Plan Rui20
Tasen khe kowh rirow
1“Cham dowk tasen khe enni kowh lak-e ransu-uüa kowh kawrnga, kawrnga kari hai siphaiuüa lang hu khai chepaw hangkow kram büa diah. Tawngplawng kowchow panow Aigupta pren hownia kowh uang lawtla enni mih CHAKRAMANG enni kowh Thurai dow natawi uowila enni kown taih.2Enni dowk tasen kown chowbowt khe uamow nauangah hanow siphaiuüa kowi natek pe kown mih, ‘Israel siphaiuüa low, sünta büah. Ani mih ransu-uüa hown enni nadowk tasen kown chowbowt. Sakkraingma uowi büa diah; tawngpaw hangkow kram büah. Ransu-uüa kowi khita now hang chür büah.4Tawngplawng kowchow panow enni kowh ransu-uüa kowi natawi sen enni kownkow CHAKRAMANG enni kowh Thurai mih enni hown natawi kown. Aia dow nape awng enni kown taih,’ napape kown.5“Nami kung kowi dow siphai aluchowuüa natek pe siphai hawmh kown mih, ‘Enni pungmadawng kowi changta kim sar hüah kowh Thurai tut-e apla dowi tak mih uowi ne bow? Uowi khai hanow nami maru dow aia kim kowi pacham plan lah. Tawi tarü tasen kowh tasen rah kowi cham kowng khai hanow aia kowh kim chang ia dow akeng mih maru nata apta pe ün tarawng.6Changla grep krum hüah kowh ka chala auih dowi tak mih maru uowi ne bow? Uowi khai hanow nami maru paw kim kowi pacham plan lah. Tawi tarü tasen kowh tasen rah kowi cham kowng khai hanow aia kowh grep krum chang ia dow akeng mih maru nata powngta pe ün tarawng.7Cham khamla masi hüah mih maru uowi ne bow? Uowi khai hanow nami maru paw aia kim kowi pacham plan lah. Tawi tarü tasen kowh tasen rah kowi cham kowng khai hanow aia kowh masi kham dow akeng mih maru nata chawngta pe ün tarawng.8Nami klen kowi enni pungmadawng hownia sakkraing dowi, krampuma mih maru uowi ne bow? Uowi khai hanow nami maru paw kim kowi pacham plan lah. Naiawng nadowi hanow enni rakowi akeng miuüa paw natawi sak nen ün tarawng,’ napape kown.9Naiawngün laiklow ki tek pe kung kowi dow siphai aluchowuüa mih siphaiuüa thum towng krawi tow pe aluchow lowk ia chi kown.10“Enni krawi sen marow dowi rawn khe nakowi kowh maru-uüa kowi enni narik phowng pe satang kown. Dowkah tasen dowi kowi nakowi kowh maru-uüa mih enni krüa kowi nauowi kown mih nauta chünchü mih enni nakowrik tek pe kown.11Naiawng enni tek pe mih che nauta kowh amatni kowh tapplawt uow enni khai hanow nakowi kowh maru maten kowi dow enni nachangla nar kown, now amatni dow khawlawt dowi kowi nachang enni lup kown.12Nachenganchepaw naiawng enni tek pe kowh nauta dowi kowi hawt dowk enni tasen khai hanow amatni kowi dow enni nasenah kown.13Nami marow mih CHAKRAMANG pe powngta enni kung kowi ta sing uowi mih kachakuüa maten kowi enni nasaita kown.14Tawkchedow masiuüa, ngeu-uüa, tawncher hawmh hai nakowi kowh uowi mih chap srui dow enni matia vüi enni naia towah kown. Enni kowh ransu-uüa pren hownia CHAKRAMANG pe powng enni mih uanh maten dow enni naia tawngah kown.15Naiawng enni nachang kown mih dow enni hown alakma mih marow kowi chowtaih; enni hown atawnchow mih chenchapuüa kowh marow kowi nadowi.16“Tawkchedow nachangla dawngthawnguan kownkow CHAKRAMANG nape powng enni kown mih marow kowi kowh maru maten kowi dow enni nasaita bowk kown takla.17CHAKRAMANG enni kowh Thurai ana pek iawng Hituüa, Amawruüa, Kananuüa, Perizuüa, Hivuüa hai Jebusuüa kowi dow asaima enni nachumta kown.18Naiawng che asaima enni chumta dowi hanow chup arup büah khe kowh suiiai kaniaima amatni changah mih lup dow enni natawi tasang kown chekhai. Now naiawng chang mih hownia CHAKRAMANG enni kowh Thurai kowi enni kingküa kown chekhai.19“Enni napowngah kown mih marow kowi maru naia kup naia lawtla dowi kownkow marow mih akrama enni rumta hüa mih khin paw nauowi kown. Naiawng enni rumta hüa khe nakowi kowh singh uih dow enni naia cha kown. Tawkche naiawngün singh dow hangkow kripla büa diah. Tawngplawng kowchow panow naiawngün singh dow enni kowh ransu nadowi.20Nachenganchepaw chaah uih mih singh nadowi pami enni tukah mih dow enni naia krip kown taih. Naiawngün singh dow tasen müa enni naia tawngah kown.The Seed Company