Plan Rui31
Mosi kowh arah Josua kowi ap pe mih
1Israeluüa maten kowi Mosi plan tek pe mih,2“Ang dow 120 ning khowk. Enni kowi dow ang nowng mingkhet enni dowi bowt. Now CHAKRAMANG paw tek ang mih, ‘En natawi ka pown Jawrdan aw kown nadowi,’ pakhai.3CHAKRAMANG enni kowh Thurai dow enni pur kowi narik mang kown taih, now aia dow nami pren kowi kowh uowi mih chenchapuüa kowi namata kown. Nahanow amatni kowh pren dow enni napowngta pe kown. CHAKRAMANG tekta khowk iawng Josua dow Jawrdan aw paipra pown kowi napawla enni kown.4Amawruüa kowh mang Sihun hai Awk hown amatchi kowh pren kowi CHAKRAMANG maah iawng dow naiawngün chenchap maten kowi paw aia namata kown.5Naiawngün chenchapuüa kowi dow enni rut kowi CHAKRAMANG nape sumah kown. Now ang tek enni iawng amatni kowi enni nachangah kown.6Enni mih sakkhawtma hai sakkraingma uowiah büa diah. Amatni kowi dow hangkow kram büa diah, now chür paw hangkow chür büa diah. Tawngplawng kowchow panow CHAKRAMANG enni kowh Thurai dow enni hown tawi uowi reng chekhai. Aia dow katpaw napowtta enni kown nadowi, now nua paw nanuata enni kown nadowi,” pakhai.7Nami kung kowi Mosi dow Josua kowi hawah khai. Now Israeluüa bowkbowk pur kowi Mosi tek pe Josua mih, “Sakkhawtma hai sakkraingma uowiah diah. Tawngplawng kowchow panow maiawngün maru-uüa kowi dow CHAKRAMANG amatni pipu-uüa kowh Thurai khamla mih pren kowi en nakowpawla kown takla. Now nami pren dow amatni nachangla dawngthawnguan kownkow amatni kowi en naret pe kown.8CHAKRAMANG dow en pur kowi narik mang kown taih. Aia dow natawi uowila en reng kown taih; aia dow napowtta en kown nadowi, now nua paw nanuata en kown nadowi. Naiawng rakowi en mih hangkow sak nen diah, now kram paw hangkow kram diah,” pakhai.9Now Mosi dow maiawngün rirow maten ruiah hanow uamowuüa hai Israel lawngtang aluchowuüa kowi peah khai. Naiawngün uamowuüa dow Levi chenchapuüa chekhai, now amatni dow CHAKRAMANG kowh sangbowk laitawm tawkpla kawt mih chekhai.10Aluchowuüa hai uamowuüa kowi Mosi tek pe mih, “Ranit ning towng ning chur kowi nasun Te Pawi kownkow CHAKRAMANG lang kloah mih arah kowi enni nakowkowi kown. Nami khin khe Israeluüa maten pur kowi mami ari aiang mih enni naphat pe kown. Nami ning dow lowi lawt napeta kown mih ning chekhai.12Nami khin khe maiawngün ari aiang laiklow amatni natawi ta kownkow, CHAKRAMANG enni kowh Thurai kowi ringkaw krang natawi tuk büah kownkow hai mami ari aiang laiklow maten kaneuma natawi chün büah kownkow maru kawmuüa maten kowi enni nakua nalawmah kown. Naiawng enni nakua nalawmah kown miuüa dow kachakuüa, masiuüa, ngeuüa hai enni tut-e kowh tawi uowi mih akeng chenchapuüa chekhai.13Jawrdan aw paipra pown kowi kowh nakowpowngah kown mih pren kowi enni sing uowi mowr dow takua talawm hanow maiawngün ari aiang mih maru kawmuüa kowi enni naphat pe kown. Naiawng hai maiawngün ari aiang laiklow tawi tuk dowi tak mih amatni kowh chauüa paw natawi ta kown towbowt. Now CHAKRAMANG amatni kowh Thurai kowi ringkaw krang paw amatni natuk kown towbowt,” pakhai.14Nami kung kowi CHAKRAMANG tek pe Mosi mih, “En kowh dow kowng khin uang na iawlaw khowk. Naiawng rakowi Josua kowi hawla now taklowp taklangra te kowi kowkowi diah. Nakowi dow Josua kowi ang napeah kurdik kown,” pakhai. Now Mosi hai Josua iüah dow taklowp taklangra te kowi CHAKRAMANG pur kowi kowkowi khai.15Nakhowk khe CHAKRAMANG dow uangnim iowng chunglung mih iawng hai taklowp taklangra te plawt re-e uang iowng khai.16CHAKRAMANG tek pe Mosi mih, “En dow nakowng hanow en kowh pipu-uüa tut-e nakowtanai kown chowbowt. Nachenganchepaw en kowng kung kowi dow Israeluüa mih ang kaah sakowm