Daniel1
1Juda pren mang Jehoiakim chowm mang mih sum ning khe Babulawn pren mang Nebuknezar mih Jerusalem marow kowi uangah hanow uang rumah khai.2Nakhowk khe CHAKRAMANG mih Juda pren mang Jehoiakim kowi Nebuknezar rut kowi ap-ah khai, now Thurai chup kim kowi kowh puh bia aikam ün paw apla ne khai. Nahanow Nebuknezar dow naiawngün uanh Babulawn pren kowi pawla hanow aia kowh thuraiuüa chup kim kowi kowh dawngthawnguan nungra rum kowi kowtowah khai.3Akat khe Israeluüa pungmadawng kowi kowh mang chuprek chaprekuüa hai maru iuk chauüa hownia nauang pawla klanguüa ne kownkow mang Nebuknezar mih aia kowh aluchow Aspenaz kowi peah ana khai. Aspenaz dow akletia chekhai.4Mang kim kowi kowh nachang lup kown mih naiawngün klanguüa hawmh dow aser auowk uowi dowi mih, klangiungma mih, chanlaima mih, prengia uowima mih hai ngeng chakma mih naown kown takla. Now naiawngün klanguüa hawmh kowi nasangah Babulawn prenchak lai hai nasangah cha kownkow Aspenaz kowi peah ana khai.5Now mang dow aia kowh chakkham hownia ni towng kowh lakke mowr chi chakkham hai grep tui napeah kownkow pe ana khai. Naiawng hai amatni kowi dow sum ning mowr natüngsangah kown, now nami kung kowi chiang mang kowh lup nape changah kown.6Naiawngünuüa pungmadawng kowi Juda krungchak hownia kowh Daniel, Hanania, Misael hai Azaria büah paw tawi uowi khai.7Now aluchow Aspenaz mih amatni kowi Babulawn prenchak lai hown maiawng plan rük pe ming sar khai: Daniel kowi dow Beltesazar, Hanani kowi dow Sadrak, Misael kowi dow Mesak, now Azari kowi dow Abednago pahai rük pe khai.8Nachenganchepaw Daniel dow mang kowh chakkham hai grep tui hown natasür talawk dowi kownkow tatuak hüah khai. Now naiawngün chakkham hown natasür talawk dowi kownkow aia dow aluchow Aspenaz tut-e kowlü ana khai.9Nahanow Daniel kowi nasaksing sanaah kownkow hai nasakrauah kownkow Thurai mih aluchow Aspenaz kowi peah saktuak khai.10Tawkche nami aluchow tek pe Daniel mih, “Enni kowh chakkham hai grep tui khowm bowk mih mang ang kowh chakramang kowi ang kram chekhai. Ang kowh chakramang dow enni sawnchakuüa lak-e enni lang kow nga kown mih nau dowi chekhai. Enni che kow nga hanow aia dow nadungta ang ngawng kown chekhai,” pape khai.11Now Daniel, Hanania, Misael hai Azaria büah kowi nakhetah kownkow aluchow Aspenaz khowm bowkah mih maru kowi Daniel tek pe mih,12“Sakrauma hown hamüt ni mowr chaing anging diah; anging nacha nakhamah kownkow pramna hai tui krowngchow pe anging now na taih.13Nami kung kowi mang kowh chakkham iung cha miuüa hown tuh anging diah, now en khi-ah mih powm iawng en naruüa anging luk kowi chang diah,” pape khai.14Nahanow nami khetah miia dow naiawng nachang kown mih nauta khai, now amatni kowi dow hamüt ni mowr chaingah khai.15Now hamüt ni kung kowi dow mang kowh chakkham cha mih klanguüa hawmh lak-e amatni lang klangiung hai lang kow iung mih khi khai.16Naiawng rakowi mingkhetah miia dow amatni kowi mang chakkham pe chaah dowi bowt chekhai. Nami takcha kowi amatni kowi pramna hing pe chata hüah khai.17Now nami klanguüa hawmh tali ia kowi dow cha tukra, chürra hai chanlaira maten Thurai peah khai. Daniel dow mukmang hai mang kowi kowh khi-ah mih auan maten nowngia tuk chekhai.18Mang khowm bowkta mih akhin uang talen khe dow aluchow Aspenaz mih naiawngün klanguüa hawmh kowi mang Nebuknezar pur kowi kowpawla khai bowt.19Naiawngün klanguüa hawmh hown taklowp taklang hanow mang dow Daniel, Hanania, Misael hai Azaria büah kowi miapaw nowng prem dowi pami tuk khai. Naiawng rakowi aia dow kowbüah tali ia kowi pe changah mang lup khai bowt.20Amatni kowi dow chanlaira hai prengia lawnguan maten mang mih lüntaah khai. Now aia pren maten kowi kowh maiaklese sara hai süngnam tawn uowi miuüa lak-e hamüt dungna lang tuk pami tuk khai.21Daniel dow Persia pren mang Kuras uown chowm mang mih paning mowr Babulawn pren mang lup tawi chang khai.
The Seed Company