Daniel5
1Ning ahuma rawn kung kowi mang Belsazar mih aia kowh 1,000 ia mih maru iukuüa vüi chang pe pawi kri lowk khai. Nakhowk khe aia dow naiawngün maru-uüa hown taiua kham grep tui khai.2Naiawng kham grep tui mih khin khe kuh hai tai hown kowh bia nauang pawla kownkow mang Belsazar lawt ana khai. Naiawngün bia dow Jerusalem marow kowi kowh Thurai chup kim hownia Belsazar kowh pa Nebuknezar uang pawla mih chekhai. Naiawng mang Belsazar lawt ana mih dow naiawngün bia hown aia, aia kowh maru iukuüa, amasiuüa hai aia changla masi mih narmauüa nakhamla grep tui kownkow chekhai.3Naiawngün bia uang pawla hanow mang hai aia kowh maru iukuüa, aia kowh masi hai changla masi mih narmauüa mih naiawngün bia hown kham grep tui khai.4Khamla grep tui se amatni dow kuh, tai, kri, lawngha, singh hai hua hown kowh thawpah mih arup kowi kiowri büah khai.5Nakhowk khe mang kim kowi kowh maibu towng re-e maru rut uang tatüng hanow kimbang kowi uang rui cha lutlut khai. Naiawng uang rui cha lutlut khe nami rut dow mang khi khai.6Nami khita hanow aia dow lainowmma kram khai, now aia kowh lumowr dow müakangma phaw khai. Now aia kowh kungh hai klowng dow chür klukluk khai bowt.7Nami khin khe mang dow süngnam tawn miuüa, püi howng sarauüa hai hawra sarauüa kowi nauang hawla kownkow atünma lawt ana khai. Babulawn pren kowi kowh naiawngün prengia pek miuüa uang ting khe mangkri tek pe mih, “Mami cha rui tuk phat mih hai mami auan nowng phuang ang mih kowi dow ang nakhup pe aruama mih uan kown, now ang na-ü pe kuh leng kown. Ang pren kowi kowh kruitown mih sum ia kowi lowk ia mih arah ang napeah kown,” pakhai.8Naiawngün prengia pek miuüa dow alak kowi uang tawkche nami cha rui mih phat paw tuk phat dowi, now auan paw hing tuk phuang dowi chekhai.9Naiawng rakowi mang Belsazar dow lang kram ngamlam khai, now aia kowh lumowr paw müakangma lang phaw ngamlam khai. Aia kowh maru iukuüa paw mawlawma own bowk khai.10Mang hai aia kowh maru iukuüa kowh laiklow tata hanow mang kowh u mih pawi chakra kim kowi uang khai. Now Belsazar kowi aia tek pe mih, “Mangkri ow, chowngdawng sakklangma en pacham sing reng lah. Hangkow kram diah, en kowh lumowr müakangma hangkow towah diah.11En kowh pren kowi maru uowi lowk ia tak; aia tut-e dow chimsaima mih lümla uowi chekhai. Nami dow lusa hownia kowh aia kaah mih chap nadowi. En pa Nebuknezar chowng khe nami maru tut-e tukra, prengia hai thuraiuüa kowh iawng mih chanlaira uowi chekhai. Nami maru kowi dow maiaklese sara, süngnam tawn miuüa, püi howng sara hai hawra sarauüa kowi kowh lang kri mih arah Nebuknezar peah khai.12Nami maru ming dow Daniel chekhai. En pa dow nami Daniel kowi Beltesazar pahai hawah khai. Aia tut-e dow chanlaira, prengia, nowng phuang mang mih kür, nowng phuangla laipet mih kür uowi chekhai, now aia dow akrat pusara ahuma chepaw krat dowi iawng nowng chang reng chekhai. Nami Daniel kowi phai nakowhaw kownkow kowchin maru diah. Aia chowtaih nami cha uan nanowng tek en kown,” pakhai.13Now Daniel kowi dow mang pur kowi maru uang pawla khai bowt. Daniel kowi mang lüntaah mih, “En chowbowt bow Daniel? Juda pren hownia kowh apa uang khümla mih en chowbowt bow?14Lusa hownia kowh nadowi mih tukra, prengia hai amülüngma mih chanlaira en tut-e uowi pe pami ang ta.15Mami cha rui naphat hanow naphuang ang auan