Esther9
1Now mang kowh ana pek iawng nachang kown mih khin Adar la laisum ni mih dow uang ting khai bowt. Nami ni khe ransu-uüa dow Jihudiuüa kowi nowng senta kown mih sakowmma chowdiah. Nachenganchepaw ransu-uüa tuakta iawng phaw dowi kowi amatni kowi mih Jihudiuüa plan nowng senta ian.2Amatni kowi kowh senah kown nau miuüa kowi nasenah kownkow Jihudiuüa dow mang Ahasuer pren kowi kowh pren powng maten kowi amatni chowlowkkow marow kowi takua talawm büah khai. Naiawng rakowi amatni kowi dow akeng chenchapuüa kramah kowh uang senah khe sum reng chekhai.3Now pren powng maten kowi kowh maru iukuüa, pren kruitown miuüa hai mang kowh akeng mih maru iukuüa dow Mawrdekai kowi kram kowh Jihudiuüa kowi tawi khowngah khai.4Tawngplawng kowchow panow Mawrdekai dow mang kim kowi kowh lang kri mih chekhai. Aia kowh ming iung nang iung dow pren powng maten kowi cham krawi tahowng khai. Naiawng hai aia dow pani kowh pani uang kür ngamlam khai.5Jihudiuüa dow amatni kowh ransu-uüa maten kowi saidawng hown krawi saita bowk khai, now amatni kowi kowh suiah miuüa kowi paw nau iawng changah büah khai.6Jihudiuüa dow Susa marow kri kowi nget maru iun 500 ia kowi saita khai.7Naiawngün pungmadawng kowi amatni kowh ransu Haman kowh chapa hamüt ia kowi paw saila büah khai. Naiawngünuüa dow Parsandatha, Dalfawn, Aspatha, Poratha, Adalia, Aridatha, Parmasta, Arisai, Aridai hai Vaizatha büah chekhai. Tawkche amatni dow tawng iawng mih uanh paw pawla büah dowi chekhai11Now Susa marow kri kowi kowh saita mih maru iun mut dow nami ni khe mang kowi uang tek pe khai.12Nakhowk khe masiuüa mang Esther kowi mang tek pe mih, “Susa marow kri kowi Jihudiuüa saita maru 500 ia khowk, now Haman kowh chapa hamüt ia kowi paw saila khowk. Makowi che naiawng khowt saita khowk now pren powng kowi khowm mün ia khowk chow saita mih amia chow tuk? Kawmat tawng chow en nau tak? En nau mih ang nape en kown” pape khai.13Now Esther klangah mih, “Mangkri, en che sak-ih khai hanow Susa marow kri kowi ani kowh Jihudiuüa chang iawng tharau paw nachang iawk kown mih alow peah diah, now Haman kowh chapa hamüt ia kowi phükta hüah mih singh kowi pacham tarta hüah lah,” pakhai.14Now mangkri dow naiawng nachang kown mih lawt ana khai, now mang kowh ana dow Susa marow kri kowi krawi phuang khai. Naiawng rakowi maru kawmuüa dow Haman kowh chapa hamüt ia kowi phükta hüah mih singh kowi tarah büah khai.15Nami kung kowi paw Jihudiuüa mih Adar la laitali ni mih ni khe Susa marow kri kowi uang takua talawm büah hanow sai maru 300 ia khai iawk. Nachenganchepaw amatni dow tawng iawng mih uanh paw pawla büah dowi iawk chekhai.16Nami khin khe mang kowh pren powng kowi kowh akeng mih Jihudiuüa maten paw amatni kowh ransu-uüa rut hownia kowmatia kowi natowkala kownkow arasang takua talawm büah khai. Nakhowk khe amatni dow ransu-uüa 75,000 ia kowi saita khai. Tawkche tawng iawng mih uanh paw pawla büah dowi chekhai.17Naiawngün phaw mih dow Adar la laisum ni khe chekhai, now laitali ni mih ni khe dow tanai büah khai. Nami ni dow chang pawi hanow piaw büah pabüah khai.18Tawkche Susa marow kri kowi kowh Jihudiuüa dow Adar la laisum ni hai laitali ni mih ni khe paw sai maru reng tak chekhai, now laitanga