Plan Rui7
1“CHAKRAMANG enni kowh Thurai dow enni nakowpowngah kown mih pren kowi nakowpawla enni kown. Now aia dow enni pur hownia chenchap ahuma kowi naprütta kown. Naiawngün chenchapuüa dow Hituüa, Girgasuüa, Amawruüa, Kananuüa, Perizuüa, Hivuüa hai Jebusuüa chekhai. Naiawngün ranit chenchap kowi kowh maru iun dow enni lak-e lang kawm chekhai, now kür paw lang kür chekhai.2Nachenganchepaw naiawngün chenchapuüa kowi dow CHAKRAMANG naapta enni kown, now amatni kowi dow enni nanowngta kown. Nakhowk khe amatni kowi dow asaima enni napiakta kown takla. Amatni hown dow tawng iawng mih sangbowk laitawm paw enni natow kown nadowi, now sana paw enni nasanaah kown nadowi.3Amatni hown dow mapaw enni naia tachawng talang kown nadowi. Enni kowh chamauüa kowi paw amatni kowh chapauüa hown enni nape tachawngah kown nadowi, now enni nachangla iaumow kownkow amatni kowh chamauüa kowi paw enni napaw kown nadowi.4Tawngplawng kowchow panow CHAKRAMANG kowi enni kowh chapauüa chupiia reng mih hownia naiawngün chamauüa dow amatni kowh thuraiuüa prakowi nacham pawla kown chekhai, now enni kowh chapauüa dow akeng thuraiuüa kowi natawi chupiia kown chekhai. Nahanow CHAKRAMANG dow maih lün pluplup mih iawng lainowmma nakunmarau enni kown, now alenma napiakta enni kown chekhai.5Naiawng rakowi naiawngün chenchapuüa kowh phuchuara ün enni napiakta pe kown. Amatni phuchuaah mih chüng-ün enni nadita pe nak kown, now Asera limpu ün paw enni nakripta pe kown. Now amatni kowh arup maten dow maih kowi enni natikta pe kown.6“Tawngplawng kowchow panow enni dow CHAKRAMANG enni kowh Thurai vüi kowi kowh lang kloah mih chenchap chekhai. CHAKRAMANG enni kowh Thurai dow aia kowh asung uowima mih dawngthawnguan nachangla enni kownkow palusama kowi kowh chenchap hownia lang klo enni mih chekhai.7CHAKRAMANG sakrau enni mih hai lang klo enni mih dow akeng chenchapuüa lak-e enni kowh maru iun lang kawm kowh nadowi. Tawngplawng kowchow panow enni dow palusama kowi kowh chenchap lak-e maru iun lang e chekhai.8Aia lang klo enni mih dow aia sakrau enni kowh chekhai, now enni pipu-uüa tut-e aia kowh khamta mih lai natownla reng kownkow chekhai. Naiawng rakowi aia dow aia kowh kür akraingma mih hown Aigupta pren kowi kowh nar lup changra hownia uang lawtla enni khai. Aia dow Faraw rut hownia uang lawtla enni khai.9Naiawng rakowi CHAKRAMANG enni kowh Thurai dow Thurai ching pami tukah büa diah. Aia dow kaah sakowm mih Thurai chekhai; aia kowi sakrauah mih hai aia kowh ana pek chün miuüa kowi dow athawng aiawng chowng mowr aia town pe sangbowk laitawm reng chekhai, now aia kowh achur uowi dowi mih sakraura paw aia tüng pe reng chekhai.10Nachenganchepaw aia kowi kowh sui miuüa kowi dow aia mata kown mih kra dowi chekhai.11Naiawng rakowi ani kowh ang pe enni mih ana pek, rirow hai alow pek maten kaneuma enni nachünah kown takla.12“Maiawngün rirow dow towsakma hai kaneuma chünah büa diah. Nahanow enni pipu-uüa tut-e kowh aia khamta mih iawng enni hown kowh aia towah mih sangbowk laitawm dow CHAKRAMANG enni kowh Thurai natown enni reng kown, now aia kowh achur uowi dowi mih sakraura aia natüng enni kown.13Aia dow nasakrau enni kown, nape enni prasi kown, now nape prung enni kown. Enni pipu-uüa kowi peah kown