Daniel2
1Nebuknezar dow aia chowm mang mih pre ning khe khi mang lowk khai. Naiawng rakowi aia dow lainowmma saktuak pusa khai, now müi paw aia tamüi dowi chekhai.2Aia dow aia khi-ah mih mang uan nape phuangah kownkow maiaklese sarauüa, süngnam tawn miuüa, krimarang sarauüa hai hawra sarauüa kowi nakrawi haw kownkow chin maru khai. Naiawngün sarauüa dow uang towm hanow mang pur kowi uang iowng khai.3Nakhowk khe amatni kowi mang tek pe mih, “Ang khi mang lowk mih auan natukla kownkow lainowmma ang saktuak pusa khai,” pakhai.4Nakhowk khe Aramaik lai hown amatni tek pe mang mih, “Aw mangkri, chowngdawng sakklangma en pacham sing lah. En khi-ah mih mang dow en naruüa kowi lawp pe diah. Nami mang uan dow anging naphuang en kown taih,” pape khai.5Nakhowk khe amatni kowi mang klangah mih, “Mang kowi tawng chow ang khi mih hai nami mang uan tawng chow mih enni che ia phuang ang dowi hanow ang natawpta enni naknak kown, now enni kowh kim üa paw mawngchawng kuakra ang nachangta enni kown.6Nachenganchepaw ang khi-ah mih mang hai auan che enni ia phuang ang khai hanow awmrawm sung hai ringkawra iukma enni naka kown. Naiawng rakowi kawmat mih nami mang hai auan tek ang büa diah,” pakhai.7Nakhowk khe amatni klangah mih, “Mangkri, en khi-ah mih mang dow en naruüa kowi phat pe diah. Nami mang uan dow anging naphuang en kown taih,” pape khai.8Now mang tek pe amatni mih, “Ang tekta iawng ang nachang ngengche kown pami enni tuk chekhai. Naiawng rakowi enni thow akhin mih pami achima ang tuk.9Enni che ang khi-ah mih mang ia tek ang dowi hanow enni naka ripra ngengche kown. Ang kowh kamrütra nataklowi kown padow enni ka tuak khai. Naiawng rakowi dai lai hown enni nakuan ang kownkow enni sangkrang khai. Kawmat ang khi-ah mih mang phat ang büa madiah. Nami mang che enni ia phat hanow nami auan paw enni ia phuang kown pami ang natuk kown,” pakhai.10Nakhowk khe nami sarauüa tek pe mang mih, “Anging tut-e kowh mangkri tukah kown nau mih auan nowng phuang mih maru lusa kowi amiapaw uowi dowi chekhai. Amia iawng mih lang kri lang kraing mih mang paw maiawng mih lawnguan kowi maiaklese sarauüa, süngnam tawn miuüa hai hawra sarauüa tut-e katpaw lünta dowi tak chekhai.11Mangkri nauah iawng nachang kown mih dow lainowmma krat chekhai. Nami auan dow thuraiuüa klen kowi miapaw mangkri kowi nowng phuang pe kown nadowi; thuraiuüa dow lusa maru tut-e tawi uowi dowi chekhai,” pakhai.12Nami laiklow tata hanow mangkri dow lainowmma kunmarau khai. Naiawng rakowi aia dow Babulawn pren kowi kowh prengia pek miuüa maten kowi nakrawi saita bowk kownkow lawt ana khai.13Nahanow mang kowh ana pek dow krawi phuang khai bowt. Now Daniel hai a-auiuauüa kowi paw nasaila kownkow nakrawi cham kown mih maru krawi chin khai bowt.14Prengia pek miuüa kowi nakrawi sai kownkow cham chinah mih mang chawng miuüa kowi kowh aluchow Ariuk kowi dow Daniel mih prengiama hown kaneuma klangah khai.15Ariuk kowi Daniel lüntaah mih, “Tawngplawng kowchow naiawng khowt mih ana kraing mangkri tuk lawt khai?” pakhai. Nakhowk khe Ariuk dow nami lawnguan Daniel kowi phuang pe khai.16Nami tata hanow Daniel dow mang tut-e kowkowi khai. Aia dow mang khi-ah mih mang uan naphuang pe kownkow mang tut-e kowlü akhin khai.17Nami kung kowi dow Daniel mih kim kowi kowplan hanow a-auiua Hanani, Misael hai Azaria büah kowi nami lawnguan kowlawp pe khai.18Naiawng rakowi Daniel dow amatni tukah dowi mih lawnguan natukla kownkow mukuang Thurai tut-e nalü khowng kown mih