Amaws2
1CHAKRAMANG tek mih,“Moab kowi kowh maru-uüa mih hing changta angak hüah khai.Amatni dow Edawm mang kowh hut ün maih kowi tikah now sürlawkah khai.Naiawng rakowi aia kowi dow ang naripah ngengche kown.2Naiawng rakowi Moab luk kowi ang nauang chin pe maih kown,now Keriowt kowi kowh akhawtma mih kangchawngra kim ün nakamta pe kown.Tasen klow hai baw tün hown pusama hown Moab kowi kowh maru-uüa dow nakowng kown.3Aia kowh mang kowi dow ang napiakta pe kown,now aia hai aia kowh pren mingkhet miuüa maten kowi paw ang bawmta pe kown,” pakhai.4CHAKRAMANG tek mih,“Juda maru-uüa mih hing changta angak hüah khai.Amatni dow ang kowh ari aiang nuata khai,now amatni dow ang kowh ana pek chün dowi chekhai.Chün lak dow amatni kowh pipu-uüa iawng asung uowi dowi mih arup aren kowi chup büah khai;amatni paw nami tiama tawi kowi tawi mang büah khai.Naiawng rakowi amatni kowi dow ang naripah ngengche kown.5Juda luk kowi ang nauang chin pe maih kown,now nami maih dow Jerusalem kowi kowh akhawtma mih kangchawngra kim ün nakamta pe kown,” pakhai.6CHAKRAMANG tek mih,“Israel maru-uüa mih hing changta angak hüah khai.Amatni dow nau tangka pawisa rakowi maru iunguüa kowi cham sumah khai,now phanaikhawk achumchow rakowi ngarai miuüa kowi paw cham sumah büah khai.Naiawng rakowi amatni kowi dow ang naripah ngengche kown.7Amatni dow thua dinchow iawng ngarai miuüa kowi thuaah khai,now akhawr hown uowi miuüa kowi riata hüah khai.Pa hai chapa mih masiuüa lowk iachow hown taiua chang iang khai.Naiawng hown ang kowh ming chimsaima mih dow piak ang büah khai.8Amatni dow arup chupra maten kowi maru uang pawngah mih tawnguat kowi changla mawk rah hanow mawkah büah khai.Amatni kowh thurai chup kim kowi dow anowm nadowi mih iawk tangka hown ranla arak büah hanow khamah büah khai.9“Aw Israeluüa, sam tuak büah madiah.Amawruüa mih sidar singh iawng akroma hai kengma singh iawng akhawtma chekhai.Nachenganchepaw nami Amawruüa kowi enni pur kowi ang piakta khai.Amatni kowh auih hai aprün paw ang piakta pe khai.10Amawruüa pren nape enni kownkow Aigupta pren hownia uang lawtla enni mih dow ang chowtaih,now likawm ning mowr süngrüp süngkangma kowi ang mingkhet enni khai.11Aw Israeluüa, enni kowh chauüa pungmadawng kowi nachowng risiuüa ne kown mih ang ruiah nadowi bow?now amatni pungmadawng hownia nachowng Nazarituüa ne kown mih ang ruiah nadowi bow?12Nachenganchepaw Nazarituüa kowi enni pe khamah arak khai,now risiuüa iawng natek lai dowi kownkow risiuüa kowi enni peah ana khai.13Naiawng rakowi kawmat mih ang nadita enni nak kown,uanh dikma mih kari kowi taküa hanow tadi nak mih iawng ang nachang enni kown.14Enni kowh iowm lang len mih maru paw kowmatia kowi nowng talawng kown nadowi;akürma mih maru-uüa paw namata kür bowt kown,now tasen kiakma miuüa paw amatni kowh sak nowng lawng kown nadowi.15Leba ap kiakma miuüa paw apowt natakla kown;iowm lenma miuüa paw nanowng powt kown nadowi,now kawrnga hown kowh iowm miuüa paw amatni kowh sak nowng lawng kown nadowi.16Tasen kiakma miuüa kowi kowh sak lang kraing miuüa paw nami ni khe dow napowt kown,amatni dow towla rutchün khawkleng hüah hanow napowt kown.Ang CHAKRAMANG, mami laiklow ang tek khowk,” pakhai.
The Seed Company