Lai Ching1
1Mami dow prengia pek mih kowh laiklow chekhai. Aia dow Jerusalem marow kowi kowh mang chekhai, now aia kowh pa ming dow David chekhai.2Aia tek mih,“Tawng chap paw auan uowi dowi!Lusa kowi dow tawng sia paw nik dowi chekhai.Lusa kowi kowh uowi mih chap maten tawngpaw auan uowi dowi,” pakhai.3Mukuang dak kowi kowh maru-uüa mih lainowmma chang lup khai.Tawkche naiawng khowt kawm mih tawng chow mrawkra uowi?4Lusa kowi dow pachowng mih chur hanow uang ta uowi pachowng iawk.Nachenganchepaw lusa dow chowngchowng saksakma uowi reng chekhai.5Sat paw uang lawt hanow kutplan kup reng,now aia lawtla reng mih rah kowi kowplan reng chekhai.6Li dow mrawkphak prakowi kowhutla hanow tawngphak prakowi cham takui reng,naiawng hai aia dow taui lutlut krawi mang reng chekhai.7Aw maten kowi kowh tui dow sata kowi kowhawr reng.Nachenganchepaw sata tui dow katpaw tek dowi chekhai.Akung kowi dow tui mih aw kowi kowplan kowi khai,now sata kowi kowplan hawr khai iawk.8Lusa kowi dow lowra chap mih tuak kawm tuak krat müa chowtaih;nami lawnguan dow lawp reng chepaw achur uowi dowi chekhai.Mün khowt chow khi khowk chepaw mik mih du dowi chekhai,now mün khowt chow ta khowk chepaw param mih du dowi chekhai.9Phaw khowk mih paw naplan phaw iawk kown,now changta khowk mih paw naplan changah iawk kown.Mukuang dak kowi kowh uowi mih dow tawngpaw asar uowi dowi chekhai.10“Mü madiah, mami dow asar chaw,” pahai maru tekah mih sia nauowi kown.Tawkche nami dow alai kowh a-i uowi dowi rawn hownia uowi mih chowbowt.11Alai chowng kowh maru-uüa kowh laiklow mih miapaw ka tuak dowi bowt;now pur pra kowh nauang ta dia kown miuüa kowh laiklow pawamatni kung kowi kowh ta dia miuüa mih sak kowi natowah kown nadowi.12Ang dow prengia iung pek mih maru chekhai, now Jerusalem marow kowi kowh Israeluüa luk kowi chowm mang mih chekhai.13Mukuang dak kowi kowh changah mih chap maten chanlaira hown nachaingah hai natasang kownkow ang tatuak khai. Naiawngün hownia lusa maru luk kowi ngarera adikma Thurai tangta pe hüah mih ang khi khai.14Mukuang dak kowi kowh changah mih sia maten ang khi khai; naiawngün dow tawng sia paw auan uowi dowi chekhai. Naiawngün dow li kung kowi kowh krawi iowm mih iawng krowngchow taih chekhai.15Takhawn khowk mih kowi dow nowng tengah dowi bowt,now tawngpaw uowi dowi mih chap kowi dow kaah arüa dowi chekhai.16Sakdawng kowi ang tatek mih, “Jerusalem marow kowi ang dowi rawn kowh rik chowm mang miuüa lak-e ang lang chanlai; ang kowh dow prengia hai chanlaira ahuma,” pakhai.17Nami kung kowi dow chanlaima mih hai bualama mih, now prengia chakma mih hai thuklama mih lawnguan kowi natuk kown mih ang sangkrang khai. Naiawngün tukra nau mih paw li kung kowi cham krawi iowm mih iawng krowngchow taih pami ang tuk khai.18Tawngplawng kowchow panow chanlaira uang hu now sak-hiara paw tawi hu ngamlam chekhai, now prengia uang hu now akrat pusara paw tawi hu ngamlam chekhai.
The Seed Company