Plan Rui19
1“Enni nakowpowngah kown mih pren kowi kowh chenchapuüa kowi dow enni pur hownia CHAKRAMANG enni kowh Thurai mih namata kown. Now amatni kowh marow hai kim kowi dow enni nauowi kown.2Nami khin khe dow nachangla dawngthawnguan kownkow CHAKRAMANG enni kowh Thurai pe enni mih pren enni nachangah sum bak kown. Naiawngün arah towng dow enni nakhowm nabowk pe tatung tanimra marow lowk chi kown. Now nami marow prakowi mangla mih tiama enni nachang pe kown, nahanow saita maru mih dow aiachow hown naiawngün marow kowi naia powt kown.4“Mami dow cham saita maru khe kowh rirow chekhai. Kowngta kown mih tuak uowi dowi kowi cham saita maru khai hanow nami maru dow tatung tanimra marow kowi naia powt kown.5Laiuan kowi, maru pre ia dow cham taiua tu singh kownkow kaurawng kowi cham kowi khai. Now tu singh mih khin khe lowk mih maru kowh marek dow taplet kowh alowk mih maru kowi kowkak khai. Now nami maru dow kowng khai. Naiawng phaw khai hanow marek taplet mih maru dow aia hown atawnchow mih tatung tanimra marow kowi naia powt kown. Nahanow aia dow naia plai kown.6Nachenganchepaw tatung tanimra marow che nami maru hownia alakma chekhai hanow nakowi aia kowtowm dowi rawn napaw lu klai kown mih maru dow naka khümta chepaw naia. Now lu klai pawk mih maru kunmarau lai rakowi aia kowi dow nakowngta chepaw naia; tawkchedow kowngla pat mih ripra dow nami maru kak tataing dowi chowdiah.7Naiawng rakowi enni vüi nalang khowmta bowkta tatung tanimra marow sum buk kown mih ana ang pe enni khai.8“Ani mih CHAKRAMANG enni kowh Thurai kowi nasakrauah kown mih hai aia laiklow iawng nauowi kown mih ana ang pe enni khowk. Nami ana pek che enni chün khai hanow enni pipu-uüa tut-e kowh khamta mih iawng CHAKRAMANG enni kowh Thurai mih naphia enni pren sünghi kown. Nami khin khe dow enni vüi enni nalang khowmta bowkta tatung tanimra marow sum buk iawk kown.10Naiawng che enni chang hanow enni nachangla dawngthawnguan kownkow CHAKRAMANG enni kowh Thurai pe enni mih pren kowi angak uowi dowi mih maru-uüa nakowng kown nadowi bowt, now naiawngün kowng mih rakowi enni naka aprek kown nadowi bowt.11“Nachenganchepaw kowmatia kimping namkhet kowi naukhi-ah dowi rakowi saiah kownkow hawt pawm hüah mih maru uowi chepaw naia kown, now aia kowi bawpah kowh kowngta khai chepaw naia kown. Nakhowk khe abawp miia mih naiawngün tatung tanimra marow kowi kowpowt khai hanow12nami tatung tanimra marow hownia sai maru mih kowi dow nauang pawla kownkow aia uowiah mih marow kowi kowh lawngtang aluchowuüa nakowchin maru kown. Now nami maru kowi nakowngta kownkow lu klai pawk mih maru rut kowi amatni naapta kown.13Aia kowi dow mapaw enni nasanaah kown nadowi. Enni Israeluüa pungmadawng hownia achinawmma mih maru kowi sai miia kowi dow enni nakowngta ngengche kown takla. Nahanow enni naiung kown.14“Enni napowngah kownkow CHAKRAMANG enni kowh Thurai nape enni pren kown chowbowt. Nami pren kowi enni kowuowi mih khin khe enni kowh pipu-uüa naretla enni süng kown. Enni kowh pipu-uüa kowng kung kowi paw enni kowh süng rihi dow mapaw enni naia sütsowi kown nadowi.15“Lowra mih maru kowi nachetah kownkow tara chetra kowi uang pawla mih khin khe saksi thuak mih lowk iachow taih hanow tawng iawng mih maru kowi paw enni naia tang pe aprek kown nadowi; saksi thuak mih pre sum ia khü chiang enni naia tang pe aprek kown.16“Maru lowk ia kowi piakah kown nau kowh thuak dai lai saksi mih uowi khai hanow17dai lai saksi thuak mih hai bekah angak mih maru hailawm amatchi pre ia trui kowi CHAKRAMANG pur kowi nakowpawla kown takla. Now nami khin khe kowh uamow hai tara chet miuüa dow nachet pe tara kown.18Nami lawnguan kowi tara chet miuüa dow nakrawi paw pe satang kaneu kown. Now nami maru dow thuak dai lai saksi mih chowtaih pahai tukta khai hanow19aia thuak pe dai lai saksi mih maru kowi nau peah kown mih ripra dow nami maru kowi napeah ngengche kown. Naiawng hai enni pungmadawng hownia naiawng mih angak dow enni namata kown takla.20Nahanow enni Israeluüa bowkbowk dow nami lawnguan ta hanow nakram kown. Now enni pungmadawng kowi dow naiawng mih angak miapaw nachang kown nadowi bowt.21Thuak dai lai saksi mih maru kowi dow mapaw enni nasanaah kown nadowi. Aia kowi dow sak kowh sak klai, mik kowh mik klai, iüng kowh iüng klai, rut kowh rut klai, khawk kowh khawk klai enni napaw pe kown.
The Seed Company