Plan Rui8
1“Ani kowh ang pe enni mih ana pek maten dow kaneuma chünah büa diah. Nahanow enni nasing kown, now enni naprung kown. Enni pipu-uüa kowi napeah kown pahai CHAKRAMANG khamah mih pren kowi dow kowkupah hanow enni naka powng kown.2Mami 40 ning mowr süngrüp süngkangma iawng tawng iawng chow CHAKRAMANG enni kowh Thurai uang pawla enni mih tuakah büah reng diah. Enni sak kowi tawng chow uowi mih natukla kownkow, aia kowh ana pek enni chün tak chünchü pami natukla kownkow hai enni kowh bawrira napiakta enni kownkow kawmkrat hown aia chaing enni mih chekhai.3Aia dow enni kowh bawrira napiakta enni kownkow pe enni sakkraira hanow manna kawm pe cha enni khai. Nami manna kawm dow enni pipu-uüa khowm padow katpaw khi dowi chekhai. Nami hownia aia tüngsang enni kown nau mih dow — kawm hown krowngchow nadowi maru sing, Thurai nawr hownia kowh uang lawt mih laiklow maten hown chowtaih maru sing — pami chekhai.4Mami 40 ning kowi enni kowh tawnguat paw piak dowi chekhai, now enni kowh khawk paw bau dowi chekhai.5Achauüa kowi a-pa hawiah iawng dow CHAKRAMANG enni kowh Thurai paw hawi enni reng pami sak kowi towah büa diah.6“Naiawng rakowi CHAKRAMANG enni kowh Thurai kowh ana pek enni nachün kown takla, aia tiama kowi enni namang kown takla, now aia kowi enni ringkawma hown enni nakramah kown takla.7Tawngplawng kowchow panow CHAKRAMANG enni kowh Thurai dow aiungma mih pren kowi nakowpawla enni kown chowbowt. Nakowi dow hungh hai lawngrawi hownia kowh uang hawr mih aw ün, awchawng ün hai krawng dawng tui ün uowi chekhai.8Nami pren kowi kowh hungh kowi dow thaiah hanow enni naka kri kown, now nakowi kowh hua kowi dow bawpah hanow enni naka lawngha kown. Nakowi dow ahuma enni naka chakkham kown; tawng chap paw enni nakhawr kown nadowi. Nakowi dow püm ün, iakmow ün, grep ün, uidut singh ün, dalim singh ün, kanrawn singh ün hai kuai tui ün ahuma chekhai.10Nakowi dow enni nau mowr enni naka cha kown. Now pren aiungma mih pe enni khai rakowi CHAKRAMANG enni kowh Thurai kowi enni natek pe awmrawm lai kown.11“Nachenganchepaw kaneu büa diah. CHAKRAMANG enni kowh Thurai kowi hangkow tamata büa diah. Ani kowh ang pe enni mih aia kowh ana pek hai rirow maten dow chünah büa diah.12Pur prakowi du pat enni naka cha kown, now kim klangiung klangiungma mih thawp hanow enni nauowi kown.13Now enni kowh chia hawmh, rua hawmh hai ruapur hawmh dow naprung kown. Enni kowh kuh, tai hai dawngthawnguan dow nahu kown.14Nachenganchepaw naiawng uang phaw mih khin khe dow hang chang bawri büa diah. Nadowi now Aigupta pren kowi kowh nar lup changra hownia uang klanla enni mih CHAKRAMANG enni kowh Thurai kowi enni tamata kown chekhai.15Aia dow aphiama mih hai kramra uowima mih süngrüp süngkangma hownia uang pawla enni khai. Nakowi dow akru uowima mih rua hai krawng dak rowp ün ahuma uowi khai. Nakowi dow krawng kangkhawngma, tui paw uowi dowi chekhai. Naiawng rakowi aia dow singku huamang hownia pe enni tui khai.16Aia dow naiawng mih süngrüp süngkangma kowi pe cha enni manna kawm khai. Nami manna kawm dow enni kowh pipu-uüa khowm padow katpaw khi dowi chekhai. Aia dow enni kowh bawrira napiakta enni hanow achur kowi nape enni iungra kownkow kawmkrat hown aia chaing enni khai.17Kaneu büah, ‘Maiawngün dawngthawnguan dow ang matia kür hown, ang matia rut hown ang changah kowh ang kaah mih chowtaih,’ pahai sakdawng kowi enni naia tuak kown nadowi.18CHAKRAMANG enni kowh Thurai kowi hangkow tamata büa diah. Tawngplawng kowchow panow naiawngün dawngthawnguan nakala kown mih kür pe enni mih dow aia chowtaih. Aia pe enni kür mih dow enni kowh pipu-uüa tut-e aia towah mih sangbowk laitawm nape tachiah kownkow chekhai.19“CHAKRAMANG enni kowh Thurai kowi dow katpaw hangkow tamata büa diah. Now akeng mih thuraiuüa kung kowi dow hang cham krawi büa diah. Naiawngün thuraiuüa kowi dow chup paw hangkow chup büa diah. Enni che chup khai hanow enni napiak ngengche kown pami ani ang tek enni khowk chaw.20CHAKRAMANG enni kowh Thurai laiklow enni chün dowi hanow enni pur kowi kowh chenchapuüa kowi aia piakah iawng enni kowi paw aia napiak enni kown.
The Seed Company