Plan Rui3
1“Nami kung kowi dow Basan pren pra kowh mangla mih tiama iawng a-i haimang khai. Nami khin khe uang dowk a-i tasen kownkow Basan pren mang Awk mih aia kowh siphai hawmh maten kowi uang pawla now Edrei marow kowi uang khai.2Nakhowk khe CHAKRAMANG tek ang mih, ‘Mang Awk kowi hangkow kram diah. Tawngplawng kowchow panow aiamat hailawm aia kowh pren hai aia kowh siphai hawmuüa kowi dow en rut kowi ang apta en mih chowbowt. Hesbawn marow kowi kowh Amawruüa mang Sihun kowi en changah iawng aia kowi paw en nachangah kown,’ pakhai.3“Naiawng hai CHAKRAMANG a-i kowh Thurai mih Basan pren mang Awk kowi hai aia kowh siphai hawmuüa kowi dow a-i rut kowi ap a-i khai. Amatni kowi dow a-i saita bowk khai.4Nakhowk khe aia kowh marow maten mih a-i powngta pe bowk khai. Aia kowh 60 klüng mih marow dow a-i pawta pe bowk khai; lowkchow paw a-i pawta pe dowi mih marow uowi dowi chekhai. Basan pren kowi kowh Argawb süng maten dow Awk mang kowi a-i powngta pe bowk khai.5Basan pren kowi kowh marow maten dow tap kroma kangowh chekhai. Now tapplawt kowi kowh aklia müa paw akhawtma kangowh chekhai. Now tap uowi dowi mih kua paw ahuma uowi khai.6Naiawngün kua hai marow dow asaima a-i piakta pe khai. Hesbawn marow mang kowi a-i changah iawng dow amatni kowh kachakuüa, masiuüa hai ngeuüa hawmh kowi asaima a-i saita pe khai.7Nachenganchepaw tawncher hai asung khakma mih uanh dow a-i matia vüi a-i uang pawla khai.8“Naiawng hai Jawrdan aw satlawt prakowi kowh süng dow Amawruüa kowh mang pre ia hownia a-i powngta pe khai. Nami süng dow Arnawn lawngrawi hownia Hermawn hungh mowr chekhai.9(Sidawnuüa dow Hermawn kowi Siriawn pahai tek pe khai, now Amawruüa dow Senir pahai tek pe khai).10Awk mang kowh pren maten dow a-i powngta pe bowk khai. Nai kowi kowh uowi mih marow ün, Gilead süng ün, Saleka marow hownia Edrei marow mowr Basan pren kowi kowh süng srui dow a-i powngta pe khai.11(Refaimuüa pungmadawng kowi ta sing uowi mih dow Basan pren mang Awk lowk iachow taih. Mang Awk kowh salawnma dow lawngha hown kowh thawpah mih chekhai. Nami dow areng klang taku muk hai adowng phia tali muk chekhai. Nami salawnma dow kawmat pat Amawnuüa kowh Rabba marow kowi uowi reng tak chekhai).12“Nakhowk khe Jawrdan aw satlawt pra kowh a-i powngah mih süng dow ang ret enni khai. Arnawn lawngrawi re-e kowh Aroer marow hownia tawngphak prakowi Gilead süng dawnglang dow Reuben hai Gad krungchakuüa kowi ang peah khai. Nami dow Gilead süng tawngphak pra kowh adak rep kowi kowh marow maten chekhai.13Now Gilead süng tawngphak pra kowh aluk rep ta lat mih maten hai mang Awk kowh Basan pren dow Manase krungchakuüa dawnglang kowi ang peah khai. (Basan pren kowi kowh Argawb süng maten dow Refaimuüa kowh pren pahai tek pe khai.14Gesur hai Maka rihi mowr Argawb süng srui dow Manase krungchak Jair pami kowpowngta now aia ming chap pe khai. Naiawng rakowi Basan pren kowi dow kawmat mih ‘Jair Marow’ pahai tek pe khai).15“Now Gilead süng dow Manase chuprek