Plan Rui4
1“Israeluüa low, kawmat kowh ang sang enni kown mih ana pek hai ari aiang maten kaneuma sünta büa diah. Maiawngün ana pek hai ari aiang dow enni nachünah kown takla. Enni che chün khai hanow enni nasing kown, now CHAKRAMANG enni pipu-uüa kowh Thurai nape enni kown chowbowt mih pren enni naka powng kown.2Ang nape enni kown mih ana kowi tawngpaw hangkow chütla diah, now iut paw hangkow iutla diah. CHAKRAMANG enni kowh Thurai kowh ana pek ang nape enni kown mih srui enni nachünah kown.3“Baal-Peur kowi uowi khe tawng chow CHAKRAMANG chang enni mih enni matia mik hown enni khi khowk chekhai. Enni pungmadawng hownia Peur hungh kowi kowh Baal thurai kowi tawi chup miuüa maten kowi dow CHAKRAMANG enni kowh Thurai mih kowngta bowk khai.4Nachenganchepaw alai kowh enni pungmadawng kowi kowh CHAKRAMANG enni kowh Thurai tut-e kaah sakowmma hai uowi mih maten dow kawmat paw sing uowi bowk tak chekhai.5“CHAKRAMANG ang kowh Thurai ana pek iawng mami ari arow hai ari aiang dow ang tüngsang enni khai. Maiawngün dow enni nakowpowngah kown mih pren kowi enni kowuowi mih khin khe enni nachünah kown.6Maiawngün ari aiang mih chünah büah kaneu diah. Maiawngün ari aiang chün mih hownia akeng chenchapuüa tut-e enni kowh chanlaira hai prengia natatüng kown. Maiawngün ari aiang lawnguan kowi ta hanow akeng chenchapuüa natek kown mih, ‘Kowbüah dow chanlaima, prengia chakma hai kri kraingma mih chenchap chekhai nowm,’ napa büah kown.7A-i iawng mih kri kraingma mih chenchap mia chow uowi? CHAKRAMANG a-i kowh Thurai dow a-i hawah now uang tatawn reng chekhai. Akeng chenchapuüa dow amatni kowh thuraiuüa kowi hawah chepaw uang tatawn pe dowi chekhai.8Ani kowh ang pe enni mih rirow hai ana pek dow aiungma hai anowmma chekhai. Maiawng mih rirow hai ana pek dow mia iawng mih chenchap kri kraingma mih tut-e chow uowi tak?9“Enni khi-ah mih maten natamata dowi kownkow enni sing uowi mowr dow uowiah kaneu büa diah, now kowmatia sak kowi paw khetah kaneu diah. Enni kowh chownglawng kowi tawng ngai chow Thurai chang enni mih enni kowh chu-uüa chauüa kowi enni natüngsangah kown:10Sinai hungh kowi CHAKRAMANG enni kowh Thurai pur kowi enni kowiowng khai. Nakhowk khe CHAKRAMANG tek ang mih, ‘Ang kowh laiklow natala kownkow maru kawmuüa kowi kuaah diah. Ang kowh laiklow ta hanow lusa kowi sing uowi mowr khe pacham ringkaw ang büa lah, now amatni kowh chauüa kowi ang kowh ana pek pacham tüngsangah büa lah,’ pakhai.11Nami khin khe enni kowkowiah hanow hungh tut kowi enni kowiowng khai. Nakhowk khe nami hungh dow uangnim atatma mih hown tamum klum hanow aiiuma chekhai, now maih lün paw kuang dawng mowr chi bia laplap khai.12Nami khin khe maih dawng hownia CHAKRAMANG mih uang klang enni khai. Aia kowh laiklow dow enni ta chowdiah. Tawkche aia powm dow enni khi dowi chekhai.13Aia dow enni tut-e aia kowh sangbowk laitawm natown kown mih tek enni khai. Nami dow hamüt klüng mih ana pek chekhai. Nami hamüt klüng mih ana pek dow nachünah kownkow aia pe enni ana khai. Nami hamüt klüng mih ana pek dow huapher pre buk kowi aia ruiah khai.14Nakhowk khe naiawngün ana pek dow natüngsang enni kownkow CHAKRAMANG tek ang khai. Nahanow naiawngün ana pek dow Jawrdan aw paipra pown kowi enni kowpowngah kown mih pren kowi paw enni naia chün kown towbowt.15“Sinai hungh re-e maih dawng hownia CHAKRAMANG uang klang enni khe