2 Samuel7
1Nami kung kowi dow mang David mih aia kim kowi kowuowi khai bowt. Now aria aret kowi kowh aia kowh ransu-uüa maten rut hownia CHAKRAMANG mih pe tanaiah khai bowt.2Akat khe risi Nathan kowi mang David tek pe mih, “Sam mü madiah, ang uowi mih dow sidar singh kim klangiungma mih kowi chekhai. Nachenganchepaw Thurai kowh sangbowk laitawm tawkpla uowi mih dow tangbung kowi chowtaih!” pakhai.3Nakhowk khe David kowi Nathan klangah mih, “En sak kowi uowi iawng chang diah. Tawngplawng kowchow panow CHAKRAMANG dow tawi uowila en reng chekhai,” pape khai.4Nachenganchepaw nami iak khe CHAKRAMANG uang tek pe Nathan mih,5“Ang kowh nar David tut-e kowkowiah hanow en natek pe kown mih, ‘Ang nauowila kown mih kim en nathawp ang kown pabow en ka tuak?6Aigupta pren hownia Israeluüa kowi ang uang lawtla mih ni hownia ani mowr kowi tawng iawng mih kim kowi paw ang uowi dowi tak chekhai. Akeng kowi ang cham süt mih khin khe paw ang uowi mih dow tangbung kowi hai taklowp taklangra te kowi chowtaih.7Ang kowh maru Israeluüa cham kowi rah towng kowi amatni hown ang tawi uowi reng chekhai. Nachenganchepaw Israeluüa kowi naming nakhetah kownkow ang peah kurdik mih tara chet miuüa kowi dow, “Tawngplawng kowchow sidar singh hown ang uowi rah kim enni thawp ang dowi?” pami katpaw ang tek pe dowi chekhai,’ pape diah.8“Naiawng rakowi lang kri lang kraing mih CHAKRAMANG kowh mami laiklow ang kowh nar David kowi kawmat kowtek pe diah, ‘En kowi dow dowm kowi kowh ruapur thing rah hownia ang uang pawla en khai, now ang kowh maru Israeluüa luk kowi kruitown miia ang thawp en khai.9En cham kowiah mih rah maten kowi ang tawi uowila en reng chekhai. Now en kowh ransu-uüa maten kowi en pur hownia ang piakta en khai. En kowi dow lusa kowi kowh ming nang iukma mih maru iawng kri kraingma ang nachang en kown.10Ang kowh maru Israeluüa vüi ang tow pe tara chet mih khowk chowdiah. Tawkche nami khin hownia now maru ngakuüa mih amatni kowi changah anowng apowng khai. Nachenganchepaw kawmat dow amatni luk kowi naiawng naphaw kown nadowi bowt. Tawngplawng kowchow panow ang kowh maru Israeluüa vüi ang lang khowmta pe uowi rah parah khowk chekhai. Nakowi dow athaulangma amatni naia uowi bowt kown, now amatni kowi miapaw naia changah anowng apowng kown nadowi bowt. Now amatni kowh ransu-uüa maten hownia amatni kowi ang pe tanaiah bowt kown. En kowh krungchakuüa kowi ang nape chowmah mang reng kown.12En kowng kowh en kowh pipu-uüa tadupra kowi dup en mih khin khe en kowh chapa lowk ia kowi ang nape chowmah mang kown. Aia kowh pren dow anikma ang natow pe kown.13Aia dow ang vüi kowi nathawp ang kim lowk kown. Now aia kowh mang chowm rah dow chowngchowng saksakma anikma ang nachang pe kown.14Ang dow aia kowh pa nachowng kown, now aia dow ang kowh chapa nachowng kown. Aia che changta angak khai hanow achapa kowi a-pa ripah reng iawng aia kowi ang naripah kown.15Sawl luk kowi dow ang kowh achur uowi dowi mih sakraura ang pawta pe khai. Naiawng hai aia kowh mang chowm rah mih ang pe en khai. Nachenganchepaw Sawl kowi ang kowh achur uowi dowi mih sakraura ang pawta pe iawng en chapa kowi dow ang napawta pe kown nadowi.16En kowh