Plan Rui16
Takat Pawi
1“Abib la kowi dow CHAKRAMANG enni kowh Thurai vüi Takat Pawi enni nasun kown. Tawngplawng kowchow panow Aigupta pren hownia CHAKRAMANG uang lawtla enni mih dow Abib la kowi kowh uar-e khe chekhai.2Aia kowi maru kawmuüa nachupiiala kownkow CHAKRAMANG mih aiamat uowi rah nakloah parah kown. Nami arah kowi dow enni kowh tawncher hawmh hownia chia chepaw, rua chepaw, ruapur chepaw enni nauang pawla kown. Nami tawncher dow CHAKRAMANG vüi enni nachangla Takat Pawi kown.3Naiawng enni phuchuala CHAKRAMANG mih tawncher nga dow the pe tuah dowi mih kawm hown enni nachaah kown. Aigupta pren hownia sakkrowng sakkrangma enni lawt kown chowbowt khe kowh enni chala kawm iawng nami the pe tuah dowi mih kawm dow ranit ni mowr enni nacha kown. Nami kawm dow ngare kham kawm pahai enni natuakah kown. Nami kawm enni nacha kown mih dow Aigupta pren hownia enni uang lawt khe kowh lawnguan chowngchowng saksakma enni natukla reng kownkow chekhai.4Nami ranit ni lak kowi dow enni pren kowi mia kim kowi paw the pe tuah mih tawng chap paw naia uowi kown nadowi. Nami klen kowi pawi uown ni sat kup khe kowh enni changla phuchua mih tawncher nga paw auai rau mowr enni naia towah kown nadowi.5“CHAKRAMANG enni kowh Thurai pe enni mih marow pungmadawng hownia lowra mih marow kowi Takat Pawi kowi kowh tawncher dow enni naia phuchua kown nadowi.6Takat Pawi vüi kowi kowh tawncher hown kowh phuchua dow aia kowi maru kawmuüa nachupiiala kownkow CHAKRAMANG aiamat lang kloah mih arah kowi chowtaih enni nachang kown. Ning towng nami pawi dow Aigupta pren hownia enni uang lawt mih ni kowi sat kup khe enni nasunah kown.7Takat Pawi kowi kowh changla phuchua mih chaknga dow CHAKRAMANG enni kowh Thurai kloah mih arah kowi enni naengah hanow nachaah kown. Now auai rau dow enni matia tangbung kowi enni naia powt kown.8Taruk ni mowr the pe tuah dowi mih kawm enni nacha kown. Now ranit ni mih ni khe dow CHAKRAMANG enni kowh Thurai vüi takua kri enni nasunah kown; nami ni khe dow tawng lup paw enni naia chang kown nadowi.9“Ning towng enni uown kua luprak mih ni hownia ranit sapta mowr enni naklowkah kown.10Nami kung kowi dow CHAKRAMANG enni kowh Thurai kowi natüngla ringkawra kownkow Bowthowk Pawi enni nasun kown. Nami pawi kowi dow nami ning kowi kowh Thurai prasira hown enni kaah mih luprak hownia enni ia mowr chi enni nauang pawla uanap kown.11Nami pawi khe dow CHAKRAMANG enni kowh Thurai kowi nachupiiala kownkow aiamat kloah mih aia uowi rah kowi enni napiaw kown. Nakowi dow enni bowkbowk enni matia hai enni kowh chauüa, enni kowh naruüa, enni pungmadawng kowi kowh tawi uowi mih Leviuüa, enni tut-e kowh tawi uowi mih prenlang maru-uüa, siring saratchowuüa, mamaimowuüa CHAKRAMANG pur kowi napiaw kown.12Aigupta pren kowi enni paw uowila nar akat mih tuakah now mami rirow maten dow enni nachünah kaneu kown.13“Enni ki ngenta luprak hai ki küata grep bowk kung kowi dow ranit ni mowr enni nachang Te Pawi kown.14Nami pawi kowi dow enni bowkbowk enni matia hai enni kowh chauüa, enni kowh narma narlauüa, enni pungmadawng kowi kowh tawi uowi mih Leviuüa, enni tut-e kowh tawi uowi mih prenlang maru-uüa, siring saratchowuüa, mamaimowuüa CHAKRAMANG pur kowi napiaw kown.15Enni kowh luprak maten luk kowi hai enni changah mih lup maten kowi CHAKRAMANG dow pe enni prasi khai. Naiawng aia pe enni prasi mih dow enni kowh awmrawmra pacham taküm lah pakowh chekhai. Naiawng rakowi CHAKRAMANG enni kowh Thurai lang kloah mih arah kowi aiamat vüi ranit ni mowr nami pawi dow enni nasun kown.16“CHAKRAMANG enni kowh Thurai kloah mih aiamat uowi rah kowi dow paning kowi sum kat chi enni nachang pawi kown. Nami pawi dow Takat Pawi, Bowthowk Pawi hai Te Pawi chekhai. Naiawngün pawi chang mih khin khe dow enni kachakuüa maten mih CHAKRAMANG pur kowi nakowkowi kown takla. Tawkchedow CHAKRAMANG pur kowi rut khawma miapaw naia kowi kown nadowi.17Nami pawi khe dow nami ning kowi kowh Thurai prasi hown enni kaah mih luprak hownia enni ia mowr chi enni nauang ap kown.18“CHAKRAMANG enni kowh Thurai nape enni kown mih marow maten kowi dow chowlowkkow krungchakuüa vüi tara chet miuüa hai kruitown miuüa enni natowah kown. Nami enni towah mih maru-uüa dow maru kawmuüa kowi tara nowm nachet pe kown.19Tara nowm nadowi mih enni nachet kown nadowi, now mia pra paw enni naia tangi kown nadowi. Bümsua paw enni naia paw kown nadowi. Tawngplawng kowchow panow paw bümsua mih maru dow chanlaima chepaw mik duma iawng chekhai, now achi anawmma chepaw angakma mih maru iawng chekhai.20Naiawng rakowi anowmma enni nauowi kown takla. Nahanow CHAKRAMANG enni kowh Thurai nape enni kown mih pren dow enni naia powng kown, now nakowi dow chowngdawng sakklangma enni naia uowi kown.21“CHAKRAMANG enni kowh Thurai vüi enni nathawp pe phuchuara kown mih re-e Asera limpu hai akeng thuraiuüa vüi changla phuchua mih hua enni naia chowk kown nadowi. Tawngplawng kowchow panow CHAKRAMANG enni kowh Thurai dow naiawngün kowi sui chekhai.The Seed Company