Plan Rui6
1“Maiawngün ari aiang hai ana pek maten dow ang natüngsang enni kownkow CHAKRAMANG enni kowh Thurai pe ang ana khai. Maiawngün dow Jawrdan aw paipra pown kowi kowh pren enni kowpowng mih khin khe enni nachünah kown takla.2Enni hailawm enni kowh chauüa hai enni kowh krungchakuüa mih CHAKRAMANG kowh ana pek hai ari arow maten chownglawng prat chünah büa diah, now CHAKRAMANG enni kowh Thurai kowi ringkawma hown kramah büa diah. Nahanow nami pren kowi dow chowngdawng sakklangma enni nasing kown towbowt.3Israeluüa low, ang laiklow sünta büa diah: Mami rirow hai ana pek maten dow kaneuma chünah büa diah. Nahanow CHAKRAMANG enni pipu-uüa kowh Thurai khamta khowk iawng dow iawn tui, kuai tui hai tawng chap paw akhawr uowi dowi mih pren kowi enni kowuowi mih khin khe enni naiung kown, now lainowmma enni naprung nase kown.4“Israeluüa low, sünta büa diah! CHAKRAMANG lowkchow taih a-i kowh Thurai.5CHAKRAMANG enni kowh Thurai kowi dow enni kowh sak maiow hai enni kowh kür maiow hown sakrauah büa diah.6Ani kowh maiawngün ang pe enni mih ana maten dow sak kowi towah büa reng diah.7Maiawngün ana maten dow enni kowh chauüa kowi plan plan tüngsangah büa diah. Kim kowi uowi khe, cham mang cham kat khe, tanai khe, now chang lup khe maiawngün lawnguan dow lawp pe büah reng diah.8Maiawngün ana pek dow ruiah hanow bawng kowi hai kaubeng kowi sükah büah reng diah. Nami dow ana pek enni naia ka tuakla reng kown mih amat müa chekhai.9Now enni kowh kimplawt mawm kowi hai marow tapplawt kowi naiawngün ana pek dow ruiah büah reng diah.10“Enni kowh pipu Abraham, Isak hai Jakawb büah tut-e CHAKRAMANG enni kowh Thurai napeah kown pahai khamah mih pren kowi aia nakowpawla enni kown. Now nakowi kowh klangiungma mih hai aiuk aiukma mih marow dow aia nape enni kown; naiawngün marow dow enni thawpah mih nadowi chekhai.11Aiung aiungma mih uanh atekma mih kim maten dow aia nape enni kown; naiawngün uanh dow enni kramah mih nadowi chekhai. Now tuikuam maten aia nape enni kown; naiawngün tuikuam dow enni thaiah mih nadowi chekhai. Now grep krum hai kanrawn khang maten paw aia nape enni kown; naiawngün dow enni matia changah mih nadowi chekhai. Nachenganchepaw enni chak du mih khin khe kaneu büah. Nadowi now Aigupta pren kowi kowh nar lup changra hownia uang lawtla enni mih CHAKRAMANG kowi enni natamata kown chekhai.13“CHAKRAMANG enni kowh Thurai kowi enni ringkawah kown, now aia kowi chowtaih enni nachupiia kown. Now enni takham sawi mih khin khe paw aia ming hown chowtaih enni nakham sawi kown.14Enni riaret kowi kowh akeng chenchapuüa kowh thuraiuüa kowi enni nachupiia kown nadowi.15Tawngplawng kowchow panow enni pungmadawng kowi kowh tawi uowila enni mih CHAKRAMANG enni kowh Thurai dow khowrbown dawma; aia klen kowi akeng mih thurai kowi cham chupiia kown mih mapaw aia nau dowi chekhai. Akeng mih thuraiuüa kowi che enni cham chupiia khai hanow aia dow maih lün pluplup mih iawng lainowmma nakunmarau enni kown, now aia dow lusa hownia napiakta enni kown chekhai.16Masa pami arah kowi CHAKRAMANG enni kowh Thurai kowi enni chaingah iawng hangkow chaingah büa diah.17CHAKRAMANG enni kowh Thurai pe enni mih ana pek, rirow hai alow pek maten dow enni nachünah ngengche kown takla.18CHAKRAMANG mik kowi anama mih hai aiungma mih chang büa diah. Nahanow enni naiung kown, now enni pipu-uüa kowi aia napeah kown pahai aia khamah mih pren dow enni naka powng kown.19Now CHAKRAMANG tekta khowk iawng dow enni kowh ransu-uüa kowi enni pur hownia enni naia prütta kown.20“‘Maiawngün ana pek, rirow hai alow pek maten CHAKRAMANG a-i kowh Thurai pe a-i mih auan tawng chow?’ padow pur prakowi enni kowh chauüa nalünta enni kown.21Nakhowk khe amatni kowi enni natek pe kown mih, ‘Aigupta pren kowi kowh Faraw nar kowi anging uowi chowdiah. Nachenganchepaw nami hownia CHAKRAMANG dow aia kowh kür akraingma mih hown uang lawtla anging khai.22Faraw luk kowi, aia kimchakuüa luk kowi hai Aigupta prenchak luk kowi awdara lup hai kramra uowima mih amatra lup CHAKRAMANG chang pe mih dow anging khi khai.23Aia dow nami pren hownia uang lawtla anging khai. Nami dow a-i kowh pipu-uüa kowi peah kown pahai aia khamah mih pren kowi uang pawla anging now nape anging kownkow chekhai.24Now maiawngün rirow nachün kown mih hai CHAKRAMANG a-i kowh Thurai kowi ringkawma hown nakramah kown mih CHAKRAMANG pe a-i ana khai. Nahanow ani kowh a-i iung iawng a-i naiung reng kown, now a-i nasing uowi reng kown.25CHAKRAMANG a-i kowh Thurai kowh ana pek maten aia tek iawng a-i che chün khai hanow aia dow nasak-ih a-i kown,’ napape kown.
The Seed Company