krungchakuüa hai pren dow chowngchowng saksakma nauowi kown. En kowh mang chowm rah dow chowngchowng saksakma nauowi reng kown,’ pape diah,” pakhai.17Now mukmang kowi kowh naiawngün laiklow maten dow David kowi Nathan tek pe khai bowt.18Naiawngün laiklow tata now mang David mih takrumra te lak kowi kowkup khai. Now CHAKRAMANG pur kowi chowm se tek mih, “Aw CHAKRAMANG Thurai, ang hai ang kimchakuüa dow tawngpaw asung uowi dowi mih maru chowtaih. Nachenganchepaw ang vüi kowi ahuma en chang ang khai.19Aw CHAKRAMANG Thurai, anging vüi kowi naiawng khowt en chang anging khowk chepaw en nachang anging küng kown mih en nau reng tak. En dow pur prakowi kowh ang kowh krungchakuüa vüi paw en khamla lai khai. Aw CHAKRAMANG Thurai, maru maten kowi naiawng bow en chang pe reng?20“Aw CHAKRAMANG Thurai, en kowh nar David kowh saktuak dow en aiawng tuk towbowt. Naiawng rakowi ang natek en kown mih tawngpaw uowi dowi bowt.21Naiawngün kri kraingma mih lup en chang mih dow en kowh laikham rakowi hai en sak nau rakowi chekhai. En dow kri kraingma mih lup nowng chang pami en pe tuk ang kownkow kri kraingma mih lup en chang mih chekhai.22“Aw CHAKRAMANG Thurai, en dow akri akraingma! En iawng mih miapaw uowi dowi bowt, now en klen kowi akeng mih Thurai lang uowi dowi bowt chekhai. Naiawngün laiklow dow anging ta khowk.23Nami klen kowi en kowh maru Israel chenchap iawng mih dow lusa kowi mia iawng mih chenchap paw lang uowi dowi bowt. Amatni kowi dow en kowh maru en nachangla kownkow Aigupta pren kowi kowh nar lup changra hownia en uang lawngla khai. Naiawng en uang lawngla mih khin khe amatni naring nakaw en kownkow amatni pur kowi dow akri kraingma mih lup hai kramra uowima mih lup en chang pe khai. En kowh maru Israeluüa vüi kowi amatni pur hownia akeng mih chenchapuüa hai thuraiuüa kowi en prütta pe khai.24Israeluüa kowi dow chowngchowng saksakma vüi en kowh maru en changla khai. Now aw CHAKRAMANG, en dow amatni kowh Thurai en chowng khai.25“Kawmat mih aw CHAKRAMANG Thurai, en kowh nar ang hai ang kowh krungchakuüa lawnguan kowi kowh en kowh laikham dow chowngchowng saksakma townah reng diah. Nami en kowh laikham iawng changah reng diah.26Nahanow en kowh ming dow chowngchowng saksakma akri akraingma naown kown towbowt. Now maru-uüa mih, ‘Lang kri lang kraing mih CHAKRAMANG chowtaih Israel kowh Thurai,’ padow natek büah kown. Now en kowh nar David krungchakuüa kowi mih anikma en nape uowiah kown towbowt.27“Aw lang kri lang kraing mih CHAKRAMANG Israel kowh Thurai. Ang kowh krungchakuüa kowi en nape chowmah mang kown mih lawnguan en phuang ang khai. Naiawng rakowi en kowh nar sakkraingma hown naiawng uam lü uam leng en mih chekhai.28Aw lang kri lang kraing mih CHAKRAMANG, en dow Thurai chekhai. En kowh laikham dow anowmma chekhai, now mami aiungma mih laikham dow en kowh nar tut-e en khamah khai.29Naiawng rakowi chowngchowng saksakma naia uowila kownkow kawmat mih en nar kowh krungchakuüa kowi sakrauma hown peah prasi diah. Aw CHAKRAMANG Thurai, nami laiklow dow en tekta khowk chekhai, now en kowh prasi dow ang kowh krungchakuüa luk kowi chowngchowng saksakma nauowi reng kown,” pakhai.
The Seed Company