2 Samuel8
David awng tasen mih
1Akung kowi dow David mih Filistinuüa kowi senah hanow nowngta khai. Now Filistinuüa kowh Methek-Ama marow mih aia powngta pe khai.2David dow Moabuüa kowi paw nowngta khai. Now aia dow amatni kowi mih krawng kowi atanma pe mawkah khai. Now rik khüa mih pre ia chi mih kowi dow aia saita hanow sum lawmbawr kowi kowh dow aia pe plaiah lowk ia chi khai; naiawng hai aia dow sum bak kowi pabak mih Moabuüa kowi saita khai. Now naiawngün ta sing mih Moabuüa dow David kowh nar chowng hanow aia kowi peah mangmu büah khai.3Nami klen kowi David dow mang Hadadezer kowi senah hanow nowngta khai. Naiawng David senah mih dow mang Hadadezer Iufratis aw re-e kowh aia kowh krawng bawn nakrawi plan powng iawk kownkow uang tarü mih khin khe chekhai. Mang Hadadezer dow Siria pren kowi kowh Zoba marow mang chekhai, now a-pa dow Rehawb chekhai.4David dow mang Hadadezer kowh kawrnga kowi kowh chowm mih 1,700 ia siphaiuüa hai khawk hown kowh mang mih 20,000 ia siphaiuüa kowi hawt khümta khai. Aia dow amatni kowh kawrnga kari pungmadawng hownia 100 klüng towah khai. Now akeng mih kawrnga maten kowi dow tüngta pe uowntüng sa bowk khai.5Nami khin khe Damaska marow kowi kowh Siriauüa dow mang Hadadezer kowi uang tawi khowngah tasen kownkow uang büah khai. Nakhowk khe David dow amatni kowh maru iun 22,000 ia kowi hawt saita pe khai.6Now Siria pren kowi kowh Damaska marow kowi David mih tow pe siphai hawmh khai. Nahanow Siriauüa dow David kowh nar chowng hanow aia kowi peah mangmu büah khai. CHAKRAMANG dow David cham kowi rah towng kowi pe awngah reng chekhai.7David mih mang Hadadezer kowh maru iukuüa kowh kuh kawngma ün Jerusalem marow kowi uang pawla khai.8Now Hadadezer kowh Beta marow hai Berothai marow hownia paw mang David mih kri ahuma uang pawla khai.9Hamat marow mang Tawi hai mang Hadadezer iüah dow ransu chekhai. Amatchi dow khin khin tadowk tasen reng chekhai. Naiawng rakowi Hadadezer kowh siphaiuüa maten kowi David saita mih satang tata hanow mang Tawi dow awmrawm khai. Naiawng rakowi David kowi nauang kiowriah kownkow mang Tawi dow achapa Joram kowi David tut-e uang chinah khai. Now Joram dow David vüi kuh uanh, tai uanh hai kri uanh ün uang pawla pe khai.11Naiawngün Joram uang pawla pe mih uanh maten dow David mih CHAKRAMANG vüi lang kraah khai. Naiawngün uanh paw Siriauüa, Moabuüa, Filistinuüa, Amalekuüa hai Zoba marow mang Hadadezer büah hownia kowh kaah mih kuh hai tai uanh maten hown CHAKRAMANG vüi aia lang kraah khai.13David dow Awisa lawngrawi kowi Siriauüa kowi saita 18,000 ia chekhai. Nami hownia uang plan kung kowi David kowh ming iung nang iung dow ariaret kowi cham krawi tauet khai bowt.14Edawm pren paprenma kowi David mih krawi tow pe Israel siphaiuüa tangbung khupra khai. Nahanow Edawmuüa maten dow David kowh nar chowng khai bowt. CHAKRAMANG dow David cham kowi rah towng kowi pe awngah reng chekhai.15David dow Israeluüa pren paprenma luk kowi chowm mang khai. Aia dow aia kowh maru-uüa luk kowi tara nowm chet pe reng, now aiungma kruitownah reng chekhai.16Zerui kowh chapa Joab dow siphai lang kri mih chekhai. Now Ahilud kowh chapa Jehosafat dow mang kowh chownglawng lawnguan rui mih chekhai.17Ahitub kowh chapa Zadawk hai Abiathar kowh chapa Ahimelek iüah dow uamow chekhai. Now Seraia dow cha rui mih chekhai.18Mang chawng mih kowi kowh lang kri mih dow Jehoiada chapa Benaia chekhai. Now David kowh chapauüa dow uamowuüa chekhai.The Seed Company