Uown Lawt14
Israeluüa kowi Aigupta siphai hawmh krawiah mih
1Nami kung kowi CHAKRAMANG tek pe Mosi mih,2“Mami laiklow Israeluüa kowi kowtek pe diah: Kung prakowi pacham plan büah iawk lah, now Pi-Hahirawt hai Balzephawn marow pur prakowi pacham khup tangbung büah lah. Nami dow Mikdawl marow hownia sata prakowi kowh mangla mih tiama dawnglang kowi chekhai.3Nakowi enni khup tangbung mih khita hanow Faraw ka tuak kown mih, ‘Israeluüa takuowng mih chowbowt, now süngrüp süngkangma kowi takhang büah mih chowbowt,’ napa kown.4Faraw kowh saktuak mih akhawtma ang nachangta pe kown. Naiawng rakowi aia dow Israeluüa kowi nauang krawiah kown. Nahanow Faraw hai aia kowh siphai hawmh kowi dow ang nape sumah hanow ang kowh kraingra ang tüngah kown. Nami hownia dow ang CHAKRAMANG chekhai pami Aiguptauüa natuk bowt kown,” pape khai. Now Israeluüa dow CHAKRAMANG tek iawng chang khai bowt.5Israeluüa powt khai bowt pami satang dow Faraw tawi ta khai bowt. Naiawng rakowi Faraw hai aia kowh maru iukuüa dow saktuak taklowi khai bowt. Amatni dow tatek mih, “Tawngplawng kowchow Israeluüa kowi a-i tuk pe powtah khai? A-i mata nar bowk mih chowbowt lowmow!” pabüah khai.6Nahanow Faraw dow nakamrüt pe aia kowh kawrnga kari kownkow peah ana khai, now aia kowh siphai hawmh kowi kuala now pawla khai.7Aia dow aia kowh lang iung mih kawrnga kari 600 pawla klen kowi Aigupta pren kowi kowh akeng mih kawrnga kari maten paw pawla bowk khai. Kawrnga kari lowk kowi siphai aluchow mih uowi lowk ia chi chekhai.8Aigupta mang kowh saktuak dow akhawtma CHAKRAMANG changta pe khai. Naiawng rakowi Faraw dow sakkraingma hown powt khowk mih Israeluüa kung kowkawi krawi khai bowt.9Aia kowh kawrnga maten hai kawrnga kari, kawrnga kowi kowh chowm mih hai siphai hawmh kowi pawla now aia dow Israeluüa kowi kowkawi krawi khai, now Israeluüa uowi rah hown atawnchow re-e kowting büah khai bowt. Nami khin khe Israeluüa uowi mih dow Balzephawn marow hown tatang klowk mih Pi-Hahirawt marow re-e kowh sata pang kowi chekhai.10Faraw hai siphai hawmuüa amatni kung kowi uang kawikrawi mih dow Israeluüa khita khai. Naiawng rakowi Israeluüa dow kram lai bowt kowh CHAKRAMANG tut-e nguk büah kar büah khai.11Amatni dow Mosi kowi tek pe mih, “Aigupta pren kowi tadupra uowi dowi chekhai bow? Tawngplawng kowchow süngrüp süngkangma kowi nakowngta anging kownkow en uang tuk pawla anging khai? Tawngplawng kowchow naiawng en tuk chang anging khai? Tawngplawng kowchow Aigupta pren hownia en uang tuk lawtla anging khai?12Aigupta pren kowi uowi reng tak khe, ‘Makowi pe uowi anging phülü towbowt. Aigupta maru-uüa kowh nar lup anging chang phülü kown taih,’ pami anging tek en khowk nadowi bow? Mami süngrüp süngkangma kowi kowng mih lak-e Aigupta maru-uüa kowh nar lup chang phülü mih che lang iung rowt tak chowdiah,” pabüah khai.13Nakhowk khe Mosi tek pe Israeluüa mih, “Hangkow kram büah. Uowi phülü büah taih. Tawng iawng chow ani kowh CHAKRAMANG nalawng enni kown mih phai mü büa diah. Ani kowh enni khi-ah mih Aigupta maru-uüa kowi dow tawng nam khe paw enni nakhi-ah iawk kown nadowi bowt.14CHAKRAMANG matia ngengche mih enni vüi natasen kown taih. Rarimma phai uowi büah,” pape khai.15Nami kung kowi CHAKRAMANG tek pe Mosi mih, “Tawngplawng kowchow ang tut-e en uang tuk kar khai? Pur prakowi nathüa kown mih phai Israeluüa kowi tek pe diah.16En kowh raitua dowkah now sata tui prakowi haiparah diah, now sata tui dow nataak kown towbowt. Nahanow sata phai akang khawngma mih iawng Israeluüa nowng