Lai Ching3
1Lowra chap kowh akhin khowm bowk taia uowi bowk chekhai;mukuang dak kowi kowh lup maten vüi akhin uowi bowk chekhai.2Uang dia khin hai kowng khin uowi,achowk khin hai achawi khin paw uowi.3Nakowngta kown mih khin hai naiungah kown mih khin uowi,napiakta kown mih khin hai nachangah kown mih khin paw uowi.4Nakar kown mih khin hai naren kown mih khin uowi,nauowila uiting uangtak kown mih khin hai naplai kown mih khin paw uowi.5Nakuakta hua kown mih khin hai nakrawi kua hua kown mih khin uowi,tasakrau kowh tadawi kown mih khin hai tadawi dowi kown mih khin paw uowi.6Naka kown mih khin hai namata kown mih khin uowi,natowah kown mih khin hai nakuakta kown mih khin paw uowi.7Nathekta kown mih khin hai nasownah kown mih khin uowi,rarimma nauowi kown mih khin hai natek lai kown mih khin paw uowi.8Tasakrau kown mih khin hai tasui kown mih khin uowi,natasen kown mih khin hai taking tasangma nauowi kown mih khin paw uowi.9Chang lup mih maru aia kowh kawm rak ka tak bow?10Lusa maru luk kowi kowh Thurai tang pe kurdik mih ang khi khowk.11Aia dow lowra chap kowi akhin khe klangiungma thawpah khai. Aia dow chowngchowng saksakma mih lawnguan kowi natukla kown mih sakkraira lusa maru sak kowi tow pe khai. Nachenganchepaw auown hownia achur pat tawng chow aia chang mih dow lusa maru tuk dowi chekhai.12Lusa maru chownglawng kowi dow napiaw kown mih hai asowrma nauowi kown mih lak-e iung mih tawngpaw uowi dowi mih ang tuk;13lusa maru maten dow nacha nakham kown mih hai aia kowh lup maten luk kowi nasak-ih kown. Naiawngün dow Thurai uanh iawng pek chekhai.14Thurai changah mih srui dow chowngchowng saksakma uowi reng; naiawngün hown dow tawngpaw ia bawng dowi chekhai, now bat paw tawngpaw ia batta dowi chekhai. Naiawng Thurai chang mih dow lusa maru mih aia kowi ringkawma hown pacham kramah lah pakowh chekhai pami ang tuk.15Kawmat kowh uowi mih srui dow alai hownia kowh uowi mih chowbowt,pur pra kowh nauang phaw kown mih paw alai hownia phaw khowk chekhai,Tawngplawng kowchow panow phaw khowk mih paw Thurai mih plan pe phawah rengreng chekhai.16Nami klen kowi mukuang dak kowi kowh uowi miuüa tut-e aiung chang rah hai tara nowm chet rah kowi paw angak tawi uowi mih ang plan khi pachap iawk.17Naiawng rakowi ang ka tuak mih, “Maru iung hai maru ngak pre ia trui kowi Thurai nachet pe tara kown, tawngplawng kowchow panow Thurai tut-e dow lowra chap hai lup maten kowh khowm bowkta mih akhin uowi,” pakhai.18Lusa maru paw asadua iawng taih pami pacham tuk lah pakowh lusa maru kowi Thurai tüng pe amatra reng pami paw ang ka tuak khai.19Tawngplawng kowchow panow lusa maru luk kowi kowh phaw mih iawng asadua luk kowi paw phaw reng chekhai: Amatni dow hü sak riaria mih chowtaih, now amatni dow katsang kowng mih chowtaih. Nami pasia kowi dow lusa maru hown asadua mih tawngpaw taklowira uowi dowi chekhai. Tawngplawng kowchow panow tawng chap paw auan uowi dowi chekhai.20Lusa maru hai asadua mih arah katsang mih kowi mang reng; bawn hown kowh thawpah mih chekhai rakowi bawn chowtaih kutplan chowng iawk.21Lusa maru kowh lümla aluk prakowi pün pami hai asadua kowh lümla krawng dak kowi kup pami achima miapaw tuk dowi chekhai.22Naiawng rakowi kowmatia changah mih lup luk kowi awmrawm mih lak-e lusa maru vüi tawngpaw iung dowi bowt pami ang tatuk khai. A-i kowh kakbak dow nami towbowt, tawngplawng kowchow panow a-i kowng kung kowi dow tawng chow a-i naown kown mih miapaw nowng tek dowi chekhai.
The Seed Company