Amaws3
1Aw Israeluüa, Aigupta pren hownia kowh CHAKRAMANG uang lawtla mih krungchakuüa, enni vüi CHAKRAMANG tekah mih laiklow sünta büa diah. CHAKRAMANG tek mih,2“Lusa kowi kowh chenchap maten pungmadawng hownia ang lang klo enni mih chekhai;tawkche enni dow chang lup ngak khai.Naiawng rakowi ang narip enni kown takla,” pakhai.3Rik tachiaah dowi matchang pre ia cham taiua kowi mih uowi bow?4Ka mak chak dowi matchang kaurawng kowi krangsi hek tak bow?Ka mak chak dowi rawn puk lak kowi krangsi ngir kakat tak bow?5Kawm uakling dawng khe thela pe chak dowi matchang uakling uang kown bow?Tawngpaw uang kakah dowi matchang aiawnglowma leng taklowt kown bow?6Marow kowi ta baw tün now takrow dowi mih maru uowi bow?CHAKRAMANG uang pe tingah dowi matchang marow kowi phih uang ting kown bow?7CHAKRAMANG Thurai dow lowra lup aia nachang kown now risiuüa kowi rik tüng pe reng;aia kowh kamrütra anar risiuüa kowi rik tek pe dowi matchang tawngpaw aia chang dowi.8Krangsi hek now mia chow kram dowi mih uowi?CHAKRAMANG Thurai pe tekah laiklow now risi iawng tek lai dowi mih amia chow uowi?9Asdawd hai Aigupta kowi kowh akhawtma mih kangchawngra kim maten kowi uowi miuüa kowi,“Samari kowi kowh hungh kowi takua talawm büa diah;Israeluüa mün khowt chow ngah mih mü büah madiah,now mün khowt chow tachang nowng büah mih sam mü büah madiah,” padow kowtek pe büa diah.10CHAKRAMANG tek mih, “Israeluüa mih achinawmma tuk uowi dowi;amatni dow maru-uüa hownia krawi rupah mih uanh amatni kowh akhawtma mih kangchawngra kim kowi krümah büah khai.Naiawng rakowi amatni kowh pren dow ransu-uüa nauang umta lut kown.Amatni kowh tahang müa tap dow ransu-uüa napiakta pe kown,now amatni kowh akhawtma mih kangchawngra kim kowi kowh krümah mih uanh ransu-uüa napawta pe kown,” pakhai.12CHAKRAMANG Thurai tek mih, “Krangsi mak ruapur khe nakrawi lawngah kownkow ruapur thing mih kawikrawi chepawakhawk hut pre dung chow nadowi now paramkui pasekchow krawi ka khai.Nami powm iawng Samari kowi kowh uowi mih Israeluüa dow akekchow naplai kown.Amatni dow phangbek hai uankhup asekchow hown nata lat kown,” pakhai.13Lang kri lang kraing mih CHAKRAMANG Thurai tek mih,“Sünta, Jakawb krungchakuüa kowi kaneuma nauowi kownkow tek pe diah.14Amatni kowh angak rakowi Israel kowi ang naripah kown.Nami khin khe Bethel kowi kowh phuchuara ün ang napiakta pe kown.Nahanow phuchuara kowi kowh anang ün natalet kown,now krawng kowi nadowh kown towbowt.15Chungrau khin khe kowh uowi rah kim ang napiakta pe kown,now satma khin khe kowh uowi rah kim ün paw ang napiakta pe kown.Nasai sah hown kowh tawngah mih kim ün ang napiakta pe kown,now kri kraingma mih kim ün paw ang napiakta pe kown.Ang CHAKRAMANG mami laiklow ang tek khowk,” pakhai.
The Seed Company