Israeluüa iawng natawi ia sun kown. Nachenganchepaw hiah khampha uanpik dowi mih maru dow nami pawi kowi kowh chakkham natawi ia cha kown nadowi.49Mami ana dow enni Israeluüa vüi hai enni tut-e kowh uang tawi uowi mih akeng chenchapuüa vüi hown akat sang chekhai,” pakhai.50Now Mosi hai Arawn iüah kowi kowh CHAKRAMANG peah ana iawng Israeluüa dow chang khai bowt.51Nami ni khe dow CHAKRAMANG mih Israeluüa kowi siphai hawmh iawng Aigupta pren hownia uang lawtla khai.
The Seed Company