a-auiua kowi tek pe khai. Naiawng amatni nalü khowng kown mih dow Babulawn pren kowi kowh prengia pek miuüa hown natawi kowng büah dowi kownkow chekhai.19Now tukah dowi mih lawnguan dow uar-e khe mukmang kowi Daniel kowi uang phuang pe khai. Nakhowk khe Daniel dow mukuang Thurai tut-e awr tek awmrawm lai khai.20Aia tek mih, “Thurai dow achowngma akiow pauowi reng lah,chanlaira hai kürra dow aia kowh chowtaih.21Khin hai ni ün paw aia low kowi aia towah reng;manguüa kowi dow mang chowm rah kowi aia pe chowmah reng,now mang chowm rah hownia paw manguüa kowi aia klaah reng chekhai.Chanlai miuüa kowi dow aia peah chanlaira reng,prengia uowi miuüa kowi dow aia peah prengia reng chekhai.22Aia dow abüp hai apetma mih lawnguan phuang reng;iiu dawng kowi tawng chow uowi mih ün aia tuk reng,now aia hown dow anowi tawi uowi reng chekhai.23Aw ang pipu-uüa kowh Thurai,chanlaira hai kürra en pe ang khai.Naiawng rakowi ang tek en awmrawm lai hai ang kiow en.En tut-e tuk kown nau mih dow en pe tuk anging khai;mang kowh mang uan dow en phuang anging khai,” pakhai.24Nami kung kowi dow Daniel mih Ariuk tut-e kowkowi khai. Ariuk dow mang kowh prengia pek miuüa kowi nasai kownkow mang towah mih chekhai. Daniel tek pe Ariuk mih, “Mang kowh prengia pek miuüa kowi hangkow sai diah. Mang tut-e kowpawla ang diah. Mang kowh mang uan ang phuang pe sow,” pakhai.25Daniel kowh laiklow tata hown krowksang Ariuk dow Daniel kowi mang tut-e kowpawla khai. Mangkri kowi Ariuk tek pe mih, “Mangkri, en kowh mang nowng phuang kown mih maru ang ka lowk ia khowk. Aia dow takhang mih Judauüa pungmadawng kowi kowh maru chekhai,” pape khai.26Daniel kowi hawah now mang lüntaah mih, “Ang kowh mang hai auan en nowng phuang ang kown bow?” pakhai. Daniel kowh ming uowi lowk tak mih dow Beltesazar chekhai.27Daniel klangah mih, “Tukah dowi mih sia mangkri tuk kown nau mih dow mia iawng mih maru paw nowng phuang kown nadowi; chanlai miuüa, süngnam tawn uowi miuüa, maiaklese sarauüa hai hawra sarauüa paw nowng phuang kown nadowi.28Nachenganchepaw tukah dowi mih sia nowng phuang mih mukuang Thurai uowi lowk ia. Aia dow pur prakowi kowh nauang phaw kown mih lawnguan mang Nebuknezar kowi uang pe tukah mih chekhai. Now en mawk rah kowi kowh en mang khi-ah mih auan dow kawmat ang natek en kown.29“Aw mangkri, phangbek kowi en mawk mih khin khe pur prakowi tawng chow naown kown mih lawnguan kowi en paw tuak khai. Tukah dowi mih sia tüng mih Thurai dow pur prakowi tawng chow naphaw kown mih lawnguan kowi uang tüng en mih chekhai.30Akeng miuüa lak-e ang lang chanlai khai rakowi tukah dowi mih sia ang tut-e uang tatüng mih nadowi. Nachenganchepaw aw mangkri, nami auan hai en kowh saktuak en natukla kownkow Thurai uang phuang ang mih chekhai.31“Aw mangkri, en krawi tang mü hanow en pur kowi arup aiukma iowng mih en khi lowk khai. Nami arup dow aiukma, tawk pluplup hai apowm kramra uowima chekhai.32Alu dow achangma mih kuh hown thawpah mih chekhai, abuk hai arut dow tai hown kowh thawpah mih chekhai, now amu hai thung dow kri hown kowh thawpah mih chekhai;33aklowng dow lawngha hown kowh thawpah mih chekhai, now khawkpha dow lawngha hai bawn hown kowh thawpah mih chekhai.34En krawi tang mü mih khin khe hungh kowi kowh hua miapaw kakah dowi matchang taleu pasek mih en khi khai. Nami hua dow lawngha hai bawn hown kowh thawpah mih arup khawk kowi uang dowh hanow uang dita iawm khai.35Nakhowk khe lawngha, bawn, kri, tai hai kuh ün dow tadi naknak