dowi mih iawng nauowi kown. Amatni hown kowh ang towah mih sangbowk laitawm dow amatni napiakta kown. Amatni dow nanuata ang kown, now amatni kowkupah mih pren kowi kowh akeng chenchapuüa kowh thuraiuüa kowi nacham tawi chupiia büah kown.17Naiawng amatni chang khe dow amatni kowi lainowmma ang nakunmarauah kown, now amatni kowi ang nanuata kown. Amatni kowi dow ang nakhowngah kown nadowi, now amatni dow napiak kown. Now amatni luk kowi dow phih maiow hai ngare towk rah maiow ang nauang pawla pe kown. Nami khin khe amatni natek kown mih, ‘Maiawngün piakra a-i luk kowi uang ting mih dow a-i tut-e CHAKRAMANG a-i kowh Thurai tawi uowi dowi rakowi chekhai,’ napa büah kown.18Amatni dow nachang lup ngak kown, now akeng thuraiuüa kowi nacham chupiia büah kown. Naiawng rakowi amatni kowi dow ang natawi khowngah kown nadowi.19“Mosi hai Josua, enchi mih mami meng dow ruiah iüa diah. Mami meng dow Israeluüa kowi sangah iüa diah. Mami meng che amatni tuk hanow amatni chang ngak khe mami meng mih amatni kowi nathuak pe saksi kown.20Amatni pipu-uüa tut-e kowh ang khamah mih pren kowi dow amatni kowi ang nakowpawla kown. Nakowi dow iawn tui, kuai tui hai tawng chap paw akhawr uowi dowi chekhai. Nakowi dow amatni nauah mih chakkham amatni naka cha naka kham kown, now nakau hanow asowrma nauowi büah kown. Nachenganchepaw amatni dow ang hownia napowt büah kown, now akeng thuraiuüa kowi nacham chupiia büah kown. Amatni dow nanuata ang kown, now amatni hown kowh ang towah mih sangbowk laitawm dow napiakta büah kown.21Naiawng rakowi amatni luk kowi phih maiow hai ngare towk rah maiow ang nauang pawla pe kown. Nami khin khe amatni dow mami meng natamata kown nadowi. Tawngplawng kowchow panow mami meng dow amatni vüi saksi iawng nachowng kown. Napeah kownkow ang khamah mih pren kowi dow kawmat paw amatni kowi ang kowpawla dowi tak. Nachenganchepaw nakowi amatni kowting kung kowi tawng chow nakowchang kownkow tuak mih ang aiawng tuk,” pape khai.22Naiawng rakowi nami ni khe nami meng dow Mosi ruiah hanow Israeluüa kowi sangah khai.23Nami kung kowi Nun kowh chapa Josua kowi CHAKRAMANG tek pe mih, “Sakkhawtma hai sakkraingma uowiah diah. Israeluüa kowi napeah kownkow ang khamah mih pren kowi amatni kowi dow en nakowpawla kown. Ang matia ngengche natawi uowila en kown taih,” pakhai.24Maiawngün ari aiang maten dow auown hownia chur pat lowkchow mih chabowih kowi Mosi ruiah kaneu khai.25Nami kung kowi CHAKRAMANG kowh sangbowk laitawm kawt mih Leviuüa kowi Mosi tek pe mih,26“Mami dow rirow bowih chekhai. Mami bowih dow CHAKRAMANG enni kowh Thurai kowh sangbowk laitawm tawkpla ria kowi kowtowah büa diah. Nahanow mami bowih mih enni Israeluüa vüi kingküa mih saksi iawng nauowi kown towbowt.27Enni dow laiüama hai kingküa dawma pami ang aiawng tuk. Ang sing uowi reng tak khe ngam dow CHAKRAMANG kowi enni kingküaah khai. Ang kowng kung kowi ngam dow CHAKRAMANG kowi lainowmma enni nakingküaah kown chekhai.28Enni krungchak kowi kowh lawngtang aluchowuüa hai maru iukuüa maten kowi ang pur kowi uang kua uang lawmla diah. Natawi thuak saksi kownkow mukuang hai krawng kowi towngla se maiawngün laiklow amatni kowi tekla pe kown ang nau.29Ang tuk, ang kowng kung kowi dow lainowmma enni nata piak kown. Enni nachünah kownkow ang pe enni mih ana pek dow enni nanuata kown. Now CHAKRAMANG naukhi-ah dowi mih lup dow enni nachang kown; enni dow nathawp arup kown. Naiawng rakowi CHAKRAMANG dow nakunmarau enni kown, now aia dow enni luk kowi nauang pawla enni piakra kown,” pakhai.30Nami kung kowi Mosi dow auown hownia chur pat mami meng mih Israeluüa kowi tek pe khai:The Seed Company