Plan Rui18
1“Levi krungchakuüa dow uamowuüa hailawm akeng mih Israeluüa iawng natawi ka dawngthawnguan bak kown nadowi. CHAKRAMANG vüi maih kowi kowh tikah kown mih chakkham uanap maru uang pawla mih hai CHAKRAMANG kowi kowh maru uang ap-ah mih chap chowtaih amatni nacha kown.2Amatni dow amatni kowh tainau Israeluüa pungmadawng kowi tawng iawng mih krawng bawn paw natawi ka kown nadowi. CHAKRAMANG khamta khowk iawng CHAKRAMANG chowtaih amatni kowh dawngthawnguan naown kown.3“Chia, rua hai ruapur hown enni chang phuchua mih khin khe apang nga, awmthur nga hai amuma ün dow uamowuüa kowi enni napeah kown. Naiawngün dow uamowuüa kowh vüi bak chekhai.4Enni rik kuaah mih luprak, grep tui sar hai kanrawn sau, now rua hai ruapur hownia kowh rik kepah mih pawi uamowuüa kowi enni napeah kown.5Tawngplawng kowchow panow enni Israel krungchakuüa pungmadawng hownia Levi krungchakuüa kowi dow CHAKRAMANG enni kowh Thurai lang kloah mih chekhai. Amatni kowi dow atungma CHAKRAMANG kowi naia chupiia kownkow aia lang kloah mih chekhai.6“Israel pren kowi Leviuüa nau khai mih dow aia uowi rah hownia CHAKRAMANG kowi nachupiiala kownkow CHAKRAMANG lang kloah mih arah kowi naia powt kown.7Nakowi dow hawt iawng uowi mih akeng mih Leviuüa iawng aia paw CHAKRAMANG aia kowh Thurai lup natawi ia chang kown.8Now kimchak hownia uang krawi sa pe uanh chepaw nakowi kowh maru uang changla phuchua mih hai uang ap-ah mih chakkham srui dow aia paw arisang natawi ka kown.9“CHAKRAMANG enni kowh Thurai nape powng enni kown mih pren kowi enni kowuowi khe nakowi kowh chenchapuüa chang iawng suiiai kaniaima mih lup dow enni natawi tasang kown nadowi.10Nami pren kowi dow enni pungmadawng hownia kowmatia chah kowi maih kowi nawmah now enni natawi changla phuchua kown nadowi. Now hawra mük mih, mantan chang mih, plang kuak mih, maiaklese tüng mih, püi howng mih, süngnam hai lümla ngak hown taklawp taiua mih, now kowng mih maru-uüa kowh lümla hown taklawp taiua mih maru dow naia uowi kown nadowi.12Naiawng chang mih maru-uüa dow CHAKRAMANG tut-e suiiai kaniaima chekhai. Enni nakowuowiah kown mih prenchakuüa maten kowi enni pur hownia CHAKRAMANG enni kowh Thurai naprütta kown mih dow naiawng suiiai kaniaima mih lup chang büah rakowi chekhai.13Enni dow CHAKRAMANG enni kowh Thurai pur kowi achinawmma nauowi kown takla.14Enni nakowpowngah kown mih pren kowi kowh maru-uüa dow mantan chang miuüa hai hawra sarauüa kowh laiklow chün reng chekhai. Nachenganchepaw enni kowi dow naiawng mih lup CHAKRAMANG enni kowh Thurai pe chang enni dowi chekhai.15“Enni Israeluüa pungmadawng hownia CHAKRAMANG enni kowh Thurai dow enni vüi ang iawng mih risi nathawp enni lowk ia kown. Nami risi laiklow iawng enni nauowi kown takla.16Tawngplawng kowchow panow nami risi dow CHAKRAMANG enni kowh Thurai tut-e kowh enni lüah mih chekhai. Sinai hungh re-e enni bowkbowk CHAKRAMANG pur kowi takua talawm mih ni khe enni tek mih, ‘CHAKRAMANG anging kowh Thurai laiklow ta kown anging nau dowi bowt, now mami hungh kowi kowh akraingma mih maih paw khi kown anging nau dowi bowt; khi now anging nakowng kown chekhai,’ pakhai.17“Nakhowk khe CHAKRAMANG tek ang mih, ‘Kowbüah tek mih lainowmma iung.18Amatni Israeluüa pungmadawng hownia amatni vüi en iawng mih risi ang nathawp pe lowk ia kown. Nami risi nawr hown ang kowh laiklow dow ang natekah kown. Nami risi dow ang pe tekah iawng amatni kowi natek pe kown.19Nami risi tekah mih ang kowh laiklow nau sünta dowi mih maru-uüa kowi dow ang matia ngengche naripah kown.20Nachenganchepaw ang peah ana dowi matchang ang ming hown krawi tek lai mih risi kowi dow enni nakowngta kown, now akeng thuraiuüa ming hown krawi tek lai mih risiuüa kowi paw enni nakowngta kown takla,’ pakhai.21“Nachenganchepaw naiawng risiuüa uang krawi tek lai mih khin khe, ‘CHAKRAMANG hownia kowh laiklow ching bow tawng iawng chow anging natukah kown?’ padow enni naka tuak chepaw naia.22Nakhowk khe maiawng enni natukah kown: CHAKRAMANG ming hown che risi uang krawi tek lai khai, now nami risi tekah iawng uang tachi dowi hanow nami dow CHAKRAMANG hownia kowh uang chinah mih nadowi pami tukah büa diah. Nami dow aia saktuak hown kowh uang krawi tekah mih chekhai. Naiawng rakowi aia kowi dow enni nakramah kown nadowi.
The Seed Company