aia kowh powm dow enni khi dowi chekhai. Naiawng rakowi nachupah kownkow tawng iawng mih arup paw enni nathawp dowi kown mih kaneuma pe pe ching büa diah. Kachakuüa lah, masiuüa lah, krawng luk kowi kowh asadua lah, kuang dawng kowi kowh iow mih uakling uaber lah, kam hai sowr mih chap lah, tui kowi kowh uowi mih chap lah, kuang dawng kowi kowh krek, lama, sat hai nowi mih chap lah lusa kowi kowh maru maten vüi CHAKRAMANG towah mih chekhai. Naiawngün arup dow enni nathawp kown nadowi, now mukuang kowi kowh uowi mih chap kowi paw enni nachup kown nadowi.20Sak kowi towah büa diah. CHAKRAMANG dow lang klo enni khai, now taping maih iawng mih Aigupta pren hownia aia uang lawtla enni khai. Naiawng aia uang lawtla enni mih dow aiamat kowh maru enni pacham chowng lah pakowh chekhai. Now kawmat dow enni mih aia kowh maru chowng khai bowt.21“Enni rakowi CHAKRAMANG dow kunmarau ang khai. Naiawng rakowi nachangla dawngthawnguan kownkow CHAKRAMANG enni kowh Thurai pe enni mih pren klangiung mih kowi aia dow pe kup ang dowi chekhai. Nami lawnguan kowi aia dow kham sawi se tekta ang khai bowt.22Ang dow mami re-e nakowng kown towbowt; Jawrdan aw ang tawi ka pown dowi bowt. Nachenganchepaw enni dow Jawrdan aw haipown hanow paimi pren klangiungma mih enni nakowpowng kown chowbowt.23Naiawng rakowi kaneu büa diah. CHAKRAMANG enni kowh Thurai tow enni mih sangbowk laitawm hangkow tamata büah. CHAKRAMANG enni kowh Thurai hang enni khowk iawng enni naia thawp arup kown nadowi.24Tawngplawng kowchow panow aia dow lowra sia nowng kam mih maih iawng chekhai. Aia dow khowrbown dawma; aia klen kowi akeng chap kowi cham chup mih mapaw aia nau dowi chekhai.25“Pur prakowi dow paimi pren kowi enni naka chu naka chah kown, now akrama enni nauowi kown. Nakhowk khe paw enni matia vüi tawng iawng mih arup paw enni naia thawp kown nadowi. Thawp arup aren mih dow angak chekhai. Naiawng chang mih dow CHAKRAMANG kowi towkah kunmarau mih chekhai.26Naiawng rakowi mami laiklow natawi thuak saksi kownkow ani mih krawng hai mukuang kowi ang towngla khai. Enni che ang kowh sangbowk laitawm piakta khai hanow Jawrdan aw paipra pown kowi kowh pren kowi enni kowuowi khe alenma enni napiak kown. Paimi pren kowi akrama enni ka uowi dowi tham; enni nachum ngengche kown taih.27Now CHAKRAMANG mih akeng chenchapuüa pungmadawng kowi nauetta enni plawt kown. Nakowi dow maru iun a-echow taih enni natawi sing kown.28Nakhowk khe dow singh hai hua hown kowh maru thawpah mih thurai rup kowi enni natawi chup kown. Naiawngün arup dow khi paw khi dowi, ta paw ta dowi, cha paw cha dowi hai anam paw ia hüp dowi chekhai.29Nachenganchepaw naiawngün pren hownia dow CHAKRAMANG enni kowh Thurai kowi enni nacham kown. Enni kowh sak maiow hown che enni krawi cham khai hanow aia kowi dow enni nakrum kown.30Akrat pusara enni luk kowi uang ting mih khin khe dow CHAKRAMANG enni kowh Thurai prakowi enni nauang plan kown, now aia laiklow enni nachün bowt kown.31CHAKRAMANG enni kowh Thurai dow saksing sanara atekma chekhai. Aia dow natowta enni hüah kown nadowi, aia dow nachumta enni kown nadowi, now enni kowh pipu-uüa vüi kowi kowh aia towta sangbowk laitawm khowk mih paw natamata kown nadowi.32“Palusama kowi krawi sam mü büah madiah. Enni vüi kowi kowh CHAKRAMANG chang enni iawng akeng chenchap vüi kowi chang pe mih enni khi tak chünchü, now