Lai Ching2
1Ang tatuak mih, “Chownglawng kowi apiaw apama hai asowrma ang sam uowi matak, tawng iawng chü,” pakhai. Tawkchedow naiawngün piawpara hai asowr paw auan uowi dowi chekhai.2Naiawng rakowi ang tatek mih, “Ren kowi paw thukra uowi lowmow; apiaw apama uowi chepaw tawngpaw mrawk dowi lowmow,” pakhai.3Now pua khe thuklama uowi mih sowr tuk kown nau kowh atawm tukma ang kham rak khai. Mukuang dak kowi kowh uowi mih maru-uüa kowh chownglawng dow atownchow taih chekhai. Nami chownglawng kowi — chanlaima uowi mih bow, thuklama uowi mih bow — lang iung mih natukla kownkow naiawng ang chaingah khai.4Kri kraingma mih lup ahuma khowk ang chang. Ang matia vüi kim paw ahuma khowk ang thawp, now grep krum paw ahuma ang thawp khai.5Now aiukma mih hai asowmchow mih bakan paw ahuma ang thawpah hanow chaah auih mih singh chap maten ang chowk pe khai.6Now naiawngün uih singh maten kowi naia thutla tui reng kownkow ang thai pe kanh khai.7Narma hai narla paw akawmma ang ran khai, now ang kim kowi kowh dia mih narma narla paw akawmma chekhai. Ang dowi rawn kowh Jerusalem kowi uowi miuüa maten lak-e paw chia hai ruapur ang kowh lang hu chekhai.8Kuh hai tai hown akeng pren manguüa hai pren powng manguüa kowh dawngthawnguan paw ang krawi kua khai. Nami klen kowi masiuüa hai kachakuüa meng sara ün, kachakuüa kowi napela awmrawmra kownkow changla masi mih narma ün ahuma ang tut-e uowi khai.9Naiawng hown ang dowi rawn kowh Jerusalem marow kowi uowi miuüa lak-e paw ang lang kri kraing chekhai. Nakhowk khe paw chanlaira mih kruitown ang reng tak chekhai.10Ang nau mih srui iawng ang chang khai, now pe ang awmrawmra mih chap maten ang chang khai. Ang changah mih lup maten luk kowi ang ka piawra reng chekhai. Ang kawmah mih maten kowi kowh awmrawm sung dow nami piawra towbowt chekhai.11Nachenganchepaw ang changah mih lup maten hai ang kawmah mih lawnguan kowi ang krawi tuakah hanow naiawngün dow tawng sia paw auan uowi dowi mih ang tuk khai. Naiawngün dow li kung kowi kowh cham krawi iowm mih iawng kangowh taih chekhai. Mukuang dak kowi kowh uowi mih chap dow tawng mih paw mrawkra uowi dowi chekhai.12Nami kung kowi dow chanlaira hai bualara lawnguan kowi ang krawi tuak khai. Rik uowi mih manguüa iawng uang ta uowi mih manguüa nachang lup kown mih a-i tuk tak bow?13Aiiu lak-e anowi lang iung; nami iawng bualama mih lak-e chanlaima mih lang iung padow ang ka tuak chowdiah.14Tawngplawng kowchow panow chanlaima mih maru dow aia mangla mih tiama iung mih iung dowi mih tuk mat chekhai. Tawkche thuklama mih maru dow aia mangla mih tiama iung mih iung dowi mih tuk mat dowi chekhai. Nachenganchepaw achur khe dow amatchi pre ia trui katsang taih; amatchi pre ia trui kowng reng chekhai.15Nami kung kowi dow ang tatek mih, “Ang kowh chownglawng paw bualama mih maru kowh chownglawng chur iawng taih lowmow nachur kown. Naiawng taih hanow maiawng khowt ang chanlai mih tawng chow mrawk? Chanlai mih paw tawngpaw auan uowi dowi lowmow,” pakhai.16Bualama mih maru kowi akrama sak kowi maru towah dowi mih iawng chanlaima mih maru kowi paw akrama sak kowi maru towah dowi; akung kowi dow amatchi pre ia trui kowi maru tamata reng. Bualama mih maru kowng iawng chanlaima mih maru paw kowng reng.17Naiawng rakowi ang matia kowh chownglawng kowi ang uown suiah khai. Tawngplawng kowchow panow mukuang dak kowi kowh changah mih lup maten dow ang tut-e kowmatia tatowk kawm mih iawng taih chekhai. Naiawngün dow tawngpaw auan uowi dowi mih kangowh chekhai; naiawngün dow li kung kowi kowh cham krawi iowm mih iawng krowngchow taih chekhai.18Mukuang dak kowi kowh akawm kratma hown ang kramah mih uanh maten kowi ang suiah khai bowt. Tawngplawng kowchow panow naiawngün uanh maten dow ang kung kowi kowh nauang ta uowi kown mih maru vüi nata towla hüah kown takla chekhai.19Nami maru dow chanlaima bow bualama bow mih miapaw tuk dowi. Nachenganchepaw aia dow ang kramah mih uanh maten asowrma nauang ta sun kown. Naiawng mih chownglawng paw tawngpaw auan uowi dowi chekhai.20Naiawng rakowi mukuang dak kowi kowh akawm akratma hown ang kramah mih uanh maten rakowi ang kowh sak mih lainowmma piak khai.21Tawngplawng kowchow panow chanlaira, prengia hai tukra hown maru chang lup reng. Tawkchedow nami kung kowi aia kowh uowi mih maten tawngpaw tawi kawm dowi mih maru vüi ta towla hüah kla chekhai. Nami paw tawngpaw auan uowi dowi hai sak kowi rau müa chowtaih.22Mukuang dak kowi kowh maru-uüa kawmah kratah mih hai tuakah mih sung tawng chow mrawkra uowi?23Ni towng aia kowh lup changra kowi arau hai sak-hiara uowi; uar-e paw aia kowh saktuak mih ka tanai dowi chekhai. Nami paw tawngpaw auan uowi dowi chekhai.24Naiawng taih hanow lusa maru-uüa vüi cha mih hai kham mih hown kowmatia lup luk kowi sak-ih mih klen kowi tawngpaw lang iung mih uowi dowi bowt. Naiawngün dow Thurai hownia kowh uang ting mih pami ang owm chekhai.25Tawngplawng kowchow panow Thurai che uang pe dowi hanow miapaw ka cha dowi hai ka piaw dowi chekhai.26Thurai sak-ih iawng uowi mih maru kowi dow Thurai mih chanlaira, prengia hai awmrawmra peah reng. Maru ngakuüa kowi dow nakram dawngthawnguan hanow nakrümah kown mih lup Thurai peah khai. Tawkche akung kowi dow naiawngün dawngthawnguan mih aia sak-ih iawng uowi miuüa kowi Thurai peah khai. Naiawng kram dawngthawnguan mih paw tawngpaw auan uowi dowi chekhai. Naiawngün paw li kung kowi kowh cham krawi iowm mih iawng krowngchow taih chekhai.
The Seed Company