Plan Rui17
1“Chia chepaw, rua chepaw, ruapur chepaw aser auowk uowi mih tawncher dow CHAKRAMANG enni kowh Thurai vüi enni naap kown nadowi. Tawngplawng kowchow panow aser auowk uowi mih dow CHAKRAMANG suiah reng chekhai.2“CHAKRAMANG enni kowh Thurai pe enni mih marow kowi dow enni pungmadawng hownia kachakuüa lah, masiuüa lah CHAKRAMANG enni kowh Thurai tut-e suiiai kaniaima mih lup changta khai chepaw naia kown. Naiawng chang mih dow enni hown kowh Thurai towah mih sangbowk laitawm chün dowi mih chekhai.3Nami maru dow akeng thuraiuüa kowh lup cham tawi chang chepaw naia kown; aia dow akeng thuraiuüa kowi, sat kowi, lama kowi hai krek kowi ün cham tawi chupiia chepaw naia kown. Naiawng hai ang pe enni mih CHAKRAMANG kowh ana pek dow nami maru chün dowi chepaw naia kown.4Naiawng mih satang che enni ta khai hanow nami lawnguan kowi enni nakrawi paw pe satang kaneu kown takla. Naiawng mih suiiai kaniaima mih lup che enni pungmadawng kowi phaw khai nowm hanow5kachakuüa chepaw, masiuüa chepaw naiawng suiiai kaniaima mih lup chang mih maru kowi dow enni naripah ngengche kown. Aia kowi dow marow tapplawt re-e nacham pawla hanow kowng pat huaklu hown enni nakuakah kown takla.6Naiawng chang mih maru luk kowi thuak saksi mih che uowi pre sum ia hanow nami maru kowi dow enni naia kowngta kown. Tawkchedow thuak saksi mih che lowk iachow taih hanow naiawng chang mih maru kowi enni naia kowngta kown nadowi.7Aia kowi nakowngta kownkow thuak saksi miuüa huaklu hown narik kuakah kown. Nami kung kowi dow bowkbowk maru natawi kuakah kown. Naiawng hai enni pungmadawng hownia naiawng mih angak dow enni namata kown.8“Enni kowh tara chetra kowi dow enni tut-e tara chet akratma mih uowi chepaw naia kown. Nami dow kowmatia sak nau hown kowh saita mih hai bawpta mih chünchü, now rut tawi khawk tawi kowh saita mih hai bawpta mih chünchü tukah dowi chepaw naia kown. Nami klen kowi dawngthawnguan rakowi takhowk taran kowh tara chet akratma chepaw naia kown. Naiawng mih che uowi khai hanow CHAKRAMANG enni kowh Thurai lang kloah mih arah kowi enni nakowkowi kown takla.9Now nami khin khe kowh tara chet miia hai Levi chenchap uamowuüa tut-e enni nakowkowi kown. Amatni kowi dow enni nakowlawp pe kaneu kown. Now tawng chow chang takla mih amatni natek enni kown.10CHAKRAMANG lang kloah mih arah kowi kowh amatni tek enni mih iawng dow enni nachang kown. Amatni tekah mih rowprowp dow enni nachang ngengche kown takla.11Ari aiang lawnguan kowi kowh amatni tüngsang enni mih hai tara chet lawnguan kowi amatni tek enni mih iawng enni nachang kown. Amatni tek iawng rowprowp enni nachang kown; mapaw enni naia klowi kown nadowi.12Bawri rakowi nami tara chet miia hai CHAKRAMANG enni kowh Thurai lup chang mih uamowuüa kowh laiklow chün kown nau dowi mih maru kowi dow nakowngta ngengche kown takla. Naiawng hai enni Israeluüa pungmadawng hownia naiawng mih angak dow enni namata kown.13Nahanow maru maten dow naiawng mih ripra lawnguan nata hanow nakram kown. Now amatni dow naiawng mih bawrira nauam chang kown nadowi bowt.14“CHAKRAMANG enni kowh Thurai nape enni kown mih pren dow enni nakowpowng kown, now nakowi dow enni nakowuowi kown. Nakhowk khe enni natek kown mih, ‘A-i luk kowi nachang alow kownkow a-i riaret kowi kowh chenchapuüa iawng a-i paw tow mang lowk ia diah sik,’ napa kown.15Nami khin khe dow CHAKRAMANG enni kowh Thurai kloah mih kowi chowtaih enni naia pe chowmah mang kown. Nami dow enni Israeluüa pungmadawng hownia naown kown takla. Akeng chenchap hownia kowh maru kowi dow enni naia towah mang kown nadowi.16Nami mang dow aia vüi ahuma naia kram kawrnga kown nadowi. Now Aigupta pren kowi nakowran kawrnga kownkow aia dow Israeluüa kowi naia chinah kown nadowi. Tawngplawng kowchow panow CHAKRAMANG tek enni mih, ‘Aigupta pren kowi katpaw hangkow plan kowi büah tham bowt,’ pakhai.17Nami mang dow akawmma naia paw masi kown nadowi. Naiawng che paw khai hanow CHAKRAMANG kowi aia chupiia mih hownia akeng prakowi amasiuüa mih nacham pawla kown chekhai. Nami klen kowi aia dow aia vüi arawn amatma naia kram kuh hai tai kown nadowi.18“Aia uown chowm mang khe aia dow Levi chenchap uamowuüa pur kowi nami charam tua kowi kowh arui uowi mih ari aiang maten charam tua kowi naplan ruila kown takla.19Nami charam tua dow aia tut-e aia natowah reng kown. Now aia sing uowi mowr naphatah reng kown takla. Nahanow CHAKRAMANG Thurai kowi ringkaw krang aia natuk kown, ari aiang hai rirow laiklow maten aia nachün kown,20ari aiang hownia ditchow paw aia nasüt kown nadowi bowt, now akeng mih Israeluüa lak-e aia lang iuk pami saktuak nauowi kown nadowi bowt. Nahanow aia hai aia krungchakuüa dow ning kawmma Israeluüa luk kowi naia chowm mang kown.
The Seed Company