Amaws8
1CHAKRAMANG Thurai mih tüng ang mukmang lowk iawk. Nami mukmang kowi dow ang khi uidut uih min aem khai.2Aia lünta ang mih,“Amaws, tawng chow en khi?” pakhai.Ang klangah mih, “Ang khi uidut uih min aem,” pape khai.Nami khin khe CHAKRAMANG tek ang mih,“Mami uih dow ang maru Israeluüa kowi naripah kown mih tüng müa chekhai;amatni kowh angak rakowi amatni kowi dow ang lawtah kown nadowi.3Nami ni khe dow mang kim kowi kowh meng mih nachowng kar meng kown.Lowra kowi uak kangowh nauowi kown.Naiawngün uak dow rarimma marow uat kowi nacham pawla kown.Ang CHAKRAMANG mami laiklow ang tek khowk,” pakhai.4Akhawr hown uowi miuüa kowi chang nowng miuüa low, sünta büa diah,ngarawng ngarai miuüa kowi chang nowng miuüa low, sünta büa diah.5Enni tek mih, “A-i kowh cha nowng sumla bowt kownkow matawng khe chow Lacher Pawi nakhowk kown?A-i kowh püm nowng sumla bowt kownkow matawng khe chow Tanai Ni nachur kown?Cha khai müa tawng a-i nasowmta bowt kown,uanh sung a-i napünta bowt kown,now kuanla kown mih set hown a-i nakhai uanh bowt kown.6Ngarawng ngarai miuüa kowi tai tangka hown a-i naranah kown,ka dowi miuüa kowi phanaikhawk atawngchow hown a-i naranah kown,now püm pli ün a-i nasum pe bowt kown,” pakhai.7Naiawng rakowi CHAKRAMANG Israeluüa kowh Thurai takham se tek mih,“Amatni chang mih srui mapaw ang tamata kown nadowi.8Pren mih nachü hanow pren kowi kowh maru maten nanguk nakar kown.Tui lawt khe kowh Nail aw tui iawng pün lai sut lai paprenma naown kown,” pakhai.9CHAKRAMANG Thurai tek mih, “Nami ni khe dow sat downg thüm khe sat kowi ang nape kupta kown,now ni ür thüm khe lusa kowi aiiuma ang nachangah kown.10Enni kowh pawi maten dow prüa iiara ang nachangta enni kown,enni kowh meng klow maten dow nguk klow kar klow ang nachangta enni kown,now ang nape khup enni sala uan hanow lu kiama ang nachang enni kown.Nami khin dow chapa uowi lowkchow mih kowng khe kowh prüa iiara khin iawng ang nachang enni kown,now achur khe pat prüa iiara ahuma hown enni nauowi kown,” pakhai.11CHAKRAMANG Thurai tek mih, “Akhin nauang ting kown chowbowt;pren kowi ang nauang chin pe khown kown chowbowt.Nami khown dow tui khawr hawm khawr khown nadowi;nami dow CHAKRAMANG laiklow khawr mih khown chekhai.12Nami khin khe satlawt hownia satkup mowr,tawngphak hownia mrawkphak mowr chiCHAKRAMANG laiklow iowm se iowm se maru nakrawi cham kown.Tawkche naka kown nadowi.13Nami ni khe dow klangiungma mih malauüa hawmh khowm padow CHAKRAMANG kowh laiklow sakkrai hown namaw kown,now akürma mih klanguüa hawmh paw CHAKRAMANG kowh laiklow sakkrai hown namaw kown.14Samari kowi kowh arup ming hown,‘Aw Dan, en masing thurai ming hown ang takham khowk,aw Ber-Seba en masing thurai ming hown ang takham khowk,’ pahai takham miuüa natim kown.Amatni dow mapaw nanowng rü kown nadowi bowt,” pakhai.
The Seed Company