Esther8
1Nami ni khe mang Ahasuer dow Jihudiuüa kowh ransu Haman kowh dawngthawnguan maten masiuüa mang Esther kowi peta bowk khai. Now Esther dow Mawrdekai mih aia kowh rakma tawng pami mang kowi tek pe khai bowt. Nami hownia bowt now Mawrdekai mih mang pur kowi nowng uang khai bowt.2Mang dow aia kowh mur uowi mih rutbüt aia rut hownia klüpah hanow Mawrdekai kowi peah khai. Nami rutbüt dow Haman kowi peah akat kowh mangkri plan pawta pe mih chekhai. Now Esther dow Mawrdekai kowi mih Haman kowh dawngthawnguan naming nakhet kown mih kurdik peah khai.3Nami kung kowi dow Esther mih mangkri hown uang plan talawp khai iawk. Aia dow mang kowi dowk pe khawk hanow uang kar khai. Now Jihudiuüa kowi nasaita kownkow Agag chenchap Haman kowh angakma mih kamrütra nataingta kown mih mangkri kowi aia tek pe khai.4Nakhowk khe mangkri dow aia kowh kuh raitua mih Esther prakowi iu iaw pe khai, now Esther awr rü hanow mangkri pur kowi iowng khai.5Esther tek pe mih, “Mangkri, en che nauta khai, en che saksing sana ang khai, lup iungma pahai en che ka tuak khai, now en che sak-ih ang khai hanow Jihudiuüa kowi nasai dowi kownkow en pren kowi kowh pren powng maten kowi krawi lawt ana lowk diah. Jihudiuüa maten kowi nasaita kownkow Agag chenchap Hamedatha kowh chapa Haman krawi sakta cha mih iawng nachang dowi kownkow krawi phuang diah.6Ang matia chenchap hai ang matia maru-uüa luk kowi piakra nauang ting kown mih tawng iawng chow ang namüta hüah kown?” pakhai.7Nahanow masiuüa mang Esther hai Jihudi chenchap Mawrdekai iüah kowi mang Ahasuer tek pe mih, “Haman dow Jihudiuüa kowi nasaita kown mih kamrüt khai. Naiawng rakowi ang ana hown maru kawmuüa dow aia kowi mih singh hown awkta khowk. Now aia kowh dawngthawnguan dow Esther kowi ang peta khowk.8Enni Jihudiuüa kowi nalawngla kownkow enchi nau iawng ang ming hown plan rui chasak iüah aram diah, now nami chasak kowi kowh ana mih nowng klowila dowi kownkow mang kowh ming uowi mih rutbüt hown tuk pe mur diah. Tawngplawng kowchow panow mang ming hai mang rutbüt hown tukta mur mih ana pek dow nowng klowi dowi bowt chekhai,” pape khai.9Naiawng rakowi sum la mih Sivan la 23 ni khe Mawrdekai dow mang kowh cha rui miuüa kowi kuaah khai, now Mawrdekai tek iawng amatni dow rui chasak lowk khai. Nami chasak dow Jihudiuüa maten, pren kruitown miuüa, maru iukuüa, now India pren hownia Ethiawpia pren mowr mih pren powng 127 klüng kowi kowh maru iukuüa maten tut-e krawi sak pe büah khai. Naiawng cha rui miuüa krawi sak cha mih dow pren powng towng kowi kowh chowlowkkow maru-uüa kowh cha hai chowlowkkow chenchap lai hown chekhai. Now Jihudiuüa kowi paw amatni kowh chenchap cha hai lai hown krawi sak pe büah khai.10Cha rui miuüa dow mang Ahasuer ming hown rui chasak khai, now nami chasak kowi mang ming uowi mih rutbüt hown Mawrdekai tuk pe mur khai. Now naiawngün chasak dow mang kowh iowm lang len mih kawrnga sangrum hown satang phowng miuüa kowi Mawrdekai krawi pe saah khai.11Mang Ahasuer kowh nami chasak kowi dow laipre la mih Adar la kowi laisum ni khe marow towng hai pren powng maten kowi kowh Jihudiuüa mih arasang nataiua uowi hanow kowmatia kowi naia towkala kown mih alow arui uowi chekhai. Now amatni Jihudiuüa hai amatni kowh masi chauüa kowi akeng chenchapuüa hai akeng mih pren powng kowi kowh maru-uüa uang sen miuüa kowi asaima amatni nahawt ia saita kown mih alow paw uowi chekhai. Nami klen kowi naiawngün ransu-uüa kowh dawngthawnguan amatni naia paw kown mih alow paw uowi chekhai.13Mang kowh ana dow rirow iawng pren powng maten kowi nakrawi phuang kown mih hai maru maten kowi nakrawi pe tuk pe taah kown mih laiklow uowi chekhai. Maru kawmuüa kowi naiawng krawi tek pe mih dow ransu-uüa kowi naia sat pe klai kownkow akhin khe Jihudiuüa mih kamrütiama naia uowila kownkow chekhai.14Naiawng mang peah ana rakowi satang phowng miuüa dow mang kowh iowm lang len mih kawrnga hown cham tarü büah khai bowt. Nami chasak kowi kowh ana dow Susa marow kri kowi paw phuangla khai.15Nami kung kowi Mawrdekai dow mangkri pur hownia lawt khai bowt. Nakhowk khe aia dow aruachow hai akawchow mih mang tawnguat khupma chekhai, now nami luk kowi dow arikchow panow adipükchow mih la hown kowh kowrmow khup pe khai. Aia dow kuh hown kowh aiukma mih mang lukruk krukma chekhai. Susa marowchakuüa dow chasak kowi kowh rirow sar tata hanow how sawmlawm se piaw büah khai.16Jihudiuüa dow lainowmma piaw büah pabüah khai, now ka ringkawra büah khai.17Mang kowh ana krawi ting mih pren maten hai marow towng kowi kowh Jihudiuüa dow piaw büah rakowi chang pawi büah khai. Now akeng chenchap hownia tawngbak mih maru-uüa dow tawi owm Jihudi kawngmu hanow tawi kham Jihudi chenchap ne khai. Tawngplawng kowchow panow akeng chenchap maru-uüa dow amatni kowi Jihudiuüa changah kown mih kowi kram büah khai bowt.
The Seed Company