Plan Rui15
1“Ranit ning chur towng dow enni cham nau kaah kown mih lowi enni nalawtta ngengche kown.2Nami lowi dow mami rirow iawng enni nalawtah kown: Enni Israeluüa kowi kowh enni peah mih lowi dow enni nalawtta pe ngengche kown. Amatni kowi dow enni nalü pe lowi kown nadowi. Tawngplawng kowchow panow nalawt lowi kown mih khin dow CHAKRAMANG phuangta khowk chekhai.3Akeng chenchapuüa hownia dow enni kowh lowi enni naia lü kown taih. Nachenganchepaw enni Israeluüa kowh lowi dow enni nalawtta pe kown takla.4CHAKRAMANG enni kowh Thurai laiklow hai ani kowh ang pe enni mih ana pek maten che enni chün khai hanow enni Israeluüa pungmadawng kowi miapaw nangarai kown nadowi. Tawngplawng kowchow panow enni nachangla dawngthawnguan kownkow CHAKRAMANG enni kowh Thurai pe enni mih pren kowi ahuma aia nape enni prasi kown.6CHAKRAMANG enni kowh Thurai laikham iawng aia dow nape enni prasi kown. Nahanow enni dow chenchap ahuma kowi naia pe lowi kown. Tawkche enni dow mia iawng mih tut-e paw lowi pawk natakla kown nadowi. Enni dow chenchap ahuma kowi naia kruitown kown. Nachenganchepaw enni kowi dow amiapaw nakruitown enni kown nadowi.7“Tawkche CHAKRAMANG enni kowh Thurai pe enni mih pren kowi enni uowi mih khin khe enni pungmadawng kowi che ngaraima mih uowi khai hanow amatni kowi dow enni namüta hüah kown nadowi. Amatni kowi dow enni nakhowngah kown takla.8Amatni kowi dow kawklawma hai enni napeah kown; amatni lakke mih srui enni nape khawiah kown takla.9Kaneu büa diah. ‘Lowi lawt ning dow uang towm khai bowt. Ang cham pe lowi e ang ka plan dowk tham,’ pami angakma mih saktuak enni sak kowi hangkow towah büa diah. Amatni kowi dow khowngah dowi kowi hangkow müta hüah diah. Enni che khowngah dowi hanow ngarai miuüa dow nakingküala enni kownkow CHAKRAMANG tut-e naawr kar kown chekhai. Now nami ngak rakowi enni naka aprek kown chekhai.10Amatni kowi dow saktuak iungma hai kawklawma hown enni napeah kown takla. Nahanow CHAKRAMANG enni kowh Thurai dow enni changah mih lup maten kowi nape enni prasi kown.11Enni pren kowi ngarai miuüa nauowi ngengche kown. Naiawng rakowi enni Israeluüa pungmadawng kowi kowh ngarai miuüa hai enni pren kowi kowh ngarai miuüa kowi kawklawma hai nakhowngah kown mih ana ani ang pe enni khowk.12“Hebrai chenchap maru-uüa che kachakuüa chepaw, masiuüa chepaw enni tut-e tawi chang nar kownkow uang tasum khai hanow taruk ning mowr nami nar mih enni nimkrüa kowi nachang lup kown. Nachenganchepaw ranit ning mih ning khe dow enni nalawtta kown takla.13Aia kowi enni lawtah mih khin khe dow akhawma enni nalawtah kown nadowi.14Aia kowi dow enni kowh tawncher tawn hownia rua hai ruapur ün, luprak hai grep tui ün enni nakrawi peah kown. CHAKRAMANG enni kowh Thurai pe enni prasi iawng enni kowh nar kowi paw enni napeah kown takla.15Aigupta pren kowi enni paw uowila nar akat chekhai, now nami hownia CHAKRAMANG enni kowh Thurai dow uang klanla enni khai pami sak kowi towah büa diah. Naiawng rakowi mami ana ani ang pe enni khowk.16“Nachenganchepaw nami nar che enni hai enni kowh kimchakuüa kowi sakraula khai, now enni kowi towla now powt kown nau dowi pami achima aia tek khai hanow17enni kowh kimplawt mawm kowi nami nar kowi nanüa pe param hanow chukchem hown enni narui pe kown. Nami hownia now aia dow achowngma enni kowh nar nachowng kown towbowt. Enni kowh narmauüa kowi paw naiawng enni nachang pe kown takla.18“Enni tawnah mih narma narlauüa kowi enni lawtta mih khin khe hangkow sak nga büa diah. Tawngplawng kowchow panow nami taruk ning aia tawi chang enni lup mih dow enni nga sukkri pre ia mih hown tale chekhai. Amatni kowi che enni lawtah khai hanow enni changah mih lup maten kowi CHAKRAMANG enni kowh Thurai nape enni prasi kown.19“Enni kowh tawncher pungmadawng kowi chia chepaw, ruapur chepaw, rua chepaw rik pen mih ala chah maten dow CHAKRAMANG enni kowh Thurai vüi enni nalang kraah kown. Rik pen mih chiala chah kowi dow enni nape changah lup kown nadowi. Now rik pen mih ruala chah hai ruapurla chah kowi paw enni nakep pe pawi kown nadowi.20Naiawngün tawncher dow CHAKRAMANG enni kowh Thurai lang kloah mih arah kowi ning towng enni nakowpawla kown. Nakowi dow enni kowh kimchakuüa hailawm CHAKRAMANG pur kowi enni nachaah kown.21Nachenganchepaw tawncher kowi kowh rik pen mih ala chah che khawk baima, mik duma hai buk kowi ün ma uowi khai hanow nami aser auowk uowi mih tawncher dow CHAKRAMANG vüi enni naphuchuaah kown nadowi.22Nami tawncher dow enni uowi rah kowi enni nachaah kown. Nami chaknga dow cha ngaia nga hai cha naki nga khe kowh iawng asürlawkma mih hai sürlawk dowi miuüa naia cha kown.23Nachenganchepaw avi dow enni nacha kown nadowi; nami dow tui iawng krawng kowi enni nakhükta kown.
The Seed Company