ni mih ni khe dow tanai büah khai. Nami ni dow chang pawi hanow piaw büah khai.19Naiawng rakowi ani mowr pat kua kowi kowh uowi mih Jihudiuüa dow Adar la laitali ni mih ni khe chang pawi hanow piaw büah pabüah reng khai, now lowkkowlowk kim kowi tasa chakkham büah reng khai.20Mawrdekai dow naiawngün phaw mih lawnguan maten ruiah khai, now mang Ahasuer pren kowi kowh atawnchow hai alakma kowi kowh uowi mih Jihudiuüa kowi krawi sak pe chasak khai.21Now Jihudiuüa kowi dow ning towng Adar la kowi kowh laitali hai laitanga ni khe nasun pawi büah reng kownkow aia krawi peah ana khai.22Jihudiuüa kowi aia tek pe mih, “Nami ni dow chang pawi hanow apiaw apama enni nasunah kown, now lowkkowlowk kim kowi enni tasa chakkham kown. Nami klen kowi ngarawng ngaraima miuüa kowi enni nape awmrawm sung kown. Tawngplawng kowchow panow a-i kowh ransu-uüa rut hownia a-i ia plai mih dow nami pre ni khe chekhai, now kar ngukra hai taprüa taiiara takcha awmrawmra hai piawra uang ting mih dow nami la kowi chowtaih,” pakhai.23Naiawng rakowi Jihudiuüa dow Mawrdekai krawi rui pe ana mih iawng chang kown mih nauta khai. Amatni dow nami pre ni nachang pawi kown mih nauta khai24Agag krungchak Hamedatha chapa Haman dow Jihudiuüa kowh ransu chekhai, aia dow Jihudi chenchapuüa kowi nasaita bowk kownkow sangkrang khai. Naiawng rakowi aia dow kuak plang khai.25Nachenganchepaw Esther dow mang tut-e uangah hanow Jihudiuüa kowi Haman kingküaah mih lawnguan tek pe khai, now mang dow Jihudiuüa kowi Haman nasaiah kownkow sangkrang mih takcha kowi Haman luk kowi nami ripra napeah kownkow lawt ana khai. Nahanow Haman hai achapauüa kowi mih singh kowi tarta hüah khai.26Naiawng rakowi nami pawi ming dow Pur pami hownia Purim pahai rükah khai. Mawrdekai krawi peta ana mih rakowi hai Jihudiuüa luk kowi naiawng uang phaw mih rakowi Jihudiuüa dow amatni vüi thawp ri lowk khai. Nami ri dow amatni, amatni kowh krungchakuüa hai tawi chowng Jihudi miuüa maten Mawrdekai kowh ana pek iawng khowm bowkta mih khin kowi ning towng nami pre ni chi nachang pawi ngengche kown mih chekhai.28Nami pawi pre ni mih dow ning towng pren powng towng, marow towng, kimchak towng chowngchowng saksakma natukah reng kown, now nasunah reng kown. Nahanow Jihudiuüa pungmadawng kowi nami pre ni mih Purim pawi sun katpaw nataing kown nadowi bowt, now amatni krungchakuüa sak hownia nami laiklow mih natama kown nadowi bowt.29Nami kung kowi Abihail chama masiuüa mang Esther hai Jihudi chenchap Mawrdekai dow Purim pawi pami ari anikma nachang kownkow ana khawtma hown plan ta rui chasak lowk khai iawk.30Now Mawrdekai dow taking tasangra hai thaulangra laiklow mih mang Ahasuer kowh 127 klüng mih pren powng kowi kowh Jihudiuüa tut-e chasak hown krawi sa khai.31Naiawng aia krawi sak cha mih dow Mawrdekai hai Esther iüah kowh alow pek iawng khowmta bowkta mih ni khe Purim pawi pre ni naia sunla kownkow chekhai. Amatni vüi hai amatni krungchakuüa tawng khe chow nasun hawm khang kown mih hai taprüa tanguk kown mih sangkrang büah khai. Nami iawng nami pawi paw naia sunla kownkow sangkrang büah khai.32Now nami Purim pawi ri dow Esther kowh ana hown anikma thawpah büah khai, now nami dow ruiah khai.
The Seed Company