mang kown towbowt.17Aigupta maru-uüa kowh saktuak akhawtma ang nachangta pe kown. Naiawng rakowi amatni dow enni kung kowi nauang krawi kown. Now Faraw hai aia kowh siphai hawmh hown kawrnga kari hai kawrnga kowi kowh chowm miuüa dow ang kowh kraingra tüng müa nachowng kown.18Nami awdara lup khita hanow ang dow CHAKRAMANG chekhai pami Aigupta maru-uüa natuk bowt kown,” pakhai.19Nakhowk khe Israeluüa pur kowi kowh rik mang reng mih Thurai kowh kramamu dow Israeluüa kung prakowi kowuowi khai bowt. Now uangnim iowng chunglung mih paw amatni pur hownia süt hanow amatni kung kowi kowiowng khai.20Nami uangnim dow Aiguptauüa kowh uowi rah hown Israeluüa kowh uowi rah takra kowi hing uowi hüah khai. Naiawng rakowi uar-e khe paw Israeluüa prakowi dow anowima chekhai. Nachenganchepaw Aigupta maru-uüa pra dow aiiuma chekhai. Naiawng kowh Israeluüa uowi rah prakowi Aigupta maru-uüa mih uar prowt chepaw kownowng kowi dowi chekhai.21Akung kowi Mosi dow aia kowh rut mih sata prakowi haiparah khai. Now CHAKRAMANG mih satlawt li kowi uar prowt akürma pe uangah hanow sata tui kowi pe taakah khai. Aia dow sata tui kowi pe taakah lang hanow sata phai iawng akang khawngma mih tiama thawp pe lowk khai.22Now Israeluüa dow sata tui takra kowi kowh sata phai akang khawngma mih iawng haimang khai bowt. Sata tui dow amatni kowh hawmlawm pra hown lakuai prakowi tap iawng iowng hüah khai.23Nami khita hanow Aiguptauüa dow Israeluüa kung kowi kowkawi krawi khai. Faraw kowh kawrnga maten hai kawrnga kari hai kawrnga kowi kowh chowm mih srui Israeluüa kung kowi sata tui takra iawng kowkawi krawi khai.24Now uarthowi ria prakowi dow CHAKRAMANG mih uangnim hai maih lün iowng chunglung mih dawng hownia Aigupta siphaiuüa prakowi haitang mü khai, now Aigupta maru-uüa kowi mih peah takrow takraira khai bowt.25Aia dow Aigupta maru-uüa kowh kawrnga kari khawk ün chowita pe nak khai. Naiawng rakowi Aigupta maru-uüa dow kawrnga kari hown nalün kown mih lainowmma krat khai. Aigupta maru-uüa tatek mih, “Chu, a-i powt bowt lah. Israeluüa vüi CHAKRAMANG matia dowk a-i tasen mih chowbowt,” pakhai.26Nakhowk khe CHAKRAMANG tek pe Mosi mih, “En kowh rut mih sata tui prakowi haiparah iawk diah. Nahanow Aigupta maru-uüa hown amatni kowh kawrnga kari hai kawrnga kowi kowh chowm miuüa luk kowi tui nauang limah kown towbowt,” pape khai.27Nakhowk khe Mosi dow aia kowh rut mih sata tui prakowi haiparah khai, nahanow sata tui dow uarthowi hown akrowksang aiawng uowi iawng kutplan uowi khai bowt. Nami khin khe Aigupta maru-uüa dow hawmlawm pra powt lai, lakuai pra powt lai krawi powt khai. Nachenganchepaw CHAKRAMANG mih amatni kowi dow sata tui hown mumta klum khai.28Sata tui dow aiawng uowi iawng plankut uowi hanow Israeluüa kung kowi kowh uang kawikrawi mih kawrnga kari hai kawrnga kowi kowh chowm miuüa hai Faraw kowh siphai hawmh maten kowi limta bowk khai. Amatni dow lowk iachow paw plai dowi chekhai.29Israeluüa tarapchedow sata tui takra kowi kowh bawn kangma iawng haiia mang khai. Sata tui dow amatni kowh hawmlawm pra hown lakuai prakowi tap iawng iowng hüah khai.30Naiawng hai nami ni dow Aigupta maru-uüa rut hownia Israeluüa kowi CHAKRAMANG lawngah khai. Aigupta maru-uüa kowh uak dow sata pang kowi takuakla pan mih Israeluüa khi khai.31Naiawng hai CHAKRAMANG dow aia kowh kür akraingma mih Aigupta maru-uüa luk kowi tawngah khai. Nami khita hanow Israeluüa dow CHAKRAMANG kowi kram büah khai bowt. Amatni dow CHAKRAMANG hai Mosi kowi owmah khai bowt.The Seed Company