enni ta ne tak chünchü. Lusa kowi Thurai thawp maru hownia enni chowng mowr kowi krawi sam mü madiah. Maih hownia CHAKRAMANG klangah kung kowi enni iawng sing mih maru uowi ne chünchü.34Nachangla enni aia maru kownkow Aigupta pren hownia CHAKRAMANG enni kowh Thurai uang lawtla enni iawng akeng chenchapuüa kowi amatni kowh thuraiuüa lawtla mih uowi ne chünchü krawi sam mü büah madiah. Enni kowi dow enni matia pur kowi chaingra, awdara, tasenra, kürra hai kramra ün tüng enni khükhü CHAKRAMANG uang lawtla enni khai.35“Naiawngün lup maten tüng enni mih dow CHAKRAMANG chowtaih Thurai pami hai aia klen kowi amia iawng mih paw Thurai uowi dowi bowt pami enni pacham tuk lah pakowh chekhai.36Aia dow natüngsang enni kownkow mukuang pren hownia aia kowh laiklow pe sünta enni khai. Now lusa kowi dow aia kowh akraingma mih maih pe khi enni khai, now aia dow nami maih dawng hownia uang klang enni khai.37Aia dow enni kowh pipu-uüa kowi sakrauah khai, now amatni kowh krungchakuüa kowi aia kloah khai. Naiawng rakowi aia dow tawi uowila enni khükhü aia kowh kür akraingma mih hown Aigupta pren hownia uang lawtla enni khai.38Naiawng aia chang enni mih dow enni lak-e kowh lang iuk hai lang kür mih chenchapuüa kowi prütta now amatni kowh pren nape powng enni kownkow hai nape uowi enni kownkow chekhai. Now nami iawng dow kawmat uang phaw khowk.39“Ani kowh ang tek enni mih laiklow dow tukah reng büa diah, now sak kowi towah reng diah. CHAKRAMANG dow krawng hai mukuang kowi kowh Thurai chekhai; aia klen kowi akeng mih thurai lang uowi dowi bowt chekhai.40Ani kowh ang pe enni mih ari aiang hai ana pek maten che enni chün khai hanow enni hai enni kowh chauüa naiung kown. Naiawngün ang pe enni ana mih dow chowngchowng saksakma vüi CHAKRAMANG enni kowh Thurai nape enni kown mih pren kowi chowngdawng sakklangma enni naia singla kownkow chekhai,” pakhai.41Nami kung kowi dow Mosi mih Jawrdan aw satlawt pra kowh süng kowi marow sum buk ruiah khai. Nami marow dow cham saita maru kung kowi kowh tatung tanimra chekhai. Tawkchedow saita kown mih saktuak uowi dowi kowi rut tawi khawk tawi kowh saita mih maru chowtaih naiawngün marow kowi kowpowt hanow naia tatung tanim kown. Reuben krungchakuüa vüi tatung tanimra marow dow süngrüp süngkangma kowi kowh Bezer dowm nai chekhai. Gad krungchakuüa vüi tatung tanimra marow dow Gilead süng kowi kowh Ramawt marow chekhai. Manase krungchakuüa vüi tatung tanimra marow dow Basan süng kowi kowh Golan marow chekhai.44Maiawngün ari aiang dow Israeluüa kowi kowh Mosi phuang pe mih chekhai. Nakhowk khe amatni uowi mih dow Bet-Peur pur pra kowh lawngrawi kowi chekhai. Nami dow Jawrdan aw satlawt pra kowh Amawruüa kowh mang Sihun kowh pren kowi chekhai. Aigupta pren hownia uang lawt kung kowi Mosi hai Israeluüa rik nowngta mih dow Amawruüa kowh mang Sihun kowi chekhai.47Amatni dow mang Sihun kowh pren hai Awk mang kowh Basan pren powngta pe khai. Nami Amawruüa kowh mang pre ia kowh pren dow Jawrdan aw satlawt prakowi chekhai.48Nami pre pren kowh rihi dow Arnawn lawngrawi re-e kowh Aroer marow hownia Siriawn hungh mowr chekhai. (Siriawn hungh dow Hermawn hungh chekhai).49Amatni kowh süng dow Jawrdan aw satlawt prakowi chekhai. Nami süng mrawkphak pra kowh rihi dow Sata Kowng mowr chekhai, now satlawt pra kowh rihi dow Pisga hungma mawngma le mowr chekhai.
The Seed Company