khai. Naiawngün dow satma khin khe kowh bawk phai kowi dowh mih chapli iawng chekhai. Naiawngün di dow li uang hanow asaima rown khai. Tawkche nami arup kowi kowh uang dowh mih hua dow hungh aiukma uang chowng lowk khai, now palusama kowi krawi powngta khai.36“Nami dow Mangkri khi-ah mih mang chekhai. Now kawmat dow nami auan mangkri kowi ang naphuang pe kown.37Aw mangkri, en dow mang maten kowh mang chekhai. En kowi dow mukuang Thurai mih mangra, nowng changra, kürra hai ringkawra ün pe en khai.38CHAKRAMANG dow maru, tawncher hai uakling uaber hawmh luk kowi nachang alow kown mih tow en khai. Lowra re-e cham uowi chepaw amatni kowi dow en nimkrüa kowi aia towah khai. En dow nami kuh hown kowh thawpah mih lu chekhai.39“En kung kowi kowh nauang ta chowm mang kown mih dow en iawng nakri kraing kown nadowi bowt. Nami kung kowi paw mang nauang uowi lowk ia kown; nami mang dow kri hown kowh thawpah mih mu hai thung chekhai. Aia nimkrüa kowi dow palusama nauowi kown.40Achur prakowi lawngha iawng akhawtma mih mang nauang uowi lowk ia kown tak. Lawngha hown lowra chap nowng piak iawng nami mang dow akeng mih mang maten kowi adima napiakta kown.41Mang lak kowi en khi-ah mih lawngha hai bawn hown kowh thawpah mih khawkpha hai khawkprüm auan dow pren tabak kown mih chekhai. Nami dow bawn hown taraw chepaw lawngha akhawtma mih iawng nakhawt ne kown.42Khawkpha hai khawkprüm kowi naiawng taraw mih en khi-ah iawng nami pren kowi kowh tawngbak mih pren bak dow nakür kown, now tawngbak mih pren bak dow akür nauowi kown nadowi.43Lawngha hown bawn arawma mih auan dow pren kowi mih tapün talo mih hownia arawma nauowi kown mih chekhai. Tawkche lawngha hown bawn nowng tabawng dowi mih iawng pren kowi kowh maru-uüa mih chowngchowng saksakma natabawng kown nadowi.44“Naiawngün manguüa uowi mih khin khe mukuang Thurai mih nathawp pren lowk kown. Nami pren dow katpaw napiak kown nadowi bowt, now maru paw naia khün kown nadowi bowt. Nami pren dow akeng mih pren maten kowi napiakta naknak kown. Tawkche nami pren dow chowngchowng saksakma nauowi kown.45Mami dow hungh hownia kowh taleu mih hua chekhai. Nami dow maru rut hown kowh leuah mih hua nadowi. Nami hua sek dow lawngha, kri, bawn, tai hai kuh kowi dita naknak mih chekhai. Pur pra naiawng nauang phaw kownkow kri kraingma mih Thurai mangkri kowi uang tüng pe mih chekhai. En khi-ah mih mang dow anowm chekhai, now auan paw kaah sakowm chekhai,” pakhai.46Nakhowk khe mang Nebuknezar mih Daniel pur kowi tabawkah krawm hanow Daniel kowi chupah khai, now Daniel pur kowi nauang chang phuchua kownkow hai nam iungma mih maikhük natowk kownkow aia maru-uüa kowi peah ana khai.47Daniel kowi mang tek pe mih, “Enni kowh Thurai dow akeng mih thuraiuüa kowh Thurai hai manguüa kowh Thurai chekhai. Aia dow maru tukah dowi mih lawnguan paw nowng phuang chekhai pami ang tuk khowk. Tawngplawng kowchow panow en dow mami nowng phuangah dowi mih lawnguan nowng phuang khai,” pakhai.48Nami kung kowi dow Daniel kowi aiukma mih arah mang peah khai, now kri kraingma mih awmrawm sung paw ahuma peah khai. Aia kowi dow Babulawn paprenma kowi kowh kruitown miuüa kowi lang kri mih mang towah khai. Now nami pren kowi kowh prengia pek miuüa luk kowi nachang alow kown mih kurdik paw Daniel kowi aia peah khai.49Nami klen kowi Daniel lü rakowi Sadrak, Mesak hai Abednago büah kowi paw Babulawn pren kowi kowh maru iukra mang peah khai. Tawkche Daniel dow mang kim kowi uowi khai.
The Seed Company