pahai aia khamah mih pren kowi dow aia nape enni prasi kown. Nahanow chauüa, luprak, grep tui, kanrawn sau hai tawncher ahuma enni naka kown.14Akeng mih chenchapuüa lak-e enni nalang ka prasi kown. Enni pungmadawng kowi dow ka chah dowi mih amiapaw nauowi kown nadowi, now enni kowh tawncher hawmh paw pen chah dowi mih nauowi kown nadowi.15CHAKRAMANG dow rawka maten hownia nalawng enni kown. Now Aigupta pren kowi kowh enni khi-ah mih rawka ngak maten dow aia nauang pawla enni kown nadowi. Nachenganchepaw enni kowh ransu-uüa luk kowi dow nami rawka aia nauang pawla pe kown.16CHAKRAMANG enni kowh Thurai apta enni mih chenchapuüa kowi dow enni napiakta bowk kown takla. Amatni kowi dow enni nasanaah kown nadowi, now amatni kowh thuraiuüa kowi paw enni natawi chupiia kown nadowi. Tawngplawng kowchow panow naiawngün dow enni vüi leng kowi tasowk khe kowh iawng naown kown chekhai.17“Sakdawng kowi maiawng enni naka tuak chepaw naia kown, ‘Maiawngün chenchapuüa dow a-i lak-e maru iun lang kawm; amatni kowi dow tawng iawng chow a-i naia prütah kown?’ napa kown.18Nachenganchepaw amatni kowi dow hangkow kram büa diah. Faraw hai Aigupta prenchakuüa luk kowi CHAKRAMANG enni kowh Thurai tawng chow changah mih tukah büah reng diah.19CHAKRAMANG enni kowh Thurai dow kramra uowima mih chaingra hown, awdara lup hown, amatra hown, aia kowh akürma mih kraingra hown aia uang lawtla enni mih enni khi khowk chekhai. Kawmat kowh enni kramah mih chenchapuüa luk kowi paw CHAKRAMANG dow naiawng nachangah kown.20“Naiawngün pungmadawng kowi kowh ta sing miuüa hai cham tapet miuüa luk kowi dow CHAKRAMANG enni kowh Thurai mih nauang krawi chin pe takrow takraira kown, now amatni dow napiak bowk kown.21Amatni kowi dow hangkow kram büa diah. Tawngplawng kowchow panow CHAKRAMANG enni kowh Thurai dow tawi uowila enni reng chekhai. Aia dow akri akraingma hai kramra uowima mih Thurai chekhai.22CHAKRAMANG enni kowh Thurai dow amatni kowi salow salowchow enni pur hownia naprütta kown. Amatni bowkbowk kowi dow amaisang enni naprütta kown nadowi. Tawngplawng kowchow panow naiawng che enni chang hanow kaurawng uaramchak hawmh nahu lai kown chekhai.23CHAKRAMANG enni kowh Thurai mih enni kowh ransu-uüa kowi dow enni rut kowi naapta enni kown. Amatni kowi dow enni piakta bowk dowi mowr takrow takraima hown aia natowah kown.24Now amatni kowh manguüa kowi paw aia dow naapta enni kown. Naiawngün manguüa kowh ming dow lusa hownia enni namata kown. Amatni bowkbowk kowi enni nowng piakta dowi mowr mia iawng mih paw naia enni kown nadowi.25Amatni kowh thurai rup ün dow maih kowi enni natikta pe bowk kown. Now sowla arup mih kuh hai tai dow hang ir büa diah, now enni matia vüi paw hang paw büa diah. Enni che ir hai pawta khai hanow leng kowi tasowk mih iawng enni naown kown. Tawngplawng kowchow panow naiawngün dow CHAKRAMANG enni kowh Thurai tut-e suiiai kaniaima mih uanh chekhai.26Naiawng mih suiiai kaniaima mih uanh dow kim kowi enni nauang pawla kown nadowi. Enni che uang pawla khai hanow CHAKRAMANG napiakta enni kown chekhai. Naiawng mih suiiai kaniaima mih uanh dow lainowmma enni nasuiah kown takla. Tawngplawng kowchow panow naiawngün uanh dow napiakta kown mih CHAKRAMANG nau chekhai.
The Seed Company