Plan Rui21
1“Enni napowngah kownkow CHAKRAMANG enni kowh Thurai pe enni mih pren kowi kowh dowm kowi dow maru saita mih uak enni cham khi chepaw naia. Nachenganchepaw sai sak miia kowi dow enni tuk dowi chekhai.2Naiawng che enni cham khi khai hanow enni kowh lawngtang aluchowuüa hai tara chet miuüa dow nami uak uowi rah re-e nakowkowi kown. Nami hownia tawng mih marow chow lang tatawn mih amatni nakhaiah kown.3Now nami uak uowi rah hownia kowh lang tatawn nowm nowm mih marow kowi kowh lawngtang aluchowuüa dow nauang pawla chia iia apum kown takla. Nami chia iia dow katpaw changla lup dowi tak mih hai katpaw tang pe laithawn tim dowi tak mih naown kown takla.4Now nami chia iia kowi dow katpaw lupah dowi mih lawngrawi kowi nacham pawla kown. Nami lawngrawi kowi dow tui hawr reng mih aw nauowi kown takla. Now nakowi mih nami chia iia kowi naklowkta pe angawng büah kown.5Nakowi dow uamowuüa paw nakowtawi kown. Tawngplawng kowchow panow uamowuüa kowi dow aia pur kowi nachang lup kownkow hai aia ming hown maru kawmuüa kowi nape prasi kownkow CHAKRAMANG enni kowh Thurai lang kloah mih chekhai. Nami klen kowi maru takhowk taran khe hai tabawp tatep mih khin khe nachet pe tara kown mih paw amatni chekhai.6Now uak uowi rah hownia kowh lang tatawn nowm nowm mih marow kowi kowh lawngtang aluchowuüa dow klowkta pe angawng mih chia iia luk kowi nasau rut kown.7Nami kung kowi dow amatni natek kown mih, ‘Mami maru kowi dow anging saiah mih nadowi, now asai miia kowi paw anging khi dowi chekhai.8Aw CHAKRAMANG, en uang klanla mih Israeluüa kowi lawtta diah. Mami angak uowi dowi mih maru kowng mih aprek dow en kowh maru-uüa luk kowi hangkow tang pe diah,’ napa kown. Nahanow nami maru kowng mih aprek dow CHAKRAMANG nalawtta enni kown towbowt.9Naiawng hai CHAKRAMANG mik kowi iung iawng enni nachang kown. Nahanow angak uowi dowi mih maru kowi saita mih aprek hownia enni naka lawtra kown towbowt.10“Enni kowh ransu-uüa hown enni cham dowk tasen mih khin khe CHAKRAMANG enni kowh Thurai dow ransu-uüa kowi enni tut-e nape sumah kown. Now amatni kowi dow enni nauang khümla kown.11Naiawngün enni uang khümla mih pungmadawng kowi enni naukhi-ah mih klangiungma mih masiuüa uowi ne hanow amatni kowi dow enni naia chawng kown taih.12Aia kowi dow enni kim kowi enni napawla kown. Now aia kowi dow enni nape khaiah sam kown, now rutmi khawkmi paw enni nape kretah kown takla.13Now aia kowi uang khümla khe kowh aia üla mih tawnguat ün dow naklüpta hanow aia nakhup tawnguat sar kown. Now nami masiuüa dow a-u a-pa vüi kowi ala mowr nauowi uiting uangtak kown. Nami kung kowi dow nami masiuüa kowi enni naia chawngah kown towbowt. Now nami masiuüa kowi chawngah mih kachakuüa dow nami masiuüa kowh hua nachowng kown towbowt. Nahanow nami masiuüa paw nami kachakuüa kowh masi nachowng kown towbowt.14Akung kowi nami masiuüa luk kowi che enni sak-ih dowi hanow enni naia khuata kown. Aia kowi dow aia nau mih re-e enni nape powtah kown takla. Nachenganchepaw aia kowi dow enni naia sumah kown nadowi, now nachangla nar kownkow enni naia towah kown nadowi. Tawngplawng kowchow panow masi iawng hai aia kowi dow enni phua iuaah khowk chekhai.15“Laiuan kowi, maru lowk ia kowh dow masi uowi pre ma. Now lowk mih kowi dow lainowmma aia sakrauah khai. Nachenganchepaw alowk mih kowi dow aia sakrauah marai dowi chekhai. Amasi pre ma trui dow pen chapa khai. Tawkchedow aia sakrauah marai dowi mih masi kowh chapa dow uang rik dia khai.16Now achapa pre ia kowi aia bak pe dawngthawnguan mih khin khe dow aia sakrauah marai dowi mih masi kowh chapa kowi aia napeah chapa ta kakbak kown takla. Nami chapa takcha kowi aia lang sakrauah mih masi kowh chapa kowi aia naia peah kown nadowi. Tawngplawng kowchow panow aia kowh chapa ta ching dow aia sakrauah marai dowi mih masi kowh chapa chekhai.17Aia kowh chapa ta kowi dow aia kowh akeng mih chapauüa kowi lak-e pre phow aia nalang chüt peah dawngthawnguan kown takla. Chapa ta kowi dow aia sakrauah dowi mih masi hown kowh chepaw aia nalang chüt peah dawngthawnguan kown takla. Chapa ta dow kala chah kown mih kür mat müa chekhai. Chapa ta rah dow nami chapa kowh vüi bak chowtaih.18“Laiuan kowi, maru lowk ia kowh dow laiüama mih hai kingküa dawma mih chapa uowi lowk ia. Nami chapa dow mapaw sünta u-pa laiklow dowi, now u-pa kowh pringhawi laiklow paw chün dowi chekhai.19Naiawng chekhai hanow nami chapa kowi dow marow tapplawt re-e lawngtang aluchowuüa tut-e a-u a-pa nakowpawla kown.20Amatchi dow naiawngün lawngtang aluchowuüa kowi natek pe kown mih, ‘Angching kowh chapa lainowmma lai üa, now kingküa dawma chekhai; aia dow angching kowh laiklow mapaw chün dowi chekhai. Aia dow kham iu kham rak ün, now iawm pawisa tangka plawtlawt chekhai,’ napa kown.21Now nami marow kowi kowh kachakuüa maten dow huaklu hown kowng pat aia kowi nakuakah kown takla. Naiawng hai enni pungmadawng hownia dow naiawng mih angak enni namata kown takla. Now Israeluüa bowkbowk dow nami lawnguan ta hanow nakram kown.22“Changta angak kowh kowngla pat mih ripra kak taing mih maru paw nauowi kown. Naiawng mih maru kowi dow kowngta hanow auak mih singh kowi natarta hüah kown.23Tawkchedow nami uak mih uar prowt singh kowi enni naia tarta hüah kown nadowi. Nami uak dow enni tarah mih ni khe enni nadupta kown takla. Tawngplawng kowchow panow naiawng singh kowi enni tarta hüah hanow Thurai kowh piatira enni pren kowi nauang kla kown chekhai. Enni dupta hanow enni nachangla dawngthawnguan kownkow CHAKRAMANG enni kowh Thurai pe enni mih pren dow natasürlawk kown nadowi bowt.
The Seed Company