Plan Rui10
1“Nami khin khe CHAKRAMANG tek ang mih, ‘Auown khe kowh huapher pre buk mih iawng plan thawp huapher sar pre buk iawk diah. Now huapher towk rah paw singh hown thawpla sangbowk laitawm tawkpla lowk diah. Nami kung kowi dow hungh luk kowi ang tut-e uang awr pün diah.2Nami huapher sar pre buk mih kowi dow en kuakta mih huapher kowi kowh arui uowi mih laiklow maten ang naplan rui en iawk kown. Nami kung kowi nami huapher pre buk mih dow nami tawkpla kowi en natowah kown,’ pah ang khai.3“Naiawng rakowi ri singh hown ang thawp sangbowk laitawm tawkpla lowk khai. Now auown khe kowh huapher pre buk mih iawng ang plan thawp huapher pre buk khai. Nami kung kowi dow nami huapher pre buk mih dowkla hanow hungh luk kowi ang awr pün khai.4Now CHAKRAMANG dow auown khe kowh huapher pre buk mih kowi kowh laiklow maten nami huapher sar pre buk mih kowi ruiah hanow pe ang khai. Nami huapher kowi kowh laiklow maten dow hamüt chap mih ana pek chekhai. Nami dow aia kua enni mih ni khe kowh hungh luk kowi kowh maih dawng hownia aia uang phuang enni mih ana chekhai.5Nami kung kowi dow hungh hownia ang uang dowm khai bowt. Now CHAKRAMANG kowh ana pek iawng nami huapher pre buk mih dow ang thawpah mih sangbowk laitawm tawkpla kowi ang towah khai. Naiawngün dow kawmat paw sangbowk laitawm tawkpla kowi uowi reng chekhai.6“(Nami kung kowi Israeluüa dow Bane-Jakan hownia lawt büah hanow Mosera kowi kowtowm büah khai. Nakowi dow Arawn kowng khai, now aia kowi dow dupah khai. Now Arawn kowh uamow lang kri mih arah dow achapa Eleazar ta paw khai.7Nami kung kowi dow Gudgoda kowi kowuowi büah khai. Now Gudgoda hownia lawt hanow Jawtbatha kowi kowuowi büah khai. Nakowi dow aw ahuma chekhai.8Nami khin khe CHAKRAMANG dow aiamat kowh sangbowk laitawm tawkpla nakawtla kownkow, aia pur kowi naia chang lup kownkow hai aia ming hown maru-uüa kowi napela prasi kownkow Leviuüa kowi aia lang kloah khai. Leviuüa dow kawmat paw naiawngün lup chang reng chekhai.9Naiawng rakowi Leviuüa dow amatni kowh tainau Israeluüa pungmadawng kowi tawng iawng mih dawngthawnguan bak paw tawi ka powng büah dowi chekhai. CHAKRAMANG amatni kowh Thurai tekta iawng amatni kowh dawngthawnguan dow CHAKRAMANG towbowt).10“Auown khe kowh iawng nami leng paw 40 ni 40 uar hungh luk kowi ang kowuowi khai. Nami leng paw CHAKRAMANG sünta ang laiklow khai. Now aia dow mata enni dowi chekhai.11CHAKRAMANG tek ang mih, ‘Rü now maru kawmuüa kowi kruila diah. Nahanow amatni pipu-uüa kowi napeah kownkow ang khamah mih pren kowi kowkup now nami pren mih amatni naia powng kown towbowt,’ pah ang khai.12“Israeluüa low, CHAKRAMANG enni kowh Thurai mih tawng chow enni nachang kown mih nau enni? Aia nau enni mih dow CHAKRAMANG enni kowh Thurai kowi ringkawma hown enni nakramah kown mih, aia tiama kowi namang kown mih, aia kowi nasakrauah kown mih, enni kowh sak maiow hai singra maiow hown aia kowh lup enni nachang kown mih chekhai.13Now ani kowh ang pe enni mih CHAKRAMANG kowh ana pek maten hai ari arow maten enni nachün kown takla. Tawngplawng kowchow panow naiawngün dow enni iung müa vüi ang pe enni mih chekhai.14“Sünta büah, mukuang hai mukuang luk kowi kowh uowi mih maten, now lusa hai lusa kowi kowh uowi mih maten dow CHAKRAMANG enni kowh Thurai kowh chekhai.15Nachenganchepaw aia kowh sakraura nakala kownkow aia dow enni kowh pipu-uüa kowi lang kloah khai. Aia dow akeng mih chenchapuüa pungmadawng hownia lang klo enni khai. Now enni dow kawmat paw aia lang kloah mih chenchap chekhai.16Naiawng rakowi CHAKRAMANG laiklow chün büah bowt; hang lai üa büah tham bowt.17Tawngplawng kowchow panow CHAKRAMANG enni kowh Thurai dow thuraiuüa maten luk kowi kowh Thurai chekhai, now aia dow chakramang maten luk kowi kowh CHAKRAMANG chekhai. Aia dow akri akraingma, akürma hai kramra uowima mih Thurai chekhai. Aia dow amia iawng mih pra paw lang tangi dowi chekhai. Now aia dow cha büm cha sua dowi chekhai.18Aia dow saratchowuüa hai mamaimowuüa kowi chet pe tara nowm reng chekhai. Now enni pungmadawng kowi kowh tawi uowi mih prenlang maru-uüa kowi paw aia dow sakrauah reng chekhai. Naiawngün maru-uüa kowi dow chakkham hai khupdip tawngklai aia peah reng chekhai.19Naiawng rakowi enni paw prenlang maru-uüa kowi sakrauah büa diah. Tawngplawng kowchow panow enni paw prenlang maru iawng Aigupta pren kowi uowila akat chekhai.20CHAKRAMANG enni kowh Thurai kowi ringkawma hown enni nakramah kown. Now aia kowh lup chowtaih enni nachang kown. Aia kaah sakowm iawng enni nauowi kown takla, now enni takham mih khin khe paw aia ming hown chowtaih enni natakham kown.21Aia kowi chowtaih enni nakiowah kown; aia dow enni kowh Thurai chekhai. Enni vüi kowi kowh kri kraingra hai awdara uowima mih lup maten aia chang mih enni khi khowk chekhai.22Aigupta pren kowi enni kowh pipu-uüa kowkowi mih khin khe dow amatni mih 70 iachow taih chekhai. Nachenganchepaw kawmat dow kuang kowi kowh krek nowng rüaah dowi mih iawng maru iun akawmma CHAKRAMANG enni kowh Thurai chang enni khai.
The Seed Company