chaprek Makir kowh krungchakuüa kowi ang peah khai.16Nachenganchepaw Gilead mrawkphak pra kowh süng maten dow Reuben hai Gad krungchakuüa kowi ang peah khai. Nami dow Arnawn lawngrawi dawnglang kowi kowh rihi mowr, now nami hownia Amawnuüa kowh rihi Jabawk aw mowr chekhai.17Amatni sum krungchak kowh satkup pra kowh süng dow Jawrdan lawngrawi chekhai. Nami lawngrawi rihi dow tawngphak pra kowh Galili sata hownia mrawkphak pra kowh Sata Kowng mowr chekhai. Now satlawt pra kowh rihi dow Pisga hungma mawngma daw hownia satkup pra kowh Jawrdan aw mowr chekhai.18“Nami khin khe ang tek pe amatni mih, ‘Enni kowi dow mami pren napowngah kownkow CHAKRAMANG enni kowh Thurai pe enni khowk. Nachenganchepaw enni pungmadawng kowi kowh kür uowi miuüa nget dow natawi dowk tasen kownkow enni kowh tainau Israeluüa pur kowi Jawrdan aw narik pown kown takla.19Nakhowk khe chiang ang pe enni mih marow maten kowi enni kowh masi, chauüa hai tawncher ahuma mih enni ta ia towla kown.20Enni kowi iawng enni kowh tainau-uüa kowi CHAKRAMANG pe tanaiah dowi mowr enni natawi khowngah kown takla. Jawrdan aw paipra pown kowi kowh CHAKRAMANG tek pe enni mih pren enni kowh tainau-uüa kownowng powng dowi mowr dow enni natawi dowk tasen kown takla. Nami kung kowi chiang ang peta enni khowk mih mami süng kowi enni nauang ia plan kown,’ pakhai.21“Nami khin khe Josua kowi ang tek pe mih, ‘Mang Sihun hai mang Awk kowi tawng chow CHAKRAMANG en kowh Thurai changah mih en khi khowk. Naiawng hai Jawrdan aw satkup pra kowh pren ün kowi paw CHAKRAMANG nachangah kown taih.22Naiawngün pren kowi hangkow kram büa diah. Enni vüi kowi CHAKRAMANG enni kowh Thurai matia nadowk enni tasen iawk kown taih,’ pakhai.23“Nami khin khe CHAKRAMANG kowi ang tek pe mih, ‘Aw lang kri lang kraing mih CHAKRAMANG, ang chup en. Mün khowt chow en kowh kraingra hai en kowh kürra uowi mih en kowh nar kowi en uown tüng pe krowngchow khowk. En changah iawng mih lup nowng chang mih hai en tüngah iawng mih kür nowng tüng mih krawng luk kowi hai mukuang kowi mia iawng mih thurai tak chow uowi?25Jawrdan aw haipown kowh paimi hungma mawngma süng klangiungma mih pren hai Lebanawn hungh dow sakrauma hown pe khi ang diah,’ pakhai.26“Nachenganchepaw enni rakowi CHAKRAMANG kunmarau ang kowh sünta ang lai dowi bowt chekhai. Aia tek ang mih, ‘Nakhowk tak. Nami lawnguan kowi hauang tek ang tham bowt.27Pisga hungh chut kowi kowpün hanow satkup, satlawt, tawngphak hai mrawkphak prakowi krawi tang mü diah. Jawrdan aw paipra pown kowi en tawi ka pown dowk chedow pren mih krawi tang müla akat now na towbowt.28Josua kowi tawng chow achang takla mih phai tekla pe diah. Aia kowi dow peah sakkraingra diah. Tawngplawng kowchow panow maru kawmuüa kowi nakruila hanow narik mang kown mih dow aia chekhai, now en nakowmüah kown mih pren dow maru kawmuüa hown aia nakowpowngta kown,’ pakhai.29Naiawng rakowi Bet-Peur marow hown tatang klowk mih lawngrawi kowi a-i uowi hüah khai.
The Seed Company