kownkow sarauüa hai prengia pek miuüa kowi ang uang hawla khowk chowdiah. Tawkche nami auan nowng phuang ang büah dowi chekhai.16En dow apetma mih chap kowi kowh auan nowng tek mih hai akratma mih chap aiachow nowng chang pami ang ta. En che mami cha nowng phat hai nami auan nowng phuang ang khai hanow aruama mih uan nakhup en kown, now ngawng kowi na-ü en kuh leng kown. Nami klen kowi mami pren kowi kowh kruitown mih sum ia kowi lowk ia mih arah ang nape en kown,” pakhai.17Nami khin khe Daniel tek pe mang mih, “En kowh awmrawm sung en tut-e pacham uowi lah, nadowi now akeng miuüa kowi peah diah. Nachenganchepaw nami cha rui ang naphat en hanow auan mih ang naphuang en kown taih.18Aw mangkri, lang kri lang kraing mih Thurai dow en pa Nebuknezar kowi mangra, kürra, kraingra hai ringkawra peah khai.19Naiawng aia kowi peah kür rakowi palusama kowi kowh chen towng chap towng maru-uüa dow aia kowi kram kowh chür büah khai. Aia nau mih kowi dow aia saiah reng, nau mih kowi dow aia towah sing reng, nau mih kowi dow aia peah iukra reng, now nau mih kowi dow asung uowi dowi iawng aia changah reng chekhai.20Nachenganchepaw aia dow chang owrow hai chang bawri khai bowt. Naiawng rakowi aia kowh mang chowm rah hai ringkawra dow Thurai pawta pe khai.21Aia kowi dow lusa maru uowi rah hownia prütta hanow asadua sangching tow pe khai. Aia dow kaurawng kawrngaramchük hawmh hown taiua uowi khai, chiala hawmh hown taiua cha pram khai, now nang tui kowi sik paklak chekhai. Naiawng aia uowi mih dow palusama pren kowi chang alow mih lang kri lang kraing mih Thurai chowtaih, now aia nau mih kowi dow aia pe chowmah mang reng pami aia taphuang dowi mowr chekhai.22“Aw Belsazar, en dow mang Nebuknezar kowh chapa chekhai. Naiawngün dow en tuk bowk khowk chowdiah. Nachenganchepaw khamsum khamdawma hown en uowi dowi chekhai.23Bawrima hown mukuang Thurai kowi en kingküa khai. Aia kim hownia kowh uang pawla mih bia dow en uang pawla khai, now en, en kowh maru iukuüa, en kowh masi hai en changla masi mih narmauüa hown naiawngün bia hown enni kham grep tui khai. Now tai, kuh, kri, lawngha, singh hai hua hown kowh thawpah mih arup kowi enni rowsiah khai. Naiawngün arup dow khi paw khi dowi, ta paw ta dowi, now tukta paw tukta dowi chekhai. Tawkche pe en kawli mih hai kruitown en mih Thurai kowi dow en kiowri dowi chekhai.24Naiawng rakowi Thurai mih uang chin rut hanow nami cha uang rui en mih chekhai.25“Nami cha kowi arui uowi mih dow, ‘MENE, MENE, TEKEL hai PARSIN,’ pah chekhai.26Naiawngün auan dow maiawng: MENE pami dow ‘rüaah’ pami chekhai. En chowm mang mih ni maten Thurai rüata en khowk, now nami ni dow chur mih chowbowt.27TEKEL pami dow ‘khaiah’ pami chekhai. Thurai mih set kowi khai en khowk, now en kowh dik mih lang e khai.28PARSIN pami dow ‘retah’ pami chekhai. En kowh pren dow Mediauüa hai Persiauüa kowi Thurai retta pe khai bowt,” pape khai.29Nakhowk khe Belsazar kowh ana hown Daniel kowi mih khup pe aruama mih uan hai ngawng kowi ü pe kuh leng khai. Now pren kowi kowh kruitown mih sum ia kowi lowk ia mih arah Daniel kowi napeah kown mih laiklow paw phuang khai.30Nami iak khe Babulawn pren mang Belsazar kowi dow ransu-uüa mih uang saita khai.31Now Media prenchak Darius mih ta chowm mang khai. Nakhowk khe Darius dow 62 ning khowk chekhai.
The Seed Company