Plan Rui9
Israeluüa ka pren mih tachi tanawm rakowi nadowi
1“Israeluüa low, sünta büa diah! Ani dow enni napown Jawrdan aw kown chowbowt. Now enni lak-e kowh maru iun lang kawm mih hai lang kür mih chenchapuüa kowh pren dow enni nakowpowngta pe kown chowbowt. Amatni kowh marow dow aiukma kangowh chekhai, now marow tapat lut kowi kowh tap paw akro kuang dawnglang mowr chi chekhai.2Nami pren kowi kowh maru-uüa dow Anakuüa chekhai. Amatni dow akroma hai akürma kangowh chekhai. Amatni kowh lawnguan dow enni tuk khowk. Amatni kowi dow miapaw nowng senah dowi pami maru-uüa tek mih paw enni ta khowk chekhai.3Nachenganchepaw ani mih enni haipown Jawrdan aw khe CHAKRAMANG enni kowh Thurai dow kam iawmlawm mih maih iawng enni pur kowi narik mang kown pami sak kowi towah büa diah. Aia dow naiawngün chenchapuüa kowi enni tut-e nape sumah kown, now aia napiakta bowk kown. Enni tut-e CHAKRAMANG khamta iawng naiawngün maru-uüa kowi dow enni naprütta kown, now alenma enni napiakta kown.4“Naiawngün maru-uüa kowi CHAKRAMANG enni kowh Thurai prütta enni kung kowi dow, ‘Ang dow achinawmma chekhai rakowi mami pren nape powng ang kownkow makowi CHAKRAMANG uang pawla ang mih chekhai’ pami sakdawng kowi hangkow tuak büa diah. Naiawngün chenchapuüa kowi enni pur hownia CHAKRAMANG naprütta kown mih dow amatni kowh angak rakowi chowtaih; nami dow enni achinawmma mih rakowi nadowi.5Naiawngün chenchapuüa kowi aia naprütta enni kown mih dow amatni kowh ngak rakowi chowtaih. Nami dow enni achinawmma mih hai anowmma mih rakowi nadowi chekhai. Nami dow enni kowh pipu Abraham, Isak hai Jakawb büah tut-e aia khamah mih nape tachi-ah kownkow chekhai.6Enni achinawmma mih rakowi mami klangiungma mih pren CHAKRAMANG enni kowh Thurai pe powng enni mih nadowi pami tukah büah reng diah. Enni dow laiüama mih chenchap chekhai.7“Süngrüp süngkangma kowi enni uowi reng tak khe tawng iawng chow CHAKRAMANG kowi enni pe kunmarauah mih tuakah büah reng diah. Nami dow katpaw hangkow tamata büa diah. Aigupta pren hownia enni uang lawt mih ni hownia mami arah kowi uang ting mowr pat CHAKRAMANG kowi enni hing kingküata hüah chekhai.8Sinai hungh kowi khowm padow CHAKRAMANG kowi lainowmma enni towkah kunmarau khai. Naiawng rakowi aia dow napiakta enni kown chowdiah.9CHAKRAMANG mih enni hown tatow sangbowk laitawm khai. Nami sangbowk laitawm ruila mih huapher pre buk nakowpaw kownkow hungh luk kowi ang kowpün khai. Nami khin khe hungh luk kowi 40 ni hai 40 uar mowr ang uowila khai. Nami 40 ni hai 40 uar mowr mih tawngpaw cha paw ang cha dowi, now kham paw ang kham dowi chekhai.10Nami ni khe CHAKRAMANG pur kowi enni bowkbowk uang takua talawm khai. Nakhowk khe CHAKRAMANG dow hungh luk kowi maih hownia uang pe enni ana khai. Naiawngün ana pek maten dow nami huapher pre buk mih kowi aia rut hown aia ruiah khai.11Now 40 ni 40 uar kowi kung kowi dow CHAKRAMANG mih nami sangbowk laitawm huapher pre buk mih pe ang khai.12Nami kung kowi dow aia tek ang mih, ‘Alenma hungh hownia iu dowm diah. Tawngplawng kowchow panow Aigupta pren hownia kowh en uang lawtla mih maru-uüa piak bowk khowk. Amatni dow ang kowh ana pek nawngchow sang nuata khai bowt. Amatni dow amatni vüi kuh klaiah hanow thawp arup lowk khowk,’ pakhai.13“CHAKRAMANG plan tek ang mih, ‘Maiawngün maru-uüa kowi dow ang müah reng. Amatni dow laiüama