Plan Rui5
Thurai kowh hamüt klüng mih ana pek
1Israeluüa maten kowi Mosi hawah now tek pe mih, “Israeluüa low, ani kowh ang pe enni kown mih rirow hai ana pek dow sünta büa diah. Naiawngün dow tasangah büa diah, now kaneuma chünah büa diah.2CHAKRAMANG a-i kowh Thurai mih Sinai hungh kowi tow a-i sangbowk laitawm lowk khai.3Nami sangbowk laitawm dow a-i pipu-uüa vüi krowngchow nadowi; nami dow kawmat kowh a-i sing uowi miuüa vüi paw na chekhai.4CHAKRAMANG dow Sinai hungh luk kowi kowh maih hownia enni hown tatang klowk tek lai khai.5Nami khin khe kram maih kowh hungh kowi enni kowuam pün dowi chekhai. Naiawng rakowi CHAKRAMANG hai enni takra kowi ang uowiah hanow CHAKRAMANG kowh laiklow ang phuang enni khai.6“Maih hownia CHAKRAMANG tek mih, ‘Ang dow CHAKRAMANG enni kowh Thurai chekhai. Aigupta pren kowi kowh nar lup chang hownia uang lawtla enni mih dow ang chekhai.7“‘Ang klen kowi dow akeng mih thurai kowi enni nachup naiia kown nadowi.8“‘Tawng iawng mih arup paw enni nathawp kown nadowi. Nami dow kuang kowi kowh uowi mih chap iawng pana lah, lusa kowi kowh uowi mih chap iawng pana lah, sata kowi kowh uowi mih chap iawng pana lah, enni nathawp kown nadowi.9Naiawngün arup kowi dow enni nachupiia kown nadowi, now amatni kowh lup enni nachang pe kown nadowi. Tawngplawng kowchow panow ang CHAKRAMANG chowtaih enni kowh Thurai. Ang dow khowrbown dawma; ang klen kowi akeng chap kowi enni cham chup mih mapaw ang nau dowi chekhai. Sui ang miuüa kowi dow amatni kowh angak ripra sum tali chowng mowr ang peah reng kown.10Nachenganchepaw sakrau ang miuüa hai ang ana pek chün miuüa kowi dow athawng aiawng chowng mowr ang kowh achur uowi dowi mih sakraura ang natüng pe reng kown.11“‘CHAKRAMANG enni kowh Thurai ming enni narük naklak kown nadowi; rük naklak mih kowi dow ang naripah kown.12“‘CHAKRAMANG enni kowh Thurai ana pek iawng Tanai Ni dow khangah hanow chimsaima towah büa diah.13Pasapta kowi taruk ni mowr mih enni kowh lup maten enni nachang kown.14Nachenganchepaw ranit ni mih ni dow CHAKRAMANG enni kowh Thurai vüi Tanai Ni chekhai. Nami ni dow enni matia lah, enni kowh chauüa lah, enni kowh narma narla lah, enni kowh chia hai kawrngaramchük lah, enni kowh akeng mih tawncher lah, enni tut-e tawi uowi mih akeng chenchapuüa lah, amia iawng mih paw nachang lup kown nadowi. Nahanow enni iawng dow enni kowh naruüa paw naka tanai kown towbowt.15Sak kowi towah büah reng diah. Akat khe dow Aigupta pren kowi enni paw nar taih chekhai. Nami nar lup changra hownia dow aia kowh bawng akürma mih hown CHAKRAMANG enni kowh Thurai mih uang lawtla enni khai. Naiawngün lawnguan enni natukla reng kownkow Tanai Ni nasunah kown mih aia pe enni ana khai.16“‘CHAKRAMANG enni kowh Thurai ana pek chünah hanow enni kowh u-pa kowi ringkawah büa diah. Nahanow ang nape enni kown mih pren kowi chowngdawng sakklangma enni nasing kown, now enni naiung kown.17“‘Hang sai maru sak.18“‘Hang chang iang.19“‘Hang ku.20“‘Klowkchakuüa luk kowi hang thuak dai lai saksi.21“‘Enni klowkchakuüa kowh masi chepaw, kim üa chepaw, krawng bawn chepaw, narma narla chepaw, chia hai kawrngaramchük chepaw, tawng iawng mih chap paw hang cham irh büa diah,’ pakhai.22“Sinai hungh luk kowi maih, uangnim hai iiu kraingma dawng hownia CHAKRAMANG mih maiawngün ana pek dow atünma uang phuang enni khai. Maiawngün klen kowi dow tawngpaw aia tekla enni dowi chekhai. Naiawngün dow akung kowi huapher pre buk mih kowi aia ruiah hanow pe ang khai.23“Hungh luk kowi maih lün pluplup mih khin khe uangnim aiiuma mih hownia CHAKRAMANG klang enni mih klow dow enni ta khowk. Nami ni khe krungchak towng kowi kowh aluchowuüa hai lawngtang aluchowuüa mih ang tut-e uang khai.24Nakhowk khe enni tek ang mih, ‘CHAKRAMANG a-i kowh Thurai dow mün khowt chow kraingra hai rowsira uowi pami aia uang tüng anging khai. Maih dawng hownia aia kowh laiklow dow anging ta khai. Thurai kowh klow ta chepaw lusa maru ia sing mih anging tuk khowk.25Nachenganchepaw anging kram khai. CHAKRAMANG a-i kowh Thurai kowh klow che anging plan ta hanow anging nakowng ngengche kown chekhai. CHAKRAMANG kowh maih nakamta anging kown chekhai.26Lusa maru pungmadawng kowi maih dawng hownia masing Thurai kowh laiklow ta kung kowi a-i iawng sing mih mia chow uowi?27CHAKRAMANG a-i kowh Thurai tek mih en phai kowsünta diah. Aia tek en mih maten uang tek anging taih; en tek iawng anging nachün kown taih,’ pakhai.28“Naiawng enni tek ang mih dow CHAKRAMANG tawi ta chekhai. Naiawng rakowi aia tek ang mih, ‘Naiawngün maru-uüa tek en mih ang ta khowk. Kowbüah tek en mih iung chow.29Ringkawma hown nakram ang kown mih hai ang kowh ana pek nachün kown mih sak amatni tut-e pacham uowi reng lah. Nahanow amatni hai amatni kowh chauüa mih chowngchowng saksakma naiung kown.30Amatni dow tangbung kowi naplan bowt kown mih tek pe diah.31Nachenganchepaw en dow ang tut-e mami re-e ta uowi diah. Ang kowh ana pek, ari arow hai ari aiang maten ang nape en kown, now naiawngün dow kowbüah kowi en natüngsangah kown. Amatni kowi ang pe powngah mih pren kowi kowuowi büah khe naiawngün dow nachünah büah kown,’ pah ang khai,” pakhai.32Israeluüa kowi Mosi plan tek pe mih, “Naiawng rakowi CHAKRAMANG enni kowh Thurai pe enni mih ana maten kaneuma enni nachünah kown takla. Nami ana pek hownia dow ditchow paw enni naia süt kown nadowi.33Enni namangah kownkow CHAKRAMANG enni kowh Thurai pe enni ana mih tiama kowi mang büa diah. Nahanow enni nasing kown, now iungra paw enni naka kown. Nami klen kowi enni nakowpowngah kown mih pren kowi chowngdawng sakklangma enni nauowi kown.The Seed Company