mih chenchap pami ang tuk.14Hauang hang ang diah. Amatni kowi dow ang napiakta bowk kown, now lusa hownia amatni kowh ming dow ang namata kown. Nami kung kowi en hownia dow amatni lak-e lang kür hai lang kawm mih chenchap ang nathawpah kown,’ pakhai.15“Nami kung kowi dow sangbowk laitawm huapher pre buk mih dowkla now hungh hownia ang uang dowm khai. Nami khin khe paw hungh kowi dow maih lün reng tak chekhai.16Now CHAKRAMANG enni kowh Thurai luk kowi enni chang angak mih ang khi khai. Enni dow naphuchuaah kownkow kuh chawrah hanow enni thawp chia chah rup khai. CHAKRAMANG pe enni mih ana pek maten dow alenma enni nuata khai bowt.17Naiawng rakowi ang rut kowi kowh huapher pre buk mih dow ang iu theuta khai. Nami huapher pre buk mih dow enni pur kowi teu khai.18“Nami kung kowi paw CHAKRAMANG pur kowi 40 ni 40 uar ang kowtabawk khai iawk. Nami khin khe paw tawng chap paw ang cha ang kham dowi chekhai. Tawngplawng kowchow panow enni dow angak changra hownia CHAKRAMANG kowi pe kunmarauah khai.19CHAKRAMANG kowh kramra uowima mih kunmaraura dow lainowmma ang kram khai. Tawngplawng kowchow panow aia dow napiakta enni kownkow kamrütta khowk chowdiah. Nachenganchepaw CHAKRAMANG dow nami leng paw plan sünta ang laiklow khai.20Aia dow Arawn kowi paw kunmarau lai rakowi napiakta kownkow kamrütta khowk chowdiah. Nachenganchepaw Arawn vüi ang kowlü pe lawt hanow aia dow plan sünta ang khai iawk.21Enni thawp chia chah rup mih hownia enni chang angak khai. Naiawng rakowi nami chia chah rup dow maih kowi ang tikta enni khai. Nami kung kowi nami chia chah rup dow dinchow iawng adima ang changah hanow hungh hownia kowh uang hawr mih aw tui kowi kowh tuilowng kowi ang kuakah khai.22“Now Tebera, Masa hai Kibrawt-Hattava kowi paw CHAKRAMANG kowi enni pe kunmarauah khai.23Kades-Barnea hownia enni uang lawt mih khin khe CHAKRAMANG tek enni mih, ‘Ang pe enni mih pren kowi kowkowiah now kowpowng büa diah,’ pakhai. Nachenganchepaw CHAKRAMANG enni kowh Thurai kowi enni kingküaah khai. Aia kowi dow enni owmah dowi chekhai, now aia laiklow paw enni sünta pe dowi chekhai.24Ang uown tuk enni hownia enni dow CHAKRAMANG kowi hing kingküata hüah chekhai.25“CHAKRAMANG napiakta enni kown pahai aia tek mih rakowi 40 ni 40 uar mowr CHAKRAMANG pur kowi ang kowtabawk khai.26Aia tut-e dow maiawng hai ang awr lü khai, ‘Aw CHAKRAMANG Thurai, en kowh maru-uüa kowi hangkow mata diah. Amatni dow en kowh dawngthawnguan chekhai. Amatni kowi dow en kowh kür akraingma mih hai en kowh rut akürma mih hown Aigupta pren hownia en uang lawtla khai.27En kowh nar Abraham, Isak hai Jakawb büah tut-e kowh en khamah mih laiklow tuakah diah. Maiawngün maru-uüa kowh Lai üara, angak changra hai angak dow hangkow mü pe diah.28Naiawng che en mata khai hanow Aigupta prenchakuüa natek kown mih, “Amatni kowi napeah kownkow aia khamah mih pren kowi CHAKRAMANG kownowng pawla dowi chekhai. Now amatni kowi aia suiah khai rakowi nakowngta kownkow mami süngrüp süngkangma kowi aia uang pawla mih chekhai,” napa büah kown.29Nachenganchepaw en dow amatni kowh CHAKRAMANG chekhai. Amatni dow en kowh maru hai en kowh asung uowima mih dawngthawnguan chowtaih. Amatni kowi dow en kowh kür akraingma mih hai en kowh rut akürma mih hown Aigupta pren hownia en uang lawtla mih chekhai,’ ang pakhai,